Akɛmaje Hebribii Lɛ 12:1-29
12 No hewɔ lɛ, agbɛnɛ, wɔ hu, akɛni wɔyɛ odasefoi babaoo tamɔ atatu ni ebɔle wɔ hewɔ lɛ, nyɛhãa wɔshɛa nɔ fɛɛ nɔ ni tsii kɛ esha ni lalaa wɔ oya lɛ wɔfɔ̃a,+ ni wɔkɛ shifimɔ ada foi ni kã wɔhiɛ lɛ,*+
2 be mli ni wɔkwɛɔ wɔhemɔkɛyeli lɛ Hiɛnyiɛlɔ-Nukpa kɛ mɔ ni hãa wɔhemɔkɛyeli lɛ yeɔ emuu, ni ji Yesu lɛ waa lɛ.+ Ejaakɛ miishɛɛ ni kã ehiɛ lɛ hewɔ lɛ, edamɔ piŋmɔ ni epiŋ yɛ piŋmɔ tso* lɛ nɔ lɛ naa, ni ebuuu hiɛgbele, ni eyata shi yɛ Nyɔŋmɔ maŋtsɛ sɛi lɛ ninejurɔ nɔ.+
3 Anɔkwa, nyɛsusua mɔ ni damɔ shiteekɛwoo wiemɔi ni tamɔ nɛkɛ ni eshafeelɔi wie amɛshi lɛ+ kɛye amɛ diɛŋtsɛ amɛhe awui lɛ fɛɛ naa lɛ he, koni ekatɔ nyɛ ni nyɛnijiaŋ je wui.*+
4 Yɛ nɔmɔ ni nyɛkɛ nakai esha lɛ nɔɔ lɛ mli lɛ, nyɛteko shi nyɛwoko esha nɛɛ kɛshɛko he ni abaashwie nyɛlá shi.
5 Ni nyɛhiɛ ekpa wiemɔ ni awie atsɔɔ nyɛ tamɔ akɛ bii wieɔ lɛ nɔ kwraa, akɛ: “Mibi, kaabu Yehowa* tsɔsemɔ lɛ akɛ nɔ ko bibioo, ni kɛ́ ejaje bo lɛ, onijiaŋ akaje wui;
6 ejaakɛ mɛi ni Yehowa* sumɔɔ lɛ, amɛ etsɔseɔ, anɔkwa, eyiɔ mɔ fɛɛ mɔ ni eŋɔɔ lɛ akɛ ebi lɛ.”*+
7 Esa akɛ nyɛfi shi, ejaakɛ no fata nyɛtsɔsemɔ* lɛ he. Nyɔŋmɔ kɛ nyɛ miiye akɛ bii.+ Ejaakɛ mɛɛ bi yɔɔ ni etsɛ tsɔseee lɛ?+
8 Shi kɛ́ nyɛ fɛɛ nyɛnáko tsɔsemɔ nɛɛ mli gbɛfaŋnɔ lɛ, no lɛ, anɔkwa, ajwamaŋbii ji nyɛ, jeee bii diɛŋtsɛ.
9 Agbɛnɛ hu, no mli lɛ, wɔtsɛmɛi ni ji gbɔmɛi* lɛ tsɔseɔ wɔ, ni wɔbuɔ amɛ. Ani esaaa akɛ wɔbaa wɔhe shi babaoo fe nakai wɔhãa wɔmumɔŋ Tsɛ lɛ* koni wɔyi aná wala?+
10 Ejaakɛ amɛ lɛ, be fioo ko amɛtsɔse wɔ yɛ bɔ ni amɛsusuɔ akɛ ehi lɛ naa, shi lɛ lɛ, efeɔ nakai koni wɔná he sɛɛ, bɔ ni afee ni wɔná ekrɔŋkrɔŋfeemɔ lɛ mli gbɛfaŋnɔ.+
11 Eji anɔkwale akɛ, tsɔsemɔ ko bɛ ni amrɔmrɔ lɛ efeɔ mɔ akɛ miishɛɛ nɔ, shi moŋ edɔɔ mɔ;* shi sɛɛ mli lɛ, ewoɔ toiŋjɔlɛ yibii ni ji jalɛ ehãa mɛi ni etsɔ no nɔ amɛkase nɔ ko lɛ.
12 No hewɔ lɛ, nyɛwajea niji ni mli eje wui kɛ nakutsei ni egbɔjɔ lɛ,+
13 ni nyɛyaa nɔ nyɛjajea gbɛ ni nyɛnyiɛ nɔ lɛ koni nyɛnyiɛ trɔmɔɔ,+ koni nɔ ni egbɔjɔ lɛ akaje talɔ lɛ mli, shi moŋ atsa lɛ.
