Akɛmaje Filemon 1:1-25
1 Paulo, mɔ ni awo lɛ tsuŋ+ yɛ Kristo Yesu hewɔ, kɛ wɔnyɛmi Timoteo,+ kɛ wolo nɛɛ miimaje Filemon, wɔnaanyo nitsulɔ ni wɔsumɔɔ lɛ lɛ,
2 kɛ Apia, wɔnyɛmi yoo lɛ, kɛ Arkipo,+ wɔnaanyo asraafonyo lɛ, kɛ asafo ni yɔɔ oshĩa lɛ mli lɛ:+
3 Dromɔ kɛ toiŋjɔlɛ ni jɛ Nyɔŋmɔ, wɔ-Tsɛ lɛ, kɛ Nuŋtsɔ Yesu Kristo dɛŋ lɛ ahã nyɛ.
4 Be fɛɛ be ni mitsĩɔ otã yɛ misɔlemɔi amli lɛ, midaa mi-Nyɔŋmɔ lɛ shi,+
5 akɛni minuɔ ohemɔkɛyeli lɛ kɛ suɔmɔ ni oyɔɔ kɛhã Nuŋtsɔ Yesu* kɛ agbɛnɛ hu kɛhã mɛi krɔŋkrɔŋi lɛ fɛɛ* lɛ he daa lɛ hewɔ.
6 Misɔlemɔ ji akɛ, gbɛfaŋnɔ ni onáa yɛ hemɔkɛyeli lɛ mli lɛ baatsirɛ bo koni oyɔse nɔ kpakpa fɛɛ nɔ kpakpa ni wɔtsɔɔ Kristo nɔ wɔnáa lɛ.
7 Ejaakɛ be ni minu osuɔmɔ lɛ he lɛ, minyɛmi nuu, miná miishɛɛ kɛ miishɛjemɔ babaoo, akɛni atsɔ onɔ ahã mɛi krɔŋkrɔŋi lɛ atsuii enyɔ amɛmli lɛ hewɔ.
8 Enɛ nɔŋŋ hewɔ lɛ, eyɛ mli akɛ manyɛ mawie kɛ nɔmimaa babaoo yɛ Kristo mli ni mikɛfã bo koni ofee nɔ ni sa moŋ,
9 shi mikɛ suɔmɔ moŋ miikpa bo fai, mi Paulo, kwɛmɔ bɔ ni miyɔɔ nɛɛ, nuu onukpa, hɛɛ, amrɔ nɛɛ hu po lɛ, awo mi tsuŋ yɛ Kristo Yesu hewɔ.
10 Miikpa bo fai miihã mibi Onesimo,+ mɔ ni mibatsɔ epapa+ be ni miyɔɔ tsuŋwoo mli* lɛ.
11 Tsutsu ko lɛ, ehe bɛ sɛɛnamɔ kɛhã bo, shi amrɔ nɛɛ ehe yɛ sɛɛnamɔ kɛhã bo, kɛ mi hu.
12 Miiwo lɛ gbɛ ni esaa eba oŋɔɔ, hɛɛ, lɛ, ni ji mi diɛŋtsɛ mitsui lɛ.
13 Kulɛ masumɔ ni mahã ehi mimasɛi yɛ biɛ koni esɔmɔ mi yɛ onajiaŋ be mli ni awo mi tsuŋ yɛ sane kpakpa lɛ hewɔ nɛɛ.+
14 Shi misumɔɔɔ ni mafee nɔ ko ni okpɛlɛko nɔ, koni ekpakpa ni obaafee lɛ akafee yɛ nɔnyɛɛ naa, shi moŋ ojɛ bo diɛŋtsɛ osuɔmɔ mli ofee.+
15 Ekolɛ enɛ tuuntu hewɔ ni etse ehe be fioo* lɛ, koni oná lɛ ekoŋŋ ni ehi oŋɔɔ daa,
16 jeee akɛ nyɔŋ dɔŋŋ,+ shi moŋ akɛ mɔ ni fe nyɔŋ, akɛ nyɛmi ni asumɔɔ,+ titri lɛ yɛ migbɛfaŋ, shi yɛ bo ogbɛfaŋ lɛ, ebaafee mɔ ni fe nakai kwraa yɛ heloo mli kɛ agbɛnɛ hu, yɛ Nuŋtsɔ lɛ mli.
17 No hewɔ lɛ, kɛ́ obuɔ mi akɛ onaanyo* lɛ, heremɔ lɛ hiɛmɛɛ tamɔ bɔ ni obaahere mi lɛ nɔŋŋ.
18 Agbɛnɛ hu, kɛ́ ehã nɔ ko eŋmɛɛ bo, loo ehiɛ bo nyɔmɔ ko lɛ, no lɛ buu nakai nyɔmɔ lɛ akɛ mi minyɔmɔ.
19 Mi Paulo, mikɛ mi diɛŋtsɛ minine miiŋma akɛ: Mawo nakai nyɔmɔ lɛ—ehe ehiaaa ni makɛɛ bo akɛ, bo diɛŋtsɛ po lɛ ohiɛ mi oyi nyɔmɔ.
20 Hɛɛ, nyɛmi nuu, hã minine ashɛ yelikɛbuamɔ nɛɛ nɔ kɛjɛ odɛŋ yɛ Nuŋtsɔ lɛ mli; hã mitsui anyɔ mimli yɛ Kristo mli.
21 Miyɛ nɔmimaa akɛ obaabo toi, no hewɔ lɛ miiŋma bo, ejaakɛ mile akɛ obaafee fe bɔ ni mikɛɔ lɛ po.
22 Shi kɛfata he lɛ, saamɔ he ko oto mi ni mabahi jɛmɛ, ejaakɛ mihiɛ kã nɔ akɛ abaatsɔ nyɛsɔlemɔi lɛ anɔ akɛ mi ahã nyɛ ekoŋŋ.*+
23 Epafra,+ mɔ ni awo lɛ tsuŋ afata mihe yɛ Kristo Yesu mli lɛ miiŋa bo,
24 ni Marko, kɛ Aristarko,+ kɛ Dema,+ kɛ Luka,+ minanemɛi nitsulɔi lɛ hu miiŋa bo.
25 Nuŋtsɔ Yesu Kristo dromɔ lɛ kɛ mumɔ ni nyɛjieɔ lɛ kpo lɛ ahia shi.
Shishigbɛ Niŋmaa
^ Loo “yɛ Nuŋtsɔ Yesu gbɛfaŋ.”
^ Loo “yɛ mɛi krɔŋkrɔŋi lɛ fɛɛ agbɛfaŋ.”
^ Greek sht. ŋm., “gboklɛi lɛ amli.”
^ Greek sht. ŋm., “etse ehe ŋmɛlɛtswaa kome.”
^ Greek sht. ŋm., “mɔ ni okɛ lɛ náa nɔ kome mli gbɛfaŋnɔ.”
^ Loo “aŋmɛɛ mihe ahã nyɛ.”
