Wolo Ni Akɛmaje Galatiabii Lɛ 6:1-18
6 Nyɛmimɛi, kɛji mɔ ko kɔ gbɛ ko ni ejaaa ní eleee po lɛ, nyɛ mɛi ni mumɔ lɛ tsɔɔ nyɛ gbɛ* lɛ, nyɛbɔa mɔdɛŋ nyɛjajea nakai mɔ lɛ yɛ mlijɔlɛ mumɔ mli.+ Shi nyɛteŋ mɔ fɛɛ mɔ ahã ehiɛ ahi lɛ diɛŋtsɛ ehe nɔ,+ koni akaka lɛ hu.+
2 Nyɛyaa nɔ nyɛkpeekpea nyɛhe kɛterea nyɛjatsui ni tsiitsii lɛ,+ ni nɛkɛ gbɛ nɔ nyɛbaatsɔ nyɛwo Kristo lɛ mla lɛ obɔ.+
3 Ejaakɛ kɛji gbɔmɔ ko susuɔ akɛ mɔ ko ji lɛ be ni ejeee mɔ ko lɛ,+ eelaka ehe.
4 Shi mɔ fɛɛ mɔ apɛi enifeemɔi amli ekwɛ,+ kɛkɛ lɛ ebaana nɔ ko yɛ lɛ diɛŋtsɛ ehe ni baahã emii ashɛ ehe, shi jeee ni ekɛ ehe baato mɔ kroko he.+
5 Ejaakɛ mɔ fɛɛ mɔ baatere lɛ diɛŋtsɛ ejatsu.*+
6 Agbɛnɛ hu, mɔ fɛɛ mɔ ni aatsɔɔ lɛ* Nyɔŋmɔ wiemɔ lɛ, ekɛ mɔ ni tsɔɔ lɛ nɛkɛ nibii nɛɛ* aná nibii kpakpai fɛɛ amli gbɛfaŋnɔ.+
7 Nyɛkalakaa nyɛhe: Nyɔŋmɔ jeee mɔ ni aliɔ lɛ. Ejaakɛ nɔ fɛɛ nɔ ni gbɔmɔ duɔ lɛ, no nɔŋŋ ebaakpa hu;+
8 ejaakɛ mɔ ni duɔ nii ehãa eheloo lɛ baakpa fitemɔ kɛjɛ eheloo lɛ mli, shi mɔ ni duɔ nii ehãa mumɔ lɛ baakpa naanɔ wala kɛjɛ mumɔ lɛ mli.+
9 No hewɔ lɛ, nyɛkahãa ekpakpafeemɔ miitɔa wɔ, ejaakɛ kɛ́ efeemɔ etɔɔɔ wɔ lɛ,* wɔbaakpa eyibii yɛ be ni sa mli.+
10 No hewɔ lɛ, gbii abɔ ni wɔyɔɔ hegbɛ* nɛɛ, nyɛhãa wɔfea mɛi fɛɛ ekpakpa, shi titri lɛ, mɛi ni etsɔmɔ wɔwekumɛi yɛ hemɔkɛyeli lɛ mli lɛ.
11 Nyɛkwɛa niŋmaa okadii agboi ni mikɛ mi diɛŋtsɛ minine eŋma nyɛ.
12 Mɛi fɛɛ ni taoɔ akɛ amɛhiɛ aba nyam yɛ heloo lɛ mli* lɛ ji mɛi ni bɔɔ mɔdɛŋ akɛ amɛnyɛ nyɛnɔ ni nyɛhã afolɔ nyɛ ketia lɛ, ni nɔ titri hewɔ ni amɛfeɔ nakai ji koni akawa amɛ yi yɛ Kristo lɛ piŋmɔ tso* lɛ hewɔ.
13 Ejaakɛ mɛi ni afolɔɔ amɛ ketia lɛ diɛŋtsɛ po yeee Mla lɛ nɔ,+ shi amɛmiitao ni afolɔ nyɛ ketia koni amɛná nɔ ko amɛdamɔ nɔ amɛkɛ nyɛheloo lɛ ashwã.
14 Shi mi lɛ, ekaba kɔkɔɔkɔ akɛ mashwã, ja yɛ wɔ-Nuŋtsɔ Yesu Kristo piŋmɔ tso* lɛ he kɛkɛ,+ mɔ ni atsɔ enɔ agbe je lɛ* yɛ migbɛfaŋ, ni agbe mi hu yɛ je lɛ gbɛfaŋ lɛ.
15 Ejaakɛ ketiafoo jeee nɔ ko, ni ketia ni afoko hu jeee nɔ ko,+ shi bɔɔ nɔ hee ji nɔ ko.+
16 Shi mɛi fɛɛ ni nyiɛɔ jogbaŋŋ yɛ jeŋba he mla nɛɛ naa lɛ, toiŋjɔlɛ kɛ mɔbɔnalɛ aba amɛnɔ, hɛɛ, aba Nyɔŋmɔ Israel lɛ nɔ.+
17 Kɛjɛ be nɛɛ nɔ kɛyaa lɛ, mɔ ko mɔ ko akagba minaa dɔŋŋ, ejaakɛ gbɛ̃i yɛ migbɔmɔtso he ni kadiɔ mi akɛ Yesu nyɔŋ.+
18 Nyɛmimɛi, wɔ-Nuŋtsɔ Yesu Kristo dromɔ lɛ kɛ mumɔ ni nyɛjieɔ lɛ kpo lɛ ahi shi. Amen.
Shishigbɛ Niŋmaa
^ Greek sht. ŋm., “nyɛ mɛi ni nyɛji mumɔŋ gbɔmɛi.”
^ Loo “ejatsu ni ji esɔ̃.”
^ Loo “akɛ naabu miitsɔɔ lɛ.”
^ Loo “mɔ ni kɛ enaabu tsɔɔ lɛ nɛkɛ nibii nɛɛ.”
^ Loo “kɛ́ wɔkpaaa feemɔ lɛ.”
^ Greek sht. ŋm., “be ni ato.”
^ Loo “mɛi ni miitao amɛsa mɛi ahiɛ yɛ kponɔgbɛ.”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Loo “agbe je lɛ yɛ tso jaŋŋ lɛ nɔ.”
