Kojolɔi 5:1-31
5 Nakai gbi lɛ nɔ lɛ, Debora+ kɛ Barak,+ Abinoam binuu lɛ lá lala nɛɛ:+
2 “Akɛni tawulɔi ayitsɔi jwere amɛyisɛɛ* yɛ Israel hewɔ lɛ,Akɛni mɛi lɛ jɛɔ amɛsuɔmɔ mli amɛkɛ amɛhe hãa hewɔ lɛ,+Nyɛjiea Yehowa yi!
3 Nyɛboa toi, nyɛ maŋtsɛmɛi! Nyɛfea toi, nyɛ nɔyelɔi!
Mi lɛ, malá mahã Yehowa.
Malá yijiemɔ lalai* mahã Yehowa,+ Israel Nyɔŋmɔ lɛ.+
4 Yehowa, be ni oshi Seir lɛ,+Be ni ofã nyiɛmɔ kɛjɛ Edom shikpɔŋ lɛ nɔ lɛ,Shikpɔŋ lɛ hoso, ni ŋwɛi tsɔ nu eshwie shi,Nu babaoo jɛ atatui lɛ amli shwie shi.
5 Gɔji sere* yɛ Yehowa hiɛ,+Sinai po fee nakai yɛ Yehowa,+ Israel Nyɔŋmɔ lɛ hiɛ.+
6 Yɛ Shamgar,+ Anat binuu lɛ gbii lɛ amli lɛ,Yɛ Yael+ gbii lɛ amli lɛ, gbɛjegbɛi lɛ anɔ kamɔ efolo.Gbɛfalɔi yatsɔɔ gbɛi krokomɛi anɔ.
7 Mɛi bɛ Israel akrowai lɛ amli dɔŋŋ;Amɛbɛ dɔŋŋ kɛyashi, mi Debora,+ mite shi,Kɛyashi mite shi akɛ nyɛ yɛ Israel.+
8 Amɛhala nyɔŋmɔi hei;+Kɛkɛ ni ta te shi yɛ agbói lɛ anaa.+
Anaaa tsɛŋ ko lɛ, anaaa akpɔlɔ ko,Yɛ hii 40,000 ateŋ yɛ Israel.
9 Israel tatsɛmɛi lɛ kã mitsui nɔ,+Mɛi ni jɛ amɛsuɔmɔ mli amɛkɛ mɛi lɛ tee lɛ.+
Nyɛjiea Yehowa yi!
10 Nyɛ mɛi ni nyɛtara tejii lamululamului anɔ,Nyɛ mɛi ni nyɛtara kuntui kpakpai anɔ,Nyɛ mɛi ni nyɛnyiɛ gbɛ lɛ nɔ lɛ,Nyɛjwɛŋa enɛ he!
11 Anu nuyɛlɔi lɛ agbee yɛ nuyɛɛhei lɛ;Amɛmiiwie Yehowa jalɛ nifeemɔi lɛ ahe yɛ jɛmɛ,Jalɛ nii ni mɛi ni yɔɔ Israel akrowai lɛ feɔ lɛ.
Kɛkɛ ni Yehowa maŋ lɛ kpeleke shi kɛtee agbói lɛ anaa.
12 Tee shi, tee shi Debora!+
Tee shi, tee shi ni olá lala ko!+
Tee shi, Barak!+ Nyiɛmɔ onomii lɛ ahiɛ kɛya, bo Abinoam binuu!
13 Kɛkɛ ni mɛi ni eshwɛ lɛ kpeleke shi kɛtee abladei lɛ aŋɔɔ;Yehowa maŋ lɛ kpeleke shi kɛba miŋɔɔ koni amɛkɛ hewalɔi lɛ abawu.
14 Efraim ji he ni amɛjɛ, mɛi ni yɔɔ jɔɔ lɛ mli lɛ;Amɛnyiɛ osɛɛ, Ao Benyamin, yɛ omaŋbii lɛ ateŋ.
Tatsɛmɛi lɛ kpeleke shi kɛjɛ Makir,+Ni mɛi ni tsɛɔ mɛi kɛhã ta lɛ* jɛ Zebulon.
15 Isakar lumɛi lɛ fata Debora he,Bɔ ni Isakar fee lɛ, nakai Barak+ hu fee.
Atsu lɛ koni enyiɛ enane nɔ kɛya jɔɔ lɛ mli.+
Yiŋkɔshikɔshifeemɔ kpele te shi yɛ mɛi atsuiiaŋ yɛ shĩai ni yɔɔ Ruben weku lɛ mli lɛ amli.
16 Mɛni hewɔ ota jatsui* enyɔ lɛ ateŋ,Oboɔ bɛji ni amɛkpãa kɛtsɛɔ tookui+ lɛ atoi?
Ejaakɛ yiŋkɔshikɔshifeemɔ kpele te shi yɛ mɛi atsuiiaŋ yɛ shĩai ni yɔɔ Ruben weku lɛ mli lɛ amli.
