Ezekiel 13:1-23
13 Ni Yehowa kɛɛ mi ekoŋŋ akɛ:
2 “Gbɔmɔ bi,* gbaa oshi Israel gbalɔi lɛ,+ ni okɛɛ mɛi ni kaa amɛyiŋ amɛgbaa amɛ diɛŋtsɛ amɛgbalɛi lɛ*+ akɛ, ‘Nyɛboa Yehowa wiemɔ toi.
3 Nɔ ni Nuŋtsɔ Ofe Yehowa kɛɛ nɛ: “Kpoo hã gbalɔi kwashiai ni nyiɛɔ amɛ diɛŋtsɛ amɛmumɔ sɛɛ be ni amɛnako ninaa ko lɛ!+
4 Bo Israel, ogbalɔi lɛ etsɔmɔ tamɔ osɔi ni yɔɔ tsukoi amli.
5 Nyɛyaŋ hei ni ekumɔ yɛ tɛ gbogboi lɛ amli lɛ koni nyɛyatswa amɛ ekoŋŋ nyɛhã Israel shĩa lɛ,+ bɔ ni afee ni Israel aya nɔ adamɔ shi shiŋŋ yɛ ta lɛ mli yɛ Yehowa gbi lɛ nɔ.”+
6 “Mɛi ni kɛɔ akɛ, ‘Nɔ ni Yehowa kɛɛ nɛ,’ be ni Yehowa diɛŋtsɛ tsuko amɛ lɛ, amale ninai amɛna lɛ, ni amale amɛgbaa lɛ, ni kɛ̃lɛ amɛmiimɛ koni amɛwiemɔ lɛ aba mli.+
7 Kɛ́ nyɛkɛɛ akɛ, ‘Nɔ ni Yehowa kɛɛ nɛ,’ be ni mikɛko nɔ ko lɛ, ani jeee amale ninaa nyɛna lɛ? Ani jeee amale nyɛgbaa lɛ?”’
8 “‘No hewɔ lɛ, nɔ ni Nuŋtsɔ Ofe Yehowa kɛɛ nɛ: “‘Akɛni nyɛwie nɔ ni ji amale, ni nyɛninai lɛ, amale ni hewɔ lɛ, mikɛ nyɛ ená,’ Nuŋtsɔ Ofe Yehowa kɛɛ.”+
9 Makpã minine mli mashi gbalɔi ni naa amale ninai, ni amɛgbaa amale gbalɛi lɛ.+ Amɛhiŋ mɛi ni mikɛtoɔ ajina lɛ ateŋ; ni aŋmaŋ amɛgbɛ́ii hu yɛ wolo ni Israel shĩa lɛ mli bii lɛ agbɛ́ii yɔɔ mli lɛ mli; ni amɛkuŋ amɛsɛɛ hu kɛbaŋ Israel shikpɔŋ lɛ nɔ; ni nyɛbaaná nyɛle akɛ miji Nuŋtsɔ Ofe Yehowa.+
10 Ejaakɛ amɛkɛɔ akɛ, “Toiŋjɔlɛ yɛ!” be mli ni toiŋjɔlɛ bɛ+ ni amɛkɛhãa mimaŋ lɛ duɔ gbɛ. Kɛ́ amɛtswa gbogbo ni bɛ hewalɛ lɛ, amɛkɛ kaaloo shaa he.’*+
11 “Kɛɛmɔ mɛi ni kɛ kaaloo shaa gbogbo lɛ he lɛ akɛ gbogbo lɛ baagbee shi. Nugbɔ baanɛ waa, ni nyɔŋmɔŋtɛi baashwie shi,* ni kɔɔyɔi ni naa wa baakumɔ gbogbo lɛ eshwie shi.+
12 Ni kɛ́ gbogbo lɛ gbee shi lɛ, abaabi nyɛ akɛ, ‘Nɛgbɛ nɔ ni nyɛkɛsha he lɛ yɔɔ?’+
13 “No hewɔ lɛ, nɔ ni Nuŋtsɔ Ofe Yehowa kɛɛ nɛ: ‘Mahã kɔɔyɔi ni naa wa atswa yɛ mimlila lɛ mli, ni nugbɔ anɛ waa yɛ mimlifu lɛ mli, ni nyɔŋmɔŋtɛi ashwie shi yɛ mlifu ni kpãtãa nii ahiɛ lɛ mli.
14 Makumɔ gbogbo ni nyɛkɛ kaaloo esha he lɛ mashwie shikpɔŋ, ni abaana efaneshi lɛ. Kɛ́ maŋ lɛ gbee shi lɛ, nyɛhiɛ baakpãtã yɛ mli; ni nyɛbaaná nyɛle akɛ miji Yehowa.’
