Ester 6:1-14
-
Maŋtsɛ lɛ wo Mordekai hiɛ nyam (1-14)
6 Nakai nyɔɔŋ lɛ mli lɛ, maŋtsɛ lɛ nyɛɛɛ awɔ.* No hewɔ lɛ, ebi ni akɛ yinɔsaji awolo lɛ aba.+ Ni abakane atsɔɔ maŋtsɛ lɛ.
2 Ana ni aŋma amaniɛ ni Mordekai babɔ yɛ Bigtana kɛ Teresh, maŋtsɛ lɛ maŋtsɛ shĩa onukpai enyɔ, ni ji agbonaakwɛlɔi, ni tsɔ ŋaa koni amɛgbe Maŋtsɛ Ahasweros* lɛ he lɛ yɛ mli.+
3 Maŋtsɛ lɛ bi akɛ: “Ani awo Mordekai hiɛ nyam ni ajwere lɛ yɛ enɛ he?” Kɛkɛ ni maŋtsɛ lɛ sɔɔlɔi lɛ kɛɛ akɛ: “Afeko nɔ ko nɔ ko ahãko lɛ.”
4 Sɛɛ mli lɛ, maŋtsɛ lɛ bi akɛ: “Namɔ yɔɔ kpo lɛ nɔ lɛ?” No mli lɛ, Haman eba maŋtsɛ shĩa lɛ kponɔgbɛ kpo+ lɛ nɔ, koni ekɛ maŋtsɛ lɛ abawie ni asɛŋ Mordekai yɛ tso ni esaa eto Mordekai lɛ nɔ.+
5 Maŋtsɛ lɛ sɔɔlɔi lɛ kɛɛ lɛ akɛ: “Haman+ ji mɔ ni damɔ kpo lɛ nɔ lɛ.” No hewɔ lɛ, maŋtsɛ lɛ kɛɛ akɛ: “Nyɛhãa ebaa mli.”
6 Be ni Haman ba lɛ, maŋtsɛ lɛ bi lɛ akɛ: “Mɛni esa akɛ afee ahã nuu ni maŋtsɛ lɛ miisumɔ akɛ ewo ehiɛ nyam lɛ?” Haman susu yɛ etsuiŋ akɛ: “Namɔ yɔɔ ni maŋtsɛ baasumɔ akɛ ewo ehiɛ nyam fe mi?”+
7 No hewɔ lɛ, Haman kɛɛ maŋtsɛ lɛ akɛ: “Nuu ni maŋtsɛ miisumɔ akɛ ewo ehiɛ nyam lɛ,
8 hã akɛ maŋtsɛ atade+ ni maŋtsɛ woɔ lɛ, kɛ okpɔŋɔ ni maŋtsɛ taa nɔ lɛ aba, ni akɛ maŋtsɛ akekere ni akɛfiɔ okpɔŋɔ lɛ yitso lɛ afi okpɔŋɔ lɛ yitso kɛba.
9 Ni akɛ atade lɛ kɛ okpɔŋɔ lɛ awo maŋtsɛ lɛ lumɛi ni abuɔ amɛ waa lɛ ateŋ mɔ kome dɛŋ, koni akɛ atade lɛ awo nuu ni maŋtsɛ lɛ miisumɔ akɛ ewo ehiɛ nyam lɛ, ni ahã eta okpɔŋɔ lɛ nɔ kɛnyiɛ maŋ lɛ henaabuamɔhe lɛ. Abolɔ kɛnyiɛ ehiɛ akɛ: ‘Nɛkɛ ji bɔ ni afeɔ ahãa nuu ni maŋtsɛ lɛ sumɔɔ akɛ ewo ehiɛ nyam lɛ!’”+
10 Amrɔ nɔŋŋ ni maŋtsɛ lɛ kɛɛ Haman akɛ: “Feemɔ oya! Kɔ atade lɛ ni omɔ okpɔŋɔ lɛ ni ofee nɔ ni okɛɛ bianɛ nɔŋŋ lɛ ohã Mordekai, Yudanyo lɛ ni taa maŋtsɛ agbó lɛ naa* lɛ. Kaashi nibii ni owie lɛ eko eko.”
11 No hewɔ lɛ, Haman kɔ atade lɛ ni emɔ okpɔŋɔ lɛ, ni ekɛ atade lɛ wo Mordekai+ ni ehã Mordekai ta okpɔŋɔ lɛ nɔ kɛnyiɛ maŋ lɛ henaabuamɔhe lɛ, ni ebolɔ kɛnyiɛ Mordekai hiɛ akɛ: “Nɛkɛ ji bɔ ni afeɔ ahãa nuu ni maŋtsɛ lɛ sumɔɔ akɛ ewo ehiɛ nyam lɛ!”
12 No sɛɛ lɛ, Mordekai ku esɛɛ kɛtee maŋtsɛ lɛ agbó lɛ naa,* shi Haman he fee oya kɛtee shĩa ni ewerɛ eho ehe ni eha eyi nɔ.
13 Be ni Haman bɔ eŋa Zeresh+ kɛ enanemɛi lɛ fɛɛ nɔ fɛɛ nɔ ni eba enɔ lɛ, ehii hiɛshikalɔi lɛ kɛ eŋa Zeresh kɛɛ lɛ akɛ: “Kɛ́ Mordekai, mɔ ni obɔi shigbeemɔ yɛ ehiɛ momo lɛ, jɛ Yudafoi lɛ aseshi lɛ* mli lɛ, no lɛ, oyeŋ enɔ kunim kɔkɔɔkɔ; bɔ fɛɛ bɔ ni fee lɛ, obaagbee shi yɛ ehiɛ.”
14 Be ni amɛkɛ lɛ wieɔ lolo lɛ, maŋtsɛ lɛ maŋtsɛ shĩa onukpai lɛ ba, ni amɛbawó lɛ oya kɛtee okpɔlɔ ni Ester eŋmɛ lɛ he.+
Shishigbɛ Niŋmaa
^ Loo “wɔ tse yɛ maŋtsɛ lɛ hiɛ.”
^ Hebri sht. ŋm., “koni amɛnine asa Maŋtsɛ Ahasweros he.”
^ Loo “mli.”
^ Loo “mli.”
^ Hebri sht. ŋm., “jɛ Yudafoi lɛ adumɔwu lɛ.”