14 Nyɛtiua nyɛkɛ mɛi fɛɛ ateŋ toiŋjɔlɛ sɛɛ,+ kɛ agbɛnɛ hu hetsemɔ* sɛɛ,+ hetsemɔ ni kɛ́ mɔ ko bɛ eko lɛ enaŋ Nuŋtsɔ lɛ.
15 Nyɛkwɛa jogbaŋŋ koni mɔ fɛɛ mɔ nine ashɛ Nyɔŋmɔ dromɔ lɛ nɔ, koni shishifã ni pɔizin yɔɔ mli ko akakwɛ̃ ni ekɛ naagba ba ni no bule mɛi babaoo;+
16 ni nyɛkwɛa koni ajwamaŋbɔlɔ ko,* aloo mɔ ko ni hiɛ esɔɔɔ nibii ni yɔɔ krɔŋkrɔŋ, tamɔ Esau, mɔ ni ŋɔ ekromɔbi hegbɛi lɛ etsake niyenii kome lɛ akaba nyɛteŋ.+
17 Ejaakɛ nyɛle akɛ, sɛɛ mli be ni eetao enine ashɛ jɔɔmɔ lɛ nɔ lɛ, akɛhãaa lɛ; ejaakɛ eyɛ mli akɛ efó waa koni ehã atsake jwɛŋmɔ* moŋ,+ shi eyayeee omanye.*
18 Ejaakɛ nyɛtsiko nyɛbɛŋkɛko nɔ ko ni abaanyɛ ata he+ ni ahã la miitso yɛ nɔ,+ kɛ atatu ni ewo duŋ kɛ duŋ kpii kɛ kɔɔyɔɔ ni naa wa,+
19 kɛ tɛtɛrɛmantɛrɛ gbɛɛmɔ+ kɛ gbee ni wieɔ wiemɔi,+ nɔ ni be ni maŋbii lɛ nu lɛ, amɛkpa fai akɛ akɛ amɛ akawie nɔ ko kɛfata he dɔŋŋ lɛ.+
20 Ejaakɛ amɛnyɛɛɛ kitã nɛɛ mli amɛmɔ, akɛ: “Kɛ́ kooloo ko po ta gɔŋ lɛ he lɛ, esa akɛ atswia lɛ tɛi.”+
21 Agbɛnɛ hu, nɔ ni amɛna lɛ yɛ gbeyei aahu akɛ, Mose kɛɛ akɛ: “Miishe gbeyei, ni miikpokpo.”+
22 Shi nyɛtsi nyɛbɛŋkɛ Zion Gɔŋ+ kɛ Nyɔŋmɔ hiɛkãalɔ lɛ maŋ, ŋwɛi Yerusalem lɛ,+ kɛ ŋwɛibɔfoi akpei nyɔŋmai abɔ
23 ni ebua amɛhe naa,+ kɛ kromɔbii ni aŋma amɛgbɛ́ii yɛ ŋwɛi lɛ asafo lɛ, kɛ Nyɔŋmɔ ni ji mɛi fɛɛ a-Kojolɔ lɛ,+ kɛ jalɔi ni ahã amɛye emuu+ lɛ amumɔŋ wala lɛ,+
24 kɛ Yesu, ni ji kpaŋmɔ hee+ lɛ teŋdamɔlɔ lɛ,+ kɛ lá ni ashwã lɛ, ni wieɔ yɛ gbɛ kpakpa nɔ fe Habel lá lɛ.+
25 Nyɛkwɛa jogbaŋŋ ni nyɛkakpoa akɛ nyɛaabo mɔ ni wieɔ lɛ toi.* Ejaakɛ kɛ́ mɛi ni booo mɔ ni kɛ Nyɔŋmɔ kɔkɔbɔɔ hã yɛ shikpɔŋ lɛ nɔ lɛ toi lɛ ahe ejeee mli lɛ, belɛ wɔ hu, kɛ́ wɔtsi wɔhe kɛje mɔ ni jɛɔ ŋwɛi ewieɔ lɛ he lɛ, ekã shi faŋŋ akɛ, wɔhe ejeŋ mli kɔkɔɔkɔ!+
26 Nakai be lɛ mli lɛ, egbee hoso shikpɔŋ lɛ,+ shi amrɔ nɛɛ ewo shi akɛ: “Eshwɛ shi kome ekoŋŋ, mahoso shikpɔŋ lɛ, ni jeee shikpɔŋ lɛ kɛkɛ, shi ŋwɛi hu.”+
27 Agbɛnɛ, wiemɔ ni ji “eshwɛ shi kome ekoŋŋ” lɛ tsɔɔ akɛ abaajie nibii ni ahosoɔ lɛ kɛya, nibii ni afee lɛ, bɔ ni afee ni nibii ni anyɛŋ ahoso lɛ ahi shi.
28 No hewɔ lɛ, akɛni wɔna akɛ wɔnine baashɛ Maŋtsɛyeli ko ni anyɛŋ ahoso nɔ hewɔ lɛ, nyɛhãa wɔyaa nɔ wɔnáa dromɔ lɛ, nɔ ni wɔbaatsɔ nɔ wɔkɛ Nyɔŋmɔ gbeyeishemɔ kɛ woo aŋɔ sɔɔmɔ krɔŋŋ wɔhã Nyɔŋmɔ bɔ ni sa ehiɛ lɛ.
29 Ejaakɛ wɔ-Nyɔŋmɔ lɛ, la ni shãa nii wɛɛ ji lɛ.+
Shishigbɛ Niŋmaa
^ Loo “wɔda foi ni Nyɔŋmɔ eto ehã wɔ lɛ.”
^ Kwɛmɔ Wiemɔi Titrii Amligbalamɔ lɛ.
^ Loo “nyɛsusumai amumɔ naa tã.”
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Loo “egbalaa mɔ fɛɛ mɔ ni eŋɔɔ lɛ akɛ ebi lɛ toi.”
^ Loo “nyɛnikasemɔ.”
^ Greek sht. ŋm., “wɔheloo tsɛmɛi.”
^ Loo “wɔmumɔŋ wala lɛ Tsɛ lɛ.”
^ Loo “shi moŋ ehãa mɔ werɛ hoɔ ehe.”
^ Loo “krɔŋkrɔŋfeemɔ.”
^ Kwɛmɔ Wiemɔi Titrii Amligbalamɔ lɛ, “Ajwamaŋbɔɔ.”
^ Ni ji, etsɛ jwɛŋmɔ.
^ Greek sht. ŋm., “enáaa he ko kɛhãaa no.”
^ Loo “nyɛkajiea nyɛnaa nyɛtsɔa mɔ ni wieɔ lɛ; nyɛkakua nyɛhiɛ nyɛfɔ̃a mɔ ni wieɔ lɛ nɔ.”
