Wolo Ni Akɛmaje Efesobii Lɛ 2:1-22
2 Agbɛnɛ hu, Nyɔŋmɔ hã nyɛhiɛ kamɔ, eyɛ mli moŋ akɛ no mli lɛ nyɛgboi yɛ nyɛtɔmɔi kɛ nyɛhe eshai+
2 ni be ko ni eho lɛ nyɛnyiɛ yɛ mli lɛ amli, yɛ je nɛŋ su lɛ* naa,+ yɛ nɔyelɔ ni yɔɔ hegbɛ akɛ ekudɔ kɔɔyɔɔ,+ ni ji mumɔ+ ni tsuɔ nii amrɔ nɛɛ yɛ toigbele bii lɛ amli lɛ suɔmɔ naa.
3 Hɛɛ, be ko ni eho lɛ, amɛteŋ wɔ fɛɛ wɔba wɔjeŋ yɛ, yɛ nibii ni wɔheloo lɛ shweɔ lɛ naa,+ ni wɔfee heloo lɛ kɛ wɔjwɛŋmɔ lɛ suɔmɔnaa nii,+ ni wɔji mlifu bii yɛ fɔmɔ su naa+ tamɔ mɛi ni eshwɛ lɛ nɔŋŋ.
4 Shi Nyɔŋmɔ lɛ, akɛni emɔbɔnalɛ lɛ fa+ babaoo hewɔ lɛ, etsɔ esuɔmɔ kpele ni ekɛsumɔ wɔ lɛ nɔ+
5 ehã wɔ kɛ Kristo lɛ fɛɛ hiɛ kamɔ, be mli ni wɔgboi yɛ tɔmɔi amli po lɛ+—atsɔ dromɔ nɔ ahere nyɛyiwala.
6 Agbɛnɛ hu, etee wɔ kɛ lɛ fɛɛ shi ni ekɛ wɔ kɛ lɛ fɛɛ eta ŋwɛiniiaŋ yɛ ekome ni wɔ kɛ Kristo Yesu efee lɛ hewɔ,+
7 koni yɛ bei ni baaba lɛ* amli lɛ, ejie edromɔ babaoo ni nɔ bɛ lɛ kpo yɛ emlihilɛ ni ejieɔ lɛ kpo etsɔɔ wɔ* akɛni wɔ kɛ Kristo Yesu efee ekome lɛ hewɔ lɛ mli.
8 Atsɔ dromɔ nɛɛ nɔ ahere nyɛyiwala kɛtsɔ hemɔkɛyeli nɔ,+ ni enɛ lɛ, jeee nyɛ diɛŋtsɛ nyɛfee; shi moŋ eji Nyɔŋmɔ nikeenii.
9 Dabi, jeee nitsumɔi amli ejɛ,+ koni mɔ ko akaná nɔ ko edamɔ nɔ eshwã.
10 Wɔji Nyɔŋmɔ ninenaa nitsumɔ,* ni atsɔ ekome ni wɔ kɛ Kristo Yesu efee lɛ nɔ+ abɔ wɔ+ kɛhã nitsumɔi kpakpai ni Nyɔŋmɔ tsɔ hiɛ ekpɛ mli eto koni wɔnyiɛ yɛ nitsumɔi nɛɛ amli lɛ.
11 No hewɔ lɛ, nyɛkaia akɛ be ko ni eho lɛ, nyɛ ni nyɛji jeŋmajiaŋbii yɛ heloo gbɛfaŋ lɛ, mɛi ni atsɛɔ amɛ “mɛi ni afolɔ amɛ ketia” ni akɛ adesai aniji fee yɛ heloo lɛ mli lɛ tsɛɔ nyɛ “mɛi ni afolɔko amɛ ketia.”
