Ezra 6:1-22
6 Kɛkɛ ni Maŋtsɛ Dario fã ni amɛyatao nii amli yɛ woji ashĩa lɛ, ni ji he ni akɛ jwetrii toɔ yɛ Babilon lɛ.
2 Ni ana wolokpo ko yɛ mɔɔ ni yɔɔ Ekbatana yɛ Media kpokpaa lɛ nɔ lɛ mli, ni aŋma sane ni nyiɛ sɛɛ nɛɛ yɛ mli:
3 “Yɛ Maŋtsɛ Koresh nɔyeli afi ni ji klɛŋklɛŋ lɛ nɔ lɛ, Maŋtsɛ Koresh wo kitã yɛ Nyɔŋmɔ shĩa ni yɔɔ Yerusalem lɛ he+ akɛ: ‘Amɛma shĩa lɛ ekoŋŋ akɛ he ni amɛbaashã afɔlei yɛ, ni amɛtswa efaneshii lɛ; ekwɔlɛ afee ninetalɔi 60,* ni elɛɛmɔ afee ninetalɔi 60,+
4 ni amɛkɛ tɛi wuji ni eko kã eko nɔ nɔkwɔlɛi etɛ kɛ tsei nɔkwɔlɛ kome atswa;+ ni ajɛ maŋtsɛ shĩa lɛ awo nyɔmɔ fɛɛ ni abaabɔ lɛ.+
5 Agbɛnɛ hu, amɛkɛ Nyɔŋmɔ shĩa lɛ shika tsuru kɛ jwiɛtɛi nibii ni Nebukadnezar yaloo yɛ sɔlemɔ shĩa ni yɔɔ Yerusalem lɛ mli kɛba Babilon+ lɛ aku sɛɛ aya, koni akɛyawo amɛtoohe yɛ sɔlemɔ shĩa ni yɔɔ Yerusalem lɛ mli yɛ Nyɔŋmɔ shĩa lɛ.’+
6 “No hewɔ lɛ, bo Tatenai, ni ji amralo ni kwɛɔ kpokpaa ni yɔɔ Faa Lɛ Sɛɛ* lɛ nɔ, kɛ Shetar-bozenai, kɛ nyɛnanemɛi, amralofoi bibii ni kwɛɔ kpokpaa ni yɔɔ Faa Lɛ Sɛɛ+ lɛ nɔ lɛ, nyɛtsia nyɛhe yɛ jɛmɛ.
7 Nyɛkatsĩa Nyɔŋmɔ shĩa lɛ he nitsumɔ lɛ naa. Yudafoi lɛ amralo lɛ kɛ Yudafoi lɛ ateŋ onukpai lɛ baama Nyɔŋmɔ shĩa lɛ ekoŋŋ yɛ he ni eyɔɔ tsutsu lɛ.
8 Agbɛnɛ hu, miiwo nyɛ kitã yɛ nɔ ni nyɛfee nyɛhã Yudafoi lɛ ateŋ onukpai ni maa Nyɔŋmɔ shĩa lɛ ekoŋŋ lɛ he akɛ: Nyɛjɛa maŋtsɛ jwetritoohe lɛ,+ ni ji too fɛɛ ni awoɔ yɛ kpokpaa ni yɔɔ Faa Lɛ Sɛɛ lɛ nɔ lɛ mli nyɛwoa nyɔmɔ fɛɛ ni hii nɛɛ bɔɔ lɛ oya nɔŋŋ koni nɔ ko nɔ ko akatsĩ nitsumɔ lɛ naa.+
9 Ni nɔ fɛɛ nɔ ni he baahia amɛ, tsinahii,+ loo gwantɛŋhii,+ loo gwantɛŋbii+ ni akɛbaashã shãa afɔlei ahã ŋwɛi Nyɔŋmɔ lɛ jio, wiiti+ jio, ŋoo+ jio, wain+ jio, mu+ jio, nɔ fɛɛ nɔ ni osɔfoi ni yɔɔ Yerusalem lɛ baabi lɛ, nyɛkɛhãa amɛ daa gbi ni nyɛkakpaa,
10 bɔ ni afee ni amɛya nɔ amɛshã afɔlei ni saa ŋwɛi Nyɔŋmɔ lɛ hiɛ ni amɛsɔle ni maŋtsɛ lɛ kɛ ebihii lɛ ayi aná wala.+
11 Miiwo kitã hu akɛ, mɔ fɛɛ mɔ ni booo famɔ nɛɛ toi lɛ, ajie eshĩa lɛ he tso kome ni awó lɛ kɛya ŋwɛi ni asɛŋ lɛ yɛ he,* ni akɛ eshĩa lɛ afee he ko ni ayaa tiafi yɛ,* yɛ nɔ ni efee lɛ hewɔ.
12 Ni Nyɔŋmɔ ni kɛ egbɛ́i eto jɛmɛ+ lɛ akpa maŋtsɛ fɛɛ maŋtsɛ, ni ebutu maŋ fɛɛ maŋ ni baawó enine nɔ eshi famɔ nɛɛ ni ekpãtã Nyɔŋmɔ shĩa ni yɔɔ Yerusalem lɛ hiɛ lɛ. Mi, Dario, mi, mikɛ famɔ nɛɛ hãa. Akɛtsu nii amrɔ nɔŋŋ.”
