Wolo Ni Akɛmaje Filipibii Lɛ 4:1-23
4 No hewɔ lɛ, minyɛmimɛi ni misumɔɔ ni mishweɔ hu, mimiishɛɛ kɛ mikekere,+ nyɛdamɔa shi shiŋŋ+ yɛ nɛkɛ gbɛ nɔ yɛ Nuŋtsɔ lɛ mli, nyɛ mɛi ni misumɔɔ.
2 Miiwo Evodia hewalɛ, ni miiwo Sintika hu hewalɛ akɛ amɛjwɛŋmɔ afee ekome yɛ Nuŋtsɔ lɛ mli.+
3 Hɛɛ, bo hu miikpa bo fai, akɛ naanyo nitsulɔ kpakpa,* akɛ oya nɔ oye obua yei nɛɛ ni kɛ mi kɛ Klemente, kɛ agbɛnɛ hu, minanemɛi nitsulɔi ni eshwɛ ni amɛgbɛ́ii yɔɔ wala wolo lɛ mli lɛ fee ekome ni bɔ amɛhe mɔdɛŋ waa* kɛhã sane kpakpa lɛ.+
4 Nyɛmii ashɛa nyɛhe jogbaŋŋ yɛ Nuŋtsɔ lɛ mli be fɛɛ be. Miikɛɛ ekoŋŋ akɛ, Nyɛmii ashɛa nyɛhe jogbaŋŋ!+
5 Nyɛhãa gbɔmɛi fɛɛ alea nyɛniiashishinumɔ*+ lɛ. Nuŋtsɔ lɛ ebɛŋkɛ.*
6 Nyɛkayea nyɛtsui yɛ nɔ ko nɔ ko he,+ shi moŋ yɛ nɔ fɛɛ nɔ mli lɛ, nyɛtsɔa sɔlemɔ, kɛ fai ni akɛ hiɛdɔɔ kpaa, kɛ shidaa nɔ nyɛhãa Nyɔŋmɔ alea nyɛnibimɔi lɛ;+
7 ni Nyɔŋmɔ toiŋjɔlɛ+ ni fe niiashishinumɔi fɛɛ lɛ baatsɔ Kristo Yesu nɔ abu nyɛtsuii+ kɛ nyɛjwɛŋmɔi* ahe.
8 Naagbee lɛ, nyɛmimɛi, nɔ fɛɛ nɔ ni ji anɔkwale, nɔ fɛɛ nɔ ni sa woo, nɔ fɛɛ nɔ ni ja, nɔ fɛɛ nɔ ni he tse,* nɔ fɛɛ nɔ ni hãa ajieɔ suɔmɔ kpo, nɔ fɛɛ nɔ ni awieɔ he ekpakpa, nɔ fɛɛ nɔ ni hi jogbaŋŋ, kɛ nɔ fɛɛ nɔ ni sa yijiemɔ lɛ, nyɛyaa nɔ nyɛsusua enɛɛmɛi ahe.*+
9 Nibii ni nyɛkase ni nyɛkpɛlɛ nɔ, ni nyɛnu ni nyɛna yɛ mihe lɛ, nomɛi nyɛfea,+ ni toiŋjɔlɛ Nyɔŋmɔ lɛ kɛ nyɛ baahi shi.
10 Miná miishɛɛ babaoo yɛ Nuŋtsɔ lɛ mli, akɛ agbɛnɛ, nyɛmiisusu mihe ekoŋŋ.+ Eyɛ mli akɛ no mli lɛ nyɛsusuɔ mihe moŋ, shi nyɛyanáaa hegbɛ kɛtsɔɔ nakai.
