Habakuk 2:1-20
2 Maya nɔ madamɔ mibuuhe lɛ,+Ni madamɔ kpoku ni atswa lɛ nɔ.
Maya nɔ mabu ní makwɛ nɔ ni ebaatsɔ minɔ ewieKɛ hetoo ní mahã kɛji ajaje mi.
2 Kɛkɛ ni Yehowa hã mi hetoo akɛ:
“Ŋmaa ninaa lɛ ofɔ̃ shi, ní okpɛ́ yɛ taoi anɔ ni ana lɛ faŋŋ,+Koni ekanemɔ afee mlɛo kɛhã mɔ ni kaneɔ lɛ waa lɛ.*+
3 Ejaakɛ ninaa lɛ yɛ hã ebe ni ato lɛ kɛ̃,Ni eeye oyai ní eyashɛ enaagbee,* ni emaleŋ.
Kɛ́ esɛɛ gbala shi* po lɛ, yaa nɔ omɛ lɛ!*+
Ejaakɛ bɔ fɛɛ bɔ ni fee lɛ, ebaaba mli.
Ekpeŋ sɛɛ!
4 Kwɛmɔ mɔ ni wóɔ ehe nɔ lɛ;*Ejaaa yɛ etsui mli.
Shi jalɔ lɛ, ebaaya nɔ ehi shi yɛ enɔkwayeli* lɛ hewɔ.+
5 Anɔkwa, akɛni wain lakaa mɔ hewɔ lɛ,Nuu henɔwolɔ lɛ shɛŋ oti ni ma ehiɛ lɛ he.
Eyeɔ ŋmaa waa* tamɔ Gbonyobu;*Etamɔ gbele, ni etɔɔɔ.
Eyaa nɔ ebuaa jeŋmaji lɛ fɛɛ anaaNi ebuaa majimaji lɛ fɛɛ anaa ehãa ehe.+
6 Ani mɛnɛɛmɛi fɛɛ ebuŋ abɛ, amɛwieŋ kasaŋtswi, ni amɛgbáŋ ajenui amɛshiŋ lɛ?+
Amɛbaakɛɛ akɛ:
‘Kpoo hã mɔ ni buaa nii ni jeee enɔ lɛ anaaNí ehãa enyɔmɔ lɛ daa lɛ!—Mɛɛ beyinɔ nɔŋŋ ebaafee enɛ kɛyashi?
7 Ani mɛi ni ohiɛ amɛ nyɔmɔ lɛ eteŋ shi trukaa?
Amɛbaate shi, ni amɛbaahoso bo gidigidi,Ni obaatsɔ ta mli nii ni amɛbaaloo.+
8 Akɛni oha jeŋmaji babaoo anii hewɔ lɛ,Majimaji fɛɛ ni eshwɛ lɛ baaha bo,+Ejaakɛ oshwie mɛi alá shi,Ni owa shikpɔŋ lɛKɛ maji kɛ amɛmli bii lɛ ayi.+
9 Kpoo hã mɔ ni taoɔ sɛɛnamɔ fɔŋ ehãa eshĩa,Bɔ ni afee ni eyafee etsũ yɛ ŋwɛi shɔŋŋ,Koni ekɛje amanehulu dɛŋ lɛ!
10 Otsɔ ŋaa ni kɛ hiɛgbele baaba oshĩa lɛ nɔ.
Akɛni okpãtã majimaji babaoo ahiɛ hewɔ lɛ, ofee esha oshi bo diɛŋtsɛ ohe.*+
11 Ejaakɛ tɛ baabo kɛaajɛ gbogbo lɛ mli,Ni mplaŋ baahere nɔ kɛaajɛ tsuyiteŋ tsei lɛ ateŋ.
12 Kpoo hã mɔ ni kɛ lashishwiemɔ tswaa maŋNí ekɛ nii ni ejaaa toɔ maŋ lɛ!
13 Naa! Ani jeee Yehowa, taiatsɛ lɛ, hãa majimaji tsuɔ nii waa amɛhãa la,Ni jeŋmaji gboɔ deŋme efolo?+
14 Ejaakɛ Yehowa anunyam lɛ he nilee lɛ baayi shikpɔŋ lɛ nɔ obɔTamɔ bɔ ni nui ha ŋshɔ lɛ nɔ lɛ.+
15 Kpoo hã mɔ ni hãa enanemɛi nɔ ko amɛnuɔ,Ní ekɛ mlila kɛ mlifu futuɔ mli koni amɛtɔrɔ dãa,Bɔ ni afee ni ekwɛ amɛyayaiaŋ lɛ!
16 Obaayi tɔ kɛ hiɛgbele, moŋ fe hiɛnyam.
Bo hu—nuu eko, ní ohã ana akɛ afoko bo ketia.*
Kɔɔpoo ni yɔɔ Yehowa ninejurɔ lɛ baabashɛ oŋɔɔ,+Ni hiɛshishwiemɔ baaha ohiɛnyam lɛ nɔ;
17 Ejaakɛ awui ni oye Lebanon lɛ baaha onɔ,Ni hiɛkpatamɔ ni wo kooloi lɛ ahe gbeyei lɛ baaba onɔ,Ejaakɛ oshwie mɛi alá shi,Ni owa shikpɔŋ lɛKɛ maji kɛ amɛmli bii lɛ ayi.+
18 Kɛji amagafeelɔ gbɔ* amaga lɛMɛɛ sɛɛnamɔ yɔɔ he?
Mɛɛ sɛɛnamɔ yɔɔ dade amaga kɛ mɔ ni tsɔɔ amalei lɛ he,Tsɛbelɛ, efeelɔ lɛ ŋɔɔ ehiɛ efɔ̃ɔ nɔ,Ni efeɔ nyɔŋmɔi ni sɛɛnamɔ bɛ amɛhe, ní nyɛɛɛ awie?+
19 Kpoo hã mɔ ni kɛɔ tso akɛ, “Ohiɛ atsɛ̃!”
Aloo ekɛɔ tɛ ni nyɛɛɛ awie akɛ, “Tee shi! Tsɔɔmɔ wɔ nii!”
Naa! Akɛ shika tsuru kɛ jwiɛtɛi eha he,+Ni mumɔ ko kwraa bɛ emli.+
20 Shi Yehowa yɛ esɔlemɔ shĩa krɔŋkrɔŋ lɛ.+
Shikpɔŋ muu lɛ fɛɛ afee diŋŋ yɛ ehiɛ!’”+
Shishigbɛ Niŋmaa
^ Loo “Koni mɔ ni kaneɔ lɛ waa lɛ anyɛ akane kɛ naatselɛ.”
^ Loo “emlibaa.”
^ Loo “Kɛ́ etamɔ nɔ ni eeekpe sɛɛ.”
^ Loo “yaa nɔ okpa lɛ gbɛ waa.”
^ Loo “Naa! Esusuma efu.”
^ Shishitsɔɔmɔi komɛi kɛɔ akɛ, “ehemɔkɛyeli.”
^ Loo “Elɛɔ esusuma mli agbo.”
^ Hebri mli lɛ, “Sheol,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
^ Loo “bo diɛŋtsɛ osusuma.”
^ Shishitsɔɔmɔi komɛi kɛɔ akɛ, “nuu eko ní odidãa.”
^ Loo “kpɛ́.”