13 Kɛkɛ ni Tatenai, ni ji amralo ni kwɛɔ kpokpaa ni yɔɔ Faa Lɛ Sɛɛ lɛ nɔ lɛ, kɛ Shetar-bozenai,+ kɛ amɛnanemɛi lɛ fee nɔ fɛɛ nɔ ni Maŋtsɛ Dario fã lɛ oya nɔŋŋ.
14 Yudafoi lɛ ateŋ onukpai lɛ tee nɔ amɛma shĩa lɛ ni nitsumɔ lɛ tee nɔ,+ ni gbalɔ Hagai+ kɛ Zakaria,+ Ido nabi lɛ gbalɛ lɛ wo amɛ hewalɛ; amɛgbe shĩa lɛ maa naa yɛ Israel Nyɔŋmɔ lɛ famɔ naa,+ kɛ agbɛnɛ hu yɛ Koresh kɛ Dario+ kɛ Persia maŋtsɛ Artashasta+ famɔ naa.+
15 Amɛgbe shĩa lɛ maa naa yɛ Adar* nyɔɔŋ lɛ nɔ gbi ni ji etɛ lɛ nɔ yɛ Maŋtsɛ Dario nɔyeli afi ni ji ekpaa lɛ mli.
16 Kɛkɛ ni Israelbii lɛ, kɛ osɔfoi lɛ, kɛ Levibii lɛ,+ kɛ mɛi krokomɛi ni ejɛ nomŋɔɔ mli amɛba lɛ gbele Nyɔŋmɔ shĩa lɛ naa* kɛ miishɛɛ.
17 Ni amɛkɛ tsinahii 100, kɛ gwantɛŋhii 200, kɛ gwantɛŋbii 400 gbele Nyɔŋmɔ shĩa nɛɛ naa, ni amɛkɛ abotiahii 12 shã esha afɔle amɛhã Israel fɛɛ yɛ Israel wekui lɛ ayibɔ lɛ naa.+
18 Ni amɛto osɔfoi lɛ anaa yɛ amɛkui lɛ anaa kɛ Levibii lɛ hu yɛ amɛkui lɛ anaa koni amɛtsu Nyɔŋmɔ sɔɔmɔ nitsumɔ lɛ yɛ Yerusalem,+ tamɔ bɔ ni aŋma yɛ Mose wolo lɛ mli akɛ afee lɛ.+
19 Ni mɛi ni ejɛ nomŋɔɔ mli kɛba lɛ ye Hehoo lɛ yɛ klɛŋklɛŋ nyɔɔŋ lɛ nɔ gbi ni ji 14 lɛ nɔ.+
20 Ni akɛni osɔfoi lɛ kɛ Levibii lɛ fɛɛ efee amɛhe krɔŋkrɔŋ hewɔ lɛ,+ no mli lɛ amɛ fɛɛ amɛhe tse; amɛgbe kooloo ni akɛbaaye Hehoo lɛ amɛhã mɛi fɛɛ ni ejɛ nomŋɔɔ mli kɛba lɛ, kɛ amɛnyɛmimɛi osɔfoi lɛ, kɛ amɛ diɛŋtsɛ hu.
21 Ni Israelbii ni ejɛ nomŋɔɔ mli kɛba lɛ kɛ mɛi fɛɛ ni ebafata amɛhe, ni amɛtse amɛhe kɛje jeŋmaji ni yɔɔ shikpɔŋ lɛ nɔ lɛ amuji nii lɛ ahe koni amɛbajá Yehowa, Israel Nyɔŋmɔ lɛ,* ye kooloo ni agbe lɛ eko.+
22 Agbɛnɛ hu, amɛkɛ miishɛɛ ye Blodo Ni Ashikishaŋ-sha* Bɛ Mli Gbi Jurɔ+ lɛ gbii kpawo, ejaakɛ Yehowa hã amɛnya ni ehã Asiria maŋtsɛ lɛ ná amɛhe miishɛɛ,*+ no hewɔ lɛ, maŋtsɛ lɛ ye ebua amɛ* yɛ anɔkwa Nyɔŋmɔ lɛ, ni ji Israel Nyɔŋmɔ lɛ shĩa lɛ he nitsumɔ lɛ mli.
Shishigbɛ Niŋmaa
^ Aaafee mitai 26.7 (nanetalɔi 87.6). Kwɛmɔ Saji Krokomɛi B14 lɛ.
^ Loo “Yufrate Faa Lɛ Sɛɛ.”
^ Loo “ni akɛ tso lɛ atsu emli kɛsɛŋ shi.”
^ Shishitsɔɔmɔi komɛi kɛɔ akɛ, “ni ahã eshĩa lɛ atsɔ tumo; bɔɔla.”
^ Kwɛmɔ Saji Krokomɛi B15 lɛ.
^ Loo “jɔɔ Nyɔŋmɔ shĩa lɛ nɔ.”
^ Loo “koni amɛbatao Yehowa, Israel Nyɔŋmɔ lɛ sɛɛ gbɛ lɛ.”
^ Kwɛmɔ Wiemɔi Titrii Amligbalamɔ lɛ.
^ Loo “ehã Asiria Maŋtsɛ lɛ tsui mɔ amɛ.”
^ Aramaik sht. ŋm., “wo amɛnijiaŋ hewalɛ.”