11 Jeee hiamɔ ni ehia mi hewɔ miwieɔ enɛ, ejaakɛ mi lɛ, mikase akɛ mahã mimii ashɛ nii ni miyɔɔ lɛ ahe, ekɔɔɔ he eko shihilɛ mli ni miyɔɔ.+
12 Mile bɔ ni ahiɔ shi yɛ ohia mli,+ ni mile bɔ ni ahiɔ shi yɛ ninámɔ babaoo hu mli. Mikase nɔ ko ni mɛi pii leee;* shihilɛ fɛɛ shihilɛ mli loo yɛ nɔ fɛɛ nɔ mli lɛ, tɔɔ mli jio, hɔmɔ mli jio, ninámɔ babaoo mli jio, ohia mli jio lɛ, mimii shɛɔ nii ni miyɔɔ lɛ ahe.
13 Yɛ nɔ fɛɛ nɔ mli lɛ, mitsɔɔ mɔ ni wajeɔ mi lɛ nɔ mináa hewalɛ.+
14 Shi nyɛfee jogbaŋŋ akɛ nyɛkɛ mi ná gbɛfaŋnɔ yɛ mimanehulu lɛ mli.
15 Anɔkwa, nyɛ Filipibii lɛ diɛŋtsɛ hu nyɛle akɛ, be ni nyɛkase sane kpakpa lɛ klɛŋklɛŋ kwraa lɛ sɛɛ, be ni mishi Makedonia lɛ, asafo ko bɛ ni ye ebua mi loo ehã miye mibua lɛ, akɛ ja nyɛ pɛ;+
16 ejaakɛ be ni miyɔɔ Tesalonika lɛ, nyɛtsu ni abahã mi mihiamɔ nii, jeee shi kome kɛkɛ, shi shii enyɔ.
17 Jeee akɛ miitao nikeenii, shi moŋ miitao jɔɔmɔi ni baahã nyɛkotoku lɛ mli atsii fe tsutsu lɛ.
18 Shi miyɛ nɔ fɛɛ nɔ ni he hiaa mi, ni eteke nɔ po. Amrɔ nɛɛ, miná nɔ fɛɛ nɔ ni mitaoɔ, ejaakɛ minine eshɛ nɔ ni nyɛkɛmaje Epafrodito+ kɛbahã mi lɛ nɔ, nii ni jeɔ ŋma jogbaŋŋ,+ afɔle ni Nyɔŋmɔ náa he miishɛɛ, ni sa ehiɛ jogbaŋŋ lɛ.
19 Mi-Nyɔŋmɔ lɛ hu baatsɔ Kristo Yesu nɔ ehã nyɛ nɔ ni he hiaa nyɛ lɛ fɛɛ+ kɛwula shi yɛ enunyam babaoo lɛ naa.
20 Agbɛnɛ, wɔ-Nyɔŋmɔ kɛ wɔ-Tsɛ lɛ ji mɔ ni akɛ anunyam ahã kɛya naanɔi anaanɔ. Amen.
21 Nyɛŋaa mɔ krɔŋkrɔŋ fɛɛ mɔ krɔŋkrɔŋ ni kɛ Kristo Yesu efee ekome lɛ nyɛhãa mi. Nyɛmimɛi ni kɛ mi yɔɔ lɛ hu miiŋa nyɛ.
22 Mɛi krɔŋkrɔŋi lɛ fɛɛ, shi titri lɛ, Kaisare shĩabii+ lɛ miiŋa nyɛ.
23 Nuŋtsɔ Yesu Kristo dromɔ lɛ kɛ mumɔ ni nyɛjieɔ lɛ kpo lɛ ahia shi.
Shishigbɛ Niŋmaa
^ Greek sht. ŋm., “naanyo kpakpa ni mikɛyɔɔ kɔɔŋtso kome shishi.”
^ Loo “ni mia amɛhiɛ waa.”
^ Greek sht. ŋm., “nyɛsaneheŋmɛɛmɔ; nyɛtswãafeemɔ.”
^ Loo “Nuŋtsɔ lɛ yɛ nyɛmasɛi.”
^ Loo “nyɛsusumɔi.”
^ Loo “ni yɔɔ krɔŋŋ.”
^ Loo “nyɛjwɛŋa enɛɛmɛi ahe; nyɛjwɛŋa enɛɛmɛi anɔ.”
^ Loo “Mikase teemɔŋ sane ko.”
