Amos 7:1-17
7 Nɔ ni Nuŋtsɔ Ofe Yehowa jie etsɔɔ mi nɛ: Naa! Ehã baalabii* babaoo ba be ni sɛɛkpee ŋmɔshi nibii lɛ bɔi daramɔ lɛ.* Enɛ ji sɛɛkpee ŋmɔshi nibii, be ni afolɔ maŋtsɛ lɛ jwɛi* lɛ sɛɛ.
2 Be ni baalabii lɛ eye shikpɔŋ lɛ nɔ kwɛ̃ɛ nii lɛ amɛgbe naa lɛ, mikɛɛ: “Ao, Nuŋtsɔ Ofe Yehowa, ofainɛ, okɛ amɛhe ake amɛ!+ Te Yakob aaafee tɛŋŋ eyi aná wala lɛ?* Ejaakɛ egbɔjɔ!”+
3 No hewɔ lɛ, Yehowa tsake ejwɛŋmɔ* yɛ enɛ he.+ Yehowa kɛɛ: “Ebaŋ mli.”
4 Nɔ ni Nuŋtsɔ Ofe Yehowa jie etsɔɔ mi nɛ: Naa! Nuŋtsɔ Ofe Yehowa kɛɛ ekɛ la baagbala amɛtoi. La lɛ kpãtã nui ni mli kwɔlɔ waa lɛ ahiɛ, ni ekpãtã shikpɔŋ lɛ fã ko hu hiɛ.
5 Kɛkɛ ni mikɛɛ: “Ao, Nuŋtsɔ Ofe Yehowa, ofainɛ, kaahã enɛ ba.+ Te Yakob aaafee tɛŋŋ eyi aná wala lɛ?* Ejaakɛ egbɔjɔ!”+
6 No hewɔ lɛ, Yehowa tsake ejwɛŋmɔ* yɛ enɛ he.+ Nuŋtsɔ Ofe Yehowa kɛɛ: “Enɛ hu baŋ mli.”
7 Nɔ ni ejie etsɔɔ mi nɛ: Naa! Yehowa damɔ gbogbo ko ni akɛ plomo* tswa nɔ, ni ehiɛ plomo yɛ edɛŋ.
8 Ni Yehowa kɛɛ mi akɛ: “Amos, mɛni onaa nɛɛ?” Ni mikɛɛ: “Plomo.” Kɛkɛ ni Yehowa kɛɛ: “Naa, mikɛ plomo miito mimaŋ Israel he. Mikɛ amɛhe ekeŋ amɛ dɔŋŋ.+
9 Abaafee Isak hei grɔŋŋi+ lɛ amaŋfɔ, ni abaakpãtã Israel jamɔhei lɛ ahiɛ;+ ni mikɛ klante baabatutua Yeroboam shĩa lɛ.”+
10 Amazia, Betel osɔfo lɛ,+ kɛ shɛɛ nɛɛ tsu akɛyahã Israel maŋtsɛ Yeroboam+ akɛ: “Amos miikpaŋ oyinɔ yɛ Israel shĩa lɛ teŋ tuuntu.+ Shikpɔŋ lɛ nyɛŋ ewiemɔi lɛ fɛɛ anaa edamɔ.+
11 Ejaakɛ nɔ ni Amos kɛɛ nɛ, ‘Akɛ klante baagbe Yeroboam, ni bɔ fɛɛ bɔ ni fee lɛ, abaaŋɔ Israel nom kɛaaje eshikpɔŋ lɛ nɔ kɛya.’”+
12 Ni Amazia kɛɛ Amos akɛ: “Ninalɔ, yaa, joo foi kɛya Yuda shikpɔŋ lɛ nɔ, ní oyatao odaaŋ ŋmaa* yɛ jɛmɛ, ní ogba yɛ jɛmɛ.+
13 Shi kaagba yɛ Betel dɔŋŋ,+ ejaakɛ maŋtsɛ jamɔhe ni,+ ni maŋtsɛyeli shĩa hu ni.”
14 Kɛkɛ ni Amos hã Amazia hetoo akɛ: “Jeee gbalɔ ji mi, ni jeee gbalɔ bi hu ji mi; shi moŋ, kooloi akwɛlɔ ji mi,+ ni misaa sikamore agbami tsei ahe hu.*
15 Shi Yehowa hã mikpa kooloi lɛ kwɛmɔ, ni Yehowa kɛɛ mi akɛ, ‘Yaa ni oyagba otsɔɔ mimaŋ Israel.’+
16 No hewɔ lɛ, agbɛnɛ, bo Yehowa wiemɔ lɛ toi: ‘Ookɛɛ akɛ, “Kaagba oshi Israel,+ ni kaashiɛ+ oshi Isak shĩa lɛ.”
17 No hewɔ lɛ, nɔ ni Yehowa kɛɛ nɛ: “Oŋa baatsɔ ashawo yɛ maŋ lɛ mli, ni obihii kɛ obiyei lɛ baanyɔnyɔi yɛ klante naa. Akɛ susumɔ kpãa baaja oshikpɔŋ lɛ, ni bo diɛŋtsɛ lɛ, obaayagbo yɛ shikpɔŋ ko ni he tseee nɔ; ni bɔ fɛɛ bɔ ni fee lɛ, abaaŋɔ Israel nom kɛaaje eshikpɔŋ lɛ nɔ kɛya.”’”+
Shishigbɛ Niŋmaa
^ Baalabi ji agã henɔ ko.
^ Ni ji, jwɛi ni afolɔ ni aka ni egbi ni akɛhãa kooloi.
^ Ni ji, yɛ January kɛ February mli.
^ Hebri sht. ŋm., “Te Yakob aaafee tɛŋŋ ete shi edamɔ shi lɛ?”
^ Loo “shwa ehe.”
^ Hebri sht. ŋm., “Te Yakob aaafee tɛŋŋ ete shi edamɔ shi lɛ?”
^ Loo “shwa ehe.”
^ Loo “kulomulo.” Ni ji, kpãa ko kɛ enaa dade ní akɛkwɛɔ akɛ nɔ ko ma shi jaŋŋ lo.
^ Hebri sht. ŋm., “ní oyaye blodo.”
^ Loo “ni migbulɔɔ sikamore agbamii ahe hu.”
