Amos 3:1-15
3 “Israelbii, nyɛboa wiemɔ ni Yehowa ewie yɛ nyɛhe nɛɛ toi, wiemɔ ni kɔɔ weku muu lɛ fɛɛ ní mijie kɛje* Ejipt shikpɔŋ lɛ nɔ kɛba lɛ he, akɛ:
2 ‘Nyɛ pɛ ji mɛi ni mile yɛ shikpɔŋ lɛ nɔ wekui lɛ fɛɛ ateŋ.+
No hewɔ ni mahã nyɛbu nyɛtɔmɔi lɛ fɛɛ ahe akɔntaa lɛ.+
3 Ani mɛi enyɔ baafee ekome kɛnyiɛ kɛ́ amɛkpaŋko akɛ amɛbaakpe?*
4 Ani jata hũɔ yɛ koo mli kɛ́ enáko kooloo ko ni ebaamɔ?
Ani jata* shiɔ esɛ̃ŋ kɛjɛɔ eshihilɛhe kɛ́ emɔko nɔ ko?
5 Ani akpa duɔ loofɔlɔ yɛ shikpɔŋ kɛ́ atsɔko lɛ tsɔne yɛ jɛmɛ?*
Ani akpa fɛɔ yɛ shikpɔŋ kɛ́ eduko nɔ ko?
6 Kɛ́ akpã tɛtɛrɛmantɛrɛ yɛ maŋ ko mli lɛ, ani maŋbii lɛ ahe kpokpooo?
Kɛ́ amanehulu ba yɛ maŋ lɛ mli lɛ, ani jeee Yehowa ji mɔ ni fee?
7 Ejaakɛ Nuŋtsɔ Ofe Yehowa efeŋ nɔ ko,Ja ejie eyitsoŋ sane* kpo etsɔɔ etsuji gbalɔi lɛ dã.+
8 Jata ehũu!+ Namɔ sheŋ gbeyei?
Nuŋtsɔ Ofe Yehowa ewie! Namɔ egbaŋ?’+
9 ‘Nyɛjajea nyɛtsɔa yɛ Ashdod mɔji ni atswa gbogboi awo amɛhe lɛ ayiteŋKɛ Ejipt shikpɔŋ lɛ nɔ mɔji ni atswa gbogboi awo amɛhe lɛ hu ayiteŋ.
Nyɛkɛa akɛ: “Nyɛbuaa nyɛhe naa nyɛwoa Samaria gɔji lɛ;+Nyɛkwɛa basabasafeemɔ ni yaa nɔ yɛ eteŋ lɛKɛ shishiumɔ ni yaa nɔ yɛ emli lɛ.+
10 Ejaakɛ amɛleee nɔ ni ja feemɔ,” Yehowa kɛɛ,“Amɛbuaa yiwalɛ kɛ hiɛkpatamɔ naa yɛ amɛmɔji ni atswa gbogboi awo amɛhe lɛ amli.”’
11 No hewɔ lɛ, nɔ ni Nuŋtsɔ Ofe Yehowa kɛɛ nɛ,‘Henyɛlɔ ko baabɔle shikpɔŋ lɛ kɛkpe,+Ebaashɔ̃ ohewalɛ lɛ yɛ odɛŋ,Ni abaaloo omɔji ni atswa gbogboi awo amɛhe lɛ amli nii.’+
12 Nɔ ni Yehowa kɛɛ nɛ,‘Bɔ ni tookwɛlɔ shɔ̃ɔ naji enyɔ loo too toi kuku ko kɛjɛɔ jata daaŋ lɛ,Nakai nɔŋŋ abaashɔ̃ Israelbii lɛ,Mɛi ni tara saatsei fɛfɛji kɛ sɛi saatsei kpakpai* anɔ amrɔ nɛɛ yɛ Samaria lɛ.’+
13 ‘Nyɛboa toi, ní nyɛbɔa Yakob shĩa lɛ kɔkɔ,’* Nuŋtsɔ Ofe Yehowa, Nyɔŋmɔ taiatsɛ lɛ kɛɛ.
14 ‘Ejaakɛ gbi ni mahã Israel abu etuatsemɔi* lɛ fɛɛ ahe akɔntaa lɛ,+Mahã Betel afɔleshaa latɛi lɛ hu abu amɛhe akɔntaa;+Abaafolɔ afɔleshaa latɛ lɛ he akolontoi lɛ ashwie shikpɔŋ.+
15 Matswa fɛ̃i beiaŋ shĩa lɛ kɛ latsa beiaŋ shĩa lɛ fɛɛ nɔ.’
‘Shĩai ni akɛ shwuɔ wu* esaa amɛmli lɛ ahiɛ baakpãtã,+Ni shĩai wuji* lɛ ahiɛ baakpãtã,’+ Yehowa kɛɛ.”
Shishigbɛ Niŋmaa
^ Loo “kɛkwɔ kɛje.”
^ Loo “kɛ́ amɛtoko gbɛjianɔ akɛ amɛbaakpe?”
^ Loo “jata oblanyo kɛ ekuɛ he tsɔi.”
^ Shishitsɔɔmɔi komɛi kɛɔ akɛ, “kɛ́ tsɔnenaa niyenii bɛ mli?”
^ Loo “eteemɔŋ sane.”
^ Loo “Damasko sɛi saatsei.”
^ Loo “ní nyɛyea odase nyɛshia Yakob shĩa lɛ.”
^ Loo “emlatɔmɔi.”
^ Loo “aivori.” Kwɛmɔ Wiemɔi Titrii Amligbalamɔ lɛ.
^ Shishitsɔɔmɔi komɛi kɛɔ akɛ, “shĩai babaoo.”