12 Nakai be lɛ mli lɛ, nyɛbɛ Kristo, ni nyɛtse nyɛhe kɛje Israel maŋ lɛ he, ni nyɛji gbɔi hu yɛ shiwoo lɛ he kpaŋmɔi lɛ agbɛfaŋ;+ nyɛbɛ hiɛnɔkamɔ ni nyɛbɛ Nyɔŋmɔ yɛ je lɛ mli.+
13 Shi amrɔ nɛɛ, yɛ Kristo Yesu ni nyɛ kɛ lɛ efee ekome lɛ hewɔ lɛ, nyɛ ni tsutsu ko lɛ nyɛyɔɔ shɔŋŋ lɛ, nyɛtsɔ Kristo lɛ lá lɛ nɔ nyɛbɛŋkɛ.
14 Ejaakɛ lɛ ji wɔtoiŋjɔlɛ,+ mɔ ni fee kui enyɔ lɛ fɛɛ ekome,+ ni ekumɔ gbogbo ni kã amɛteŋ akɛ afabaŋ lɛ.+
15 Etsɔ eheloo lɛ nɔ egu nyɛɛ lɛ, ni ji kitãi a-Mla lɛ ni akɛ famɔi fee lɛ, bɔ ni afee ni efee kui enyɔ ni kɛ lɛ efee ekome lɛ gbɔmɔ hee kome,+ ni ehã toiŋjɔlɛ aba,
16 koni etsɔ piŋmɔ tso* lɛ nɔ esaa kui enyɔ lɛ fɛɛ kɛ Nyɔŋmɔ teŋ jogbaŋŋ yɛ gbɔmɔtso kome mli,+ ejaakɛ ekɛ egbɔmɔtso lɛ gbe nyɛɛ lɛ.+
17 Ni eba ebajaje toiŋjɔlɛ he sane kpakpa lɛ etsɔɔ nyɛ ni nyɛyɔɔ shɔŋŋ lɛ, kɛ toiŋjɔlɛ hu etsɔɔ mɛi ni bɛŋkɛ lɛ,
18 ejaakɛ kɛtsɔ enɔ lɛ, wɔ, ni ji kui enyɔ lɛ fɛɛ lɛ, wɔnáa gbɛ kɛyaa Tsɛ lɛ ŋɔɔ kɛtsɔ mumɔ kome nɔ.
19 No hewɔ lɛ, jeee gbɔi kɛ maŋsɛɛbii ji nyɛ dɔŋŋ,+ shi moŋ nyɛ kɛ mɛi krɔŋkrɔŋi lɛ fɛɛ ji maŋbii,+ kɛ Nyɔŋmɔ shĩa lɛ mli bii hu,+
20 ni atswa nyɛ ama bɔfoi lɛ kɛ gbalɔi lɛ afaneshi lɛ nɔ,+ ni Kristo Yesu diɛŋtsɛ ji faneshi lɛ koŋtɛ lɛ.+
21 Tsũ muu lɛ fɛɛ ni kɛ lɛ efee ekome ni aatsara efãi lɛ fɛɛ jogbaŋŋ aafee lɛ ekome lɛ,+ miida kɛmiitsɔ sɔlemɔ shĩa krɔŋkrɔŋ kɛhã Yehowa.*+
22 Nyɛ hu, akɛni nyɛ kɛ lɛ efee ekome hewɔ lɛ, aatswa nyɛ kɛ mɛi krokomɛi lɛ fɛɛ aama shi koni nyɛfee he ko ni Nyɔŋmɔ baatsɔ emumɔ lɛ nɔ ehi jɛmɛ.+
Shishigbɛ Niŋmaa
^ Loo “yɛ gbɛ ni je nɛɛ ekɔ lɛ; yɛ je nɛŋ shihilɛ gbɛjianɔtoo lɛ.”
^ Loo “yinɔi ni baaba lɛ; shihilɛi agbɛjianɔtoi ni baaba lɛ.” Kwɛmɔ Wiemɔi Titrii Amligbalamɔ lɛ.
^ Loo “yɛ ejurɔ ni efeɔ wɔ.”
^ Loo “Wɔji nibii ni Nyɔŋmɔ efee lɛ eko.”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Saji Krokomɛi A5 lɛ.