17 Gilead ta shi yɛ Yordan sɛɛ;+Ni Dan hu, mɛni hewɔ eta meelei lɛ amli lɛ?+
Asher ta ŋshɔ lɛ naa efolo,Ni eta shi yɛ elɛjiadaamɔhei* lɛ.+
18 Zebulon weku lɛ kɛ amɛwala wo oshãra mli* kɛyashi gbele mli;Nakai nɔŋŋ Naftali+ hu fee yɛ hei ni kwɔlɔ lɛ.+
19 Maŋtsɛmɛi ba, amɛbawu ta;Kɛkɛ ni Kanaan maŋtsɛmɛi lɛ bawu+Yɛ Taanak, yɛ Megido nui lɛ ahe.+
Amɛnáaa jwiɛtɛi ko amɛloo.+
20 Ŋulamii lɛ jɛ ŋwɛi amɛwu;Amɛjɛ amɛgbɛhei lɛ amɛkɛ Sisera wu.
21 Kishon faa* lɛ loo amɛ kɛtee,+Blema faa* lɛ, Kishon faa* lɛ.
Ao misusuma,* onaanaa hewalɔi anɔ.
22 Kɛkɛ ni okpɔŋɔi lɛ kɛ amɛnane tokotai* lɛ shimɔ shiBe ni etawuu okpɔŋɔi lɛ huruɔ kɛ foi waa lɛ.+
23 Yehowa bɔfo lɛ kɛɛ, ‘Nyɛlomɔa Meroz,’‘Hɛɛ, nyɛlomɔa emli bii lɛ,Ejaakɛ amɛbayeee amɛbuaaa Yehowa,Amɛkɛ hewalɔi lɛ baaa amɛbayeee amɛbuaaa Yehowa.’
24 Ajɔɔ Yael+ yɛ yei ateŋHeber,+ Kennyo lɛ ŋa lɛ;Ajɔɔ lɛ yɛ yei ni hiɔ mama tsũi amli lɛ ateŋ.
25 Nuu lɛ bi nu; shi yoo lɛ hã lɛ mliki.
Yoo lɛ hã lɛ mliki ni mli efĩ yɛ kɔɔpoo fɛfɛo ko mli.+
26 Yoo lɛ kpã enine mli ekɔ mama tsũ he tso kɛ enaa piɔpiɔ lɛ,Ekɛ eninejurɔ kɔ nitsulɔi ahamlɛ lɛ.
Kɛkɛ ni yoo lɛ kɛ hamlɛ lɛ ka Sisera, ejwa nuu lɛ yitso,Ni eka nuu lɛ yitso kɛyashi egbu kɛbote eyitso mli.+
27 Epele yɛ yoo lɛ naji ateŋ; egbee shi ni etsiii ehe;Epele yɛ yoo lɛ naji ateŋ ni egbee shi;He ni epele yɛ lɛ, jɛmɛ nɔŋŋ egbee shi ni egbo yɛ.
28 Yoo ko miikwɛ samfɛlɛ lɛ mli,Sisera mami miifili* samfɛlɛ lɛ fɔji lɛ amli,‘Mɛni hewɔ eshwiili lɛ sɛɛ etsɛ nɛkɛ?
Mɛni hewɔ eshwiilii lɛ ashishi gbɛɛmɔi lɛ ekpe sɛɛ nɛkɛ?’+
29 Eblayei lɛ ateŋ mɛi ni hiɛ kã shi fe fɛɛ lɛ baahã lɛ hetoo;Hɛɛ, lɛ hu ebaatĩ mli ehã ehe akɛ,
30 ‘Benɛ amɛmiija ta mli nii ni amɛná lɛ,Tawulɔ fɛɛ tawulɔ baaná oblayoo* kome, oblayei* enyɔ po,Sisera baaná ta mli nii lɛ amli mama ni adai, hɛɛ, mama ni adai,Mama ni alo nii awo mli, mama ni adai, mamai enyɔ ni alo nii awo mli poAkɛbaawo tawulɔi lɛ akuɛ.’
31 Ao Yehowa, ohenyɛlɔi lɛ fɛɛ ahiɛ akpãtã,+Shi mɛi ni sumɔɔ bo lɛ afee tamɔ hulu lɛ be ni eteɔ shi yɛ enunyam mli lɛ.”
Ni toiŋjɔlɛ ba shikpɔŋ lɛ nɔ* afii 40.+
Shishigbɛ Niŋmaa
^ Loo “Akɛni yitsɔi jwere yisɛɛ.”
^ Loo “Matswa saŋku.”
^ Shishitsɔɔmɔi komɛi kɛɔ akɛ, “hoso.”
^ Shishitsɔɔmɔi komɛi kɛɔ akɛ, “mɛi ni hiɛ woloŋmaa nibii lɛ.”
^ Ni ji, jatsui ni akɛtere kooloo ko.
^ Loo “ekpelekemɔhei.”
^ Loo “Zebulon weku lɛ nyaŋe amɛsusuma.”
^ Loo “nui.”
^ Kwɛmɔ Wiemɔi Titrii Amligbalamɔ lɛ.
^ Loo “nui.”
^ Loo “nui.”
^ Loo “koklotoi.”
^ Loo “miipili.”
^ Hebri sht. ŋm., “fɔmɔ kotoku.”
^ Hebri sht. ŋm., “fɔmɔ kotokui.”
^ Loo “Ni shikpɔŋ lɛ nɔ jɔ.”
