Wolo Ni Akɛmaje Efesobii Lɛ 3:1-21
3 Enɛ hewɔ lɛ, mi Paulo, ni miji Kristo Yesu gboklɛfonyo+ hã nyɛ, ni ji jeŋmajiaŋbii lɛ—*
2 kɛ́ yɛ anɔkwale mli lɛ, nyɛnu Nyɔŋmɔ dromɔ lɛ he shĩakwɛmɔ nitsumɔ+ ni akɛhã mi yɛ nyɛhewɔ lɛ he,
3 akɛ atsɔ kpojiemɔ ko nɔ ahã mile teemɔŋ sane krɔŋkrɔŋ lɛ, tamɔ bɔ ni mitsɔ hiɛ miŋma nyɛ he sane kuku lɛ.
4 No hewɔ lɛ, kɛ́ nyɛkane enɛ lɛ, nyɛbaanyɛ nyɛyɔse bɔ ni minuɔ Kristo lɛ he teemɔŋ sane krɔŋkrɔŋ lɛ shishi mihãa.+
5 Yɛ yinɔi krokomɛi amli lɛ, ahãaa gbɔmɛi abii ale teemɔŋ sane nɛɛ, tamɔ bɔ ni amrɔ nɛɛ, atsɔ mumɔ lɛ nɔ ajie kpo atsɔɔ bɔfoi krɔŋkrɔŋi kɛ gbalɔi lɛ,+
6 akɛ, esa akɛ jeŋmajiaŋbii lɛ hu atsɔmɔ nanemɛi niyelɔi, kɛ gbɔmɔtso kome too lɛ nɔŋŋ henii, ni amɛ kɛ wɔ aná shiwoo lɛ mli gbɛfaŋnɔ, yɛ ekome ni amɛ kɛ Kristo Yesu efee lɛ, kɛ sane kpakpa lɛ hewɔ.+
7 Mibatsɔ enɛ he sɔɔlɔ yɛ Nyɔŋmɔ dromɔ ni etsɔ ehewalɛ lɛ nitsumɔ lɛ nɔ ekɛke mi tswaa lɛ naa.+
8 Akɛ dromɔ nɛɛ ehã mi,+ mi ni mibaa shi fe mɔ ni ji bibioo kwraa yɛ mɛi krɔŋkrɔŋi lɛ fɛɛ ateŋ lɛ,+ koni mijaje nii ni Kristo lɛ yɔɔ ni anyɛɛɛ shishi ana lɛ he sane kpakpa lɛ mitsɔɔ jeŋmaji lɛ,
9 koni mahã mɔ fɛɛ mɔ ana teemɔŋ sane krɔŋkrɔŋ lɛ he gbɛjianɔtoo lɛ,+ teemɔŋ sane ni akɛtee yɛ yinɔi ni eho lɛ amli, yɛ Nyɔŋmɔ, mɔ ni bɔ nibii fɛɛ lɛ mli lɛ.
10 Enɛ ba lɛ nakai koni amrɔ nɛɛ, atsɔ asafo lɛ nɔ+ ahã nɔyelii kɛ hegbɛi ni yɔɔ ŋwɛiniiaŋ lɛ ale Nyɔŋmɔ hiɛshikamɔ ni jieɔ ehe kpo yɛ gbɛi srɔtoi pii anɔ lɛ.+
11 Enɛ kɛ naanɔ yiŋ ni eto yɛ Kristo lɛ, ni ji wɔ-Nuŋtsɔ Yesu he lɛ kpãa gbee,+
12 ni hemɔkɛyeli ni wɔyɔɔ yɛ Kristo lɛ mli hewɔ lɛ, wɔwieɔ kɛ nɔmimaa, ni wɔnáa gbɛ hu kɛyaa+ Nyɔŋmɔ ŋɔɔ kɛ nɔmimaa.
13 No hewɔ lɛ, miikpa nyɛ fai akɛ nyɛnijiaŋ akaje wui yɛ mimanehului ni minaa yɛ nyɛhewɔ lɛ ahewɔ, ejaakɛ nomɛi ji anunyam kɛhã nyɛ.+
14 Enɛ hewɔ lɛ, mikulaa shi mihãa Tsɛ lɛ,
15 mɔ ni weku fɛɛ weku ni yɔɔ ŋwɛi kɛ shikpɔŋ lɛ nɔ lɛ ná egbɛ́i kɛjɛ eŋɔɔ lɛ.
16 Misɔlemɔ ji akɛ, yɛ enunyam ni fa babaoo lɛ naa lɛ, etsɔ emumɔ lɛ nɔ ehã nyɛ hewalɛ koni nyɛhe awa yɛ nyɛmligbɛ gbɔmɔ lɛ gbɛfaŋ,+
17 ni akɛ, kɛtsɔ nyɛhemɔkɛyeli lɛ nɔ lɛ, Kristo lɛ ahi nyɛtsuii amli kɛ suɔmɔ.+ Eba akɛ, nyɛshishifãi baamɔmɔ shi+ ni nyɛmamɔ shi shiŋŋ yɛ faneshi lɛ nɔ,+
18 bɔ ni afee ni nyɛ kɛ mɛi krɔŋkrɔŋi lɛ fɛɛ anyɛ anu nɔ ni ji anɔkwale lɛ lɛɛmɔ, kɛ ekɛlɛ, kɛ enɔkwɔlɛ, kɛ emlikwɔlɛ lɛ shishi jogbaŋŋ kɛmɔ shi,
19 koni nyɛle Kristo lɛ suɔmɔ+ lɛ ni tekeɔ nilee lɛ, koni nibii ni Nyɔŋmɔ kɛhãa lɛ fɛɛ ayimɔ nyɛ obɔbɔ.
20 Agbɛnɛ, mɔ ni yɛ ehewalɛ ni tsuɔ nii yɛ wɔmli lɛ naa lɛ,+ ebaanyɛ efee babaoo kɛteke nɔ, ni esaa eteke nɔ babaoo kwraa fe nibii ni wɔbiɔ loo ebaa wɔyiŋ lɛ,+
21 lɛ atsɔ asafo lɛ kɛ agbɛnɛ hu Kristo Yesu nɔ akɛ anunyam lɛ ahã yɛ yinɔi fɛɛ amli kɛya naanɔi anaanɔ. Amen.
Shishigbɛ Niŋmaa
^ Etamɔ nɔ ni etsa sane nɛɛ nɔ yɛ kuku 14 lɛ.
