Ezekiel 14:1-23
14 Ni Israel onukpai lɛ ekomɛi ba ni amɛbatara mihiɛ.+
2 Kɛkɛ ni Yehowa kɛɛ mi akɛ:
3 “Gbɔmɔ bi,* hii nɛɛ ekpɛ mli akɛ amɛbaanyiɛ amɛmagai ni yɔɔ nyaŋemɔ* lɛ asɛɛ, ni amɛkɛ tɛmɔtɛ ema shi koni amɛkɛhã mɛi afee esha. Ani esa akɛ maŋmɛ amɛ gbɛ ni amɛbi nii kɛjɛ midɛŋ?+
4 No hewɔ lɛ, agbɛnɛ okɛ amɛ awie ni okɛɛ amɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Kɛ́ Israelnyo ko kpɛ mli akɛ ebaanyiɛ emagai ni yɔɔ nyaŋemɔ lɛ asɛɛ, ni ekɛ tɛmɔtɛ ko ma shi koni ehã mɛi afee esha, ni eba ebabi gbalɔ ko nii lɛ, mi, Yehowa mahã lɛ hetoo yɛ emagai babaoo ni yɔɔ nyaŋemɔ lɛ afalɛ naa.
5 Ejaakɛ mahã gbeyei ayi Israel shĩa lɛ tsuii amli obɔ* ejaakɛ amɛje misɛɛ ni amɛyanyiɛ amɛmagai ni yɔɔ nyaŋemɔ lɛ asɛɛ.”’+
6 “No hewɔ lɛ, kɛɛmɔ Israel shĩa lɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Nyɛkua nyɛsɛɛ nyɛbaa ni nyɛtsia nyɛhe kɛjea nyɛmagai ni yɔɔ nyaŋemɔ lɛ ahe ni nyɛjie nyɛhiɛ kɛje nyɛnifeemɔi ni yɔɔ nyaŋemɔ lɛ fɛɛ ahe.+
7 Ejaakɛ kɛ́ Israelnyo fɛɛ Israelnyo kɛ gbɔ fɛɛ gbɔ tsi ehe kɛje mihe ni ekpɛ mli akɛ ebaanyiɛ emagai ni yɔɔ nyaŋemɔ lɛ asɛɛ, ni ekɛ tɛmɔtɛ ma shi koni ehã mɛi afee esha, ni eba ebabi migbalɔ lɛ nii lɛ,+ no lɛ mi, Yehowa, mi diɛŋtsɛ mahã lɛ hetoo.
8 Majie mihiɛ maka nakai mɔ lɛ ni mahã etsɔ kɔkɔbɔɔ nɔ kɛ abɛbuu nɔ, ni mafo lɛ mashɛ mafɔ̃ kɛje mimaŋbii lɛ ateŋ;+ ni nyɛbaaná nyɛle akɛ miji Yehowa.”’
9 “‘Shi kɛ́ alaka gbalɔ lɛ ni ehã mɔ lɛ hetoo lɛ, no lɛ mi, Yehowa, miji mɔ ni laka nakai gbalɔ lɛ.+ Ni no lɛ, makpã minine mli mashi lɛ ni makpãtã ehiɛ kɛje mimaŋ, Israel teŋ.
10 Amɛbaatere amɛ diɛŋtsɛ amɛsɔ̃; sɔ̃ ni mɔ ni yabi nii lɛ baatere lɛ, no nɔŋŋ gbalɔ lɛ hu baatere,
11 koni no akahã Israel shĩa lɛ tsi amɛhe kɛje mihe dɔŋŋ, ni amɛkpa amɛnɔtɔmɔi lɛ fɛɛ ni amɛkɛbuleɔ amɛhe lɛ. Ni amɛbaatsɔmɔ mimaŋ, ni matsɔ amɛ-Nyɔŋmɔ,’+ Nuŋtsɔ Ofe Yehowa kɛɛ.”
12 Ni Yehowa kɛɛ mi ekoŋŋ akɛ:
13 “Gbɔmɔ bi,* kɛ́ shikpɔŋ ko yeee anɔkwa ni efee esha eshi mi lɛ, makpã minine mli mashi lɛ, ni mafo eniyenii sɛɛ,*+ ni matsu hɔmɔ kɛya nakai shikpɔŋ lɛ nɔ,+ ni mafo gbɔmɔ kɛ kooloo mashɛ mafɔ̃ kɛje nɔ.”+
14 “‘Kɛ́ hii etɛ nɛɛ—Noa,+ kɛ Daniel,+ kɛ Hiob+—yɛ nɔ po lɛ, amɛ diɛŋtsɛ amɛwala* pɛ amɛbaanyɛ amɛhere yɛ amɛjalɛ nifeemɔi lɛ ahewɔ,’+ Nuŋtsɔ Ofe Yehowa kɛɛ.”
