Hagai 1:1-15
1 Maŋtsɛ Dario nɔyeli afi ni ji enyɔ lɛ mli, yɛ nyɔɔŋ ni ji ekpaa lɛ nɔ klɛŋklɛŋ gbi lɛ nɔ lɛ, Yehowa kɛ ewiemɔ tsɔ gbalɔ Hagai*+ nɔ kɛbahã Zerubabel,+ Shealtiel binuu lɛ, ni ji Yuda amralo lɛ, kɛ Osɔfonukpa Yoshua, Yehozadak binuu lɛ akɛ:
2 “Nɔ ni Yehowa, taiatsɛ lɛ, kɛɛ nɛ, ‘Gbɔmɛi nɛɛ kɛɔ akɛ, “Be ni akɛbaama Yehowa shĩa* lɛ shɛko.”’”*+
3 Ni Yehowa kɛ gbalɔ Hagai+ wie ekoŋŋ akɛ:
4 “Ani be nɛɛ ji be ni sa akɛ nyɛhi nyɛshĩai ni akɛ tsei ehahai amɛmli lɛ amli, be mli ni shĩa nɛɛ efee koikoi lɛ?+
5 Agbɛnɛ, nɔ ni Yehowa, taiatsɛ lɛ, kɛɛ nɛ, ‘Nyɛsusua nyɛgbɛi lɛ ahe jogbaŋŋ.*
6 Nyɛduɔ nii babaoo, shi fioo pɛ nyɛkpaa.+ Nyɛyeɔ nii, shi nyɛtɔrɔɔɔ. Nyɛnuɔ nii, shi eshɛɛɛ nyɛnaa. Nyɛwoɔ atadei, shi nyɛteŋ mɔ ko mɔ ko he efeee kulɔɔ. Mɔ ni tsuɔ nii ehãa mɛi ni awoɔ lɛ nyɔmɔ lɛ kɛ enyɔmɔwoo lɛ woɔ kotoku ni he egbulɔ mli.’”
7 “Nɔ ni Yehowa, taiatsɛ lɛ, kɛɛ nɛ, ‘Nyɛsusua nyɛgbɛi lɛ ahe jogbaŋŋ.’*
8 “‘Nyɛkwɔa kɛyaa gɔŋ lɛ nɔ, ní nyɛyafolɔa tsei kɛbaa.+ Ní nyɛbamaa shĩa lɛ,+ koni maná he miishɛɛ, ní awo mihiɛ nyam,’+ Yehowa kɛɛ.”
9 “‘Nyɛkpa babaoo gbɛ, shi fioo pɛ nyɛná; ni be ni nyɛkɛba shĩa lɛ, mifili mishwie.+ Mɛni hewɔ?’ Yehowa, taiatsɛ lɛ kɛɛ. ‘Ejaakɛ mishĩa lɛ efee koikoi, be mli ni nyɛteŋ mɔ fɛɛ mɔ yaa ebaa, ni ekwɛɔ lɛ diɛŋtsɛ eshĩa lɛ nɔ jogbaŋŋ lɛ.+
10 No hewɔ lɛ, ŋwɛi ni yɔɔ nyɛyiteŋ lɛ tsĩ ebɔ́ lɛ naa, ni shikpɔŋ lɛ hu tsĩ enibaa nii lɛ anaa.
11 Ni mitsɛ nu hɔmɔ kɛba shikpɔŋ lɛ kɛ gɔji lɛ kɛ ŋmaa* lɛ kɛ wain hee lɛ kɛ mu lɛ kɛ nii ni kwɛ̃ɔ yɛ shikpɔŋ lɛ nɔ lɛ, kɛ gbɔmɛi kɛ kooloi lɛ, kɛ nyɛninenaa nitsumɔi lɛ fɛɛ anɔ.’”
12 Zerubabel,+ Shealtiel+ binuu lɛ, kɛ Osɔfonukpa Yoshua, Yehozadak+ binuu lɛ, kɛ maŋbii lɛ ateŋ mɛi ni eshwɛ lɛ fɛɛ bo Yehowa, amɛ-Nyɔŋmɔ lɛ, gbee kɛ gbalɔ Hagai wiemɔi lɛ toi, ejaakɛ Yehowa, amɛ-Nyɔŋmɔ lɛ, ji mɔ ni tsu lɛ; ni gbɔmɛi lɛ bɔi gbeyei shemɔ yɛ Yehowa hewɔ.
13 Kɛkɛ ni Hagai, Yehowa tsulɔ lɛ, kɛ sane nɛɛ hã maŋbii lɛ yɛ nitsumɔ ni Yehowa kɛwo edɛŋ lɛ naa akɛ: “‘Mikɛ nyɛ yɛ,’+ Yehowa kɛɛ.”
14 No hewɔ lɛ, Yehowa kanya Zerubabel, Shealtiel binuu lɛ, ni ji Yuda amralo+ lɛ mumɔ,+ kɛ Osɔfonukpa Yoshua,+ Yehozadak binuu lɛ mumɔ, kɛ maŋbii lɛ ateŋ mɛi ni eshwɛ lɛ fɛɛ amumɔ; ni amɛba, ni amɛbɔi Yehowa, taiatsɛ lɛ, amɛ-Nyɔŋmɔ lɛ, shĩa lɛ he nitsumɔ.+
15 Enɛ ba yɛ nyɔɔŋ ni ji ekpaa lɛ nɔ gbi ni ji 24 lɛ nɔ, yɛ Maŋtsɛ Dario nɔyeli afi ni ji enyɔ lɛ mli.+
Shishigbɛ Niŋmaa
^ Eshishi ji, “Afɔ Lɛ Yɛ Gbi Jurɔ Nɔ.”
^ Loo “sɔlemɔ shĩa.”
^ Loo “Be ni abaasaa ama Yehowa shĩa lɛ ekoŋŋ lɛ shɛko.”
^ Hebri sht. ŋm., “Nyɛkɛ nyɛtsui afɔ̃a nyɛgbɛi lɛ anɔ.”
^ Hebri sht. ŋm., “Nyɛkɛ nyɛtsui afɔ̃a nyɛgbɛi lɛ anɔ.”
^ Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