15 “‘Kɛ́ miŋmɛɛ mimlifu lɛ fɛɛ he mishwie gbogbo lɛ kɛ mɛi ni kɛ kaaloo sha he lɛ anɔ lɛ, makɛɛ nyɛ akɛ: “Gbogbo lɛ bɛ dɔŋŋ, ni mɛi ni sha he lɛ hu bɛ dɔŋŋ.+
16 Israel gbalɔi ni gba amɛtsɔɔ Yerusalem ni amɛna toiŋjɔlɛ he ninai amɛhã lɛ, be ni toiŋjɔlɛ bɛ lɛ, bɛ dɔŋŋ,”’+ Nuŋtsɔ Ofe Yehowa kɛɛ.
17 “Ni bo, gbɔmɔ bi, tsɔ ohiɛ ohã omaŋ lɛ biyei ni kaa amɛyiŋ amɛgbaa amɛ diɛŋtsɛ amɛgbalɛi lɛ, ni ogba oshi amɛ.
18 Kɛɛmɔ amɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Kpoo hã yei ni kpɛɔ nii ni akɛfiɔ nine amɛhãa niji fɛɛ,* ni amɛfeɔ hiɛhaanɔ amɛhãa yitso dalɛ fɛɛ yitso dalɛ koni amɛgbɔbi mɛi awala* lɛ! Ani nyɛmiigbɔbi mimaŋbii lɛ awala,* shi nyɛ diɛŋtsɛ nyɛwala* lɛ, nyɛmiibaa yi?
19 Ani barle* dɛ̃ kɔkɔi obɔbɔ kɛ niyenii* atrɔmai ahewɔ lɛ, nyɛbaamale nyɛtsɔɔ mimaŋbii lɛ ni boɔ nyɛmalemɔi lɛ toi ni nyɛgbe mɛi* ni esaaa gbele, ni nyɛhere mɛi* ni esaaa akɛ amɛhiɔ wala mli+ lɛ ni nyɛkɛbule mi yɛ mimaŋbii lɛ ateŋ?”’+
20 “No hewɔ lɛ, nɔ ni Nuŋtsɔ Ofe Yehowa kɛɛ nɛ: ‘Nyɛ yei, mikɛ nyɛninefiinii lɛ ni nyɛkɛgbɔbiɔ mɛi* tamɔ agbɔbiɔ loofɔji lɛ ená, ni matserɛ amɛ kɛje nyɛniji ahe, ni mahã mɛi ni nyɛgbɔbiɔ tamɔ loofɔji lɛ aye amɛhe.
21 Matserɛ nyɛhiɛhaanii lɛ amli, ni makpɔ̃ mimaŋbii lɛ kɛje nyɛdɛŋ, ni amɛfeŋ mɛi ni nyɛbaagbɔbi ni nyɛmɔmɔ amɛ dɔŋŋ; ni nyɛbaaná nyɛle akɛ miji Yehowa.+
22 Ejaakɛ nyɛkɛ nyɛmalemɔ lɛ ekumɔ jalɔ tsui+ be mli ni mihãko ewerɛ aho ehe,* ni nyɛwajeɔ mɔ fɔŋ niji+ koni ekaje egbɛ fɔŋ lɛ nɔ, ni eya nɔ ehi wala mli.+
23 No hewɔ lɛ, nyɛ yei, nyɛnaŋ amale ninai dɔŋŋ ni klamɔ hu nyɛklaŋ dɔŋŋ;+ ni makpɔ̃ mimaŋbii lɛ kɛje nyɛdɛŋ, ni nyɛbaaná nyɛle akɛ miji Yehowa.’”
Shishigbɛ Niŋmaa
^ Loo “ni okɛɛ mɛi ni jɛɔ amɛ diɛŋtsɛ amɛtsui mli amɛgbaa lɛ.”
^ Hebri sht. ŋm., “binuu.”
^ Ni tsɔɔ akɛ, amɛkɛ kaaloo shaa gbogbo ni bɛ hewalɛ lɛ he koni efee tamɔ nɔ ni gbogbo lɛ yɛ hewalɛ.
^ Hebri sht. ŋm., “ni bo nyɔŋmɔŋtɛi, shwiemɔ shi.”
^ Eji nibii ni akɛfiɔ nikutsei loo nineshi, ni asusuɔ akɛ majik hewalɛ yɛ mli.
^ Loo “asusumai.”
^ Loo “asusumai.”
^ Loo “nyɛsusumai.”
^ Loo “susumai.”
^ Loo “susumai.”
^ Hebri sht. ŋm., “blodo.” Kwɛmɔ Wiemɔi Titrii Amligbalamɔ lɛ.
^ Eji wiiti henɔ ko.
^ Loo “susumai.”
^ Loo “be mli ni mifeko lɛ dɔlɛ nii.”