15 “‘Kɛ́ mihã ŋa mli kooloi awuiyelɔi batsɔ shikpɔŋ lɛ nɔ kɛho ni amɛkpãtã enɔ bii lɛ ahiɛ,* ni amɛhã etsɔ shikpɔŋ ni kã shi efolo ni mɔ ko tsɔɔɔ nɔ kɛhooo yɛ ŋa mli kooloi lɛ ahewɔ lɛ,+
16 gbii abɔ ni mihiɛ kã nɛɛ,’ Nuŋtsɔ Ofe Yehowa kɛɛ, ‘kɛ́ hii etɛ nɛɛ yɛ nɔ po lɛ, amɛhereŋ amɛbihii loo amɛbiyei ayiwala; amɛ diɛŋtsɛ amɛwala pɛ amɛbaahere, ni shikpɔŋ lɛ baatsɔ amaŋfɔ.’”
17 “‘Kɛ́ mitsɛ klante kɛba nakai shikpɔŋ lɛ nɔ+ ni mikɛɛ akɛ: “Klante atsɔ shikpɔŋ lɛ nɔ kɛho,” ni efolɔ gbɔmɛi kɛ kooloi fɛɛ eshɛrɛ eshwie kɛje nɔ lɛ,+
18 kɛ́ hii etɛ nɛɛ yɛ nɔ po lɛ, gbii abɔ ni mihiɛ kã nɛɛ,’ Nuŋtsɔ Ofe Yehowa kɛɛ, ‘amɛhereŋ amɛbihii loo amɛbiyei ayiwala; amɛ diɛŋtsɛ amɛwala pɛ amɛbaahere.’”
19 “‘Kɛ́ mitsu tsɛŋemɔ hela ni gbeɔ mɔ kɛba nakai shikpɔŋ lɛ nɔ,+ ni mifɔse mimlifu lɛ mishwie nɔ kɛ lashishwiemɔ koni mafo gbɔmɔ kɛ kooloo fɛɛ mashɛ mafɔ̃ kɛje nɔ lɛ,
20 kɛ́ Noa,+ kɛ Daniel,+ kɛ Hiob+ yɛ nɔ po lɛ, gbii abɔ ni mihiɛ kã nɛɛ,’ Nuŋtsɔ Ofe Yehowa kɛɛ, ‘amɛnyɛŋ amɛbihii loo amɛbiyei ayiwala amɛhere; amɛ diɛŋtsɛ amɛwala* pɛ amɛbaanyɛ amɛhere yɛ amɛjalɛ nifeemɔi lɛ hewɔ.’”+
21 “Ejaakɛ nɔ ni Nuŋtsɔ Ofe Yehowa kɛɛ nɛ: ‘Nakai ebaaba lɛ kɛ́ mitsu mitoigbalamɔi ejwɛ*+—ni ji, klante, kɛ hɔmɔ, kɛ ŋa mli kooloi awuiyelɔi, kɛ tsɛŋemɔ hela ni gbeɔ mɔ+—kɛba Yerusalem nɔ koni mikɛfo gbɔmɔ kɛ kooloo mashɛ mafɔ̃ kɛje nɔ lɛ.+
22 Shi mɛi ni eshwɛ yɛ nɔ lɛ ekomɛi baaye amɛhe ni akɛ amɛ baaje kpo,+ bihii kɛ biyei fɛɛ. Amɛmiiba nyɛŋɔɔ, ni kɛ́ nyɛna amɛgbɛi kɛ amɛnifeemɔi lɛ, bɔ fɛɛ bɔ ni fee lɛ no baashɛje nyɛmii yɛ sane fɔŋ ni mikɛba Yerusalem nɔ lɛ he, nɔ fɛɛ nɔ ni mifee lɛ lɛ.’”
23 “‘Kɛ́ nyɛna amɛgbɛi kɛ amɛnifeemɔi lɛ, nomɛi baashɛje nyɛmii, ni nyɛbaana akɛ miteee shi kɛkɛ mifeee amɛ bɔ ni mifee amɛ nɛɛ,’+ Nuŋtsɔ Ofe Yehowa kɛɛ.”
Shishigbɛ Niŋmaa
^ Hebri sht. ŋm., “binuu.”
^ Hebri wiemɔ ni akɛtsu nii yɛ biɛ lɛ kɛ wiemɔ ko ni amɛkɛtsɛɔ “fei” lɛ yɛ tsakpaa, ni akɛtsuɔ nii kɛgbeɔ nii ahe guɔ.
^ Hebri sht. ŋm., “Ejaakɛ mamɔ Israel shĩa lɛ yɛ amɛtsui mli.”
^ Hebri sht. ŋm., “binuu.”
^ Hebri sht. ŋm., “makumɔ eblodo tsei.” Eeenyɛ efee akɛ, ekɔɔ tsei ni akɛ blodo tsotsoroɔ nɔ lɛ ahe.
^ Loo “amɛsusuma.”
^ Loo “amɛgbe gbekɛbii ni yɔɔ nɔ.”
^ Loo “amɛsusuma.”
^ Loo “mikojomɔi ejwɛ ni yeɔ awui.”
