Akɛmaje Hebribii Lɛ 13:1-25
13 Nyɛyaa nɔ nyɛjiea nyɛmimɛi asuɔmɔ kpo.+
2 Nyɛhiɛ akakpaa gbɔfeemɔ* nɔ,+ ejaakɛ no nɔ mɛi komɛi tsɔ amɛfee ŋwɛibɔfoi agbɔ ni amɛleee.+
3 Nyɛkaia mɛi ni awo amɛ tsuŋ lɛ,*+ tamɔ nɔ ni awo nyɛ kɛ amɛ fɛɛ tsuŋ,+ kɛ mɛi ni afeɔ amɛ niseniianii lɛ hu, akɛni nyɛ diɛŋtsɛ hu nyɛyɛ gbɔmɔtso lɛ mli lɛ hewɔ.*
4 Awo gbalashihilɛ hiɛ nyam yɛ mɛi fɛɛ ateŋ, ni akabule gbalashihilɛ saa lɛ,+ ejaakɛ ajwamaŋbɔlɔi* kɛ gbalafitelɔi lɛ, Nyɔŋmɔ baakojo amɛ.+
5 Shikasuɔmɔ akaba nyɛshihilɛ mli,+ ni nyɛmii ashɛa nibii ni nyɛyɔɔ amrɔ nɛɛ ahe.+ Ejaakɛ ekɛɛ: “Mishiŋ bo, ni mikwaŋ bo kɔkɔɔkɔ.”+
6 Koni wɔná ekãa babaoo ni wɔkɛɛ: “Yehowa* ji miyelikɛbualɔ; misheee gbeyei. Mɛni gbɔmɔ baanyɛ afee mi?”+
7 Nyɛkaia mɛi ni nyiɛɔ hiɛ yɛ nyɛteŋ,+ mɛi ni wieɔ Nyɔŋmɔ wiemɔ lɛ amɛtsɔɔ nyɛ lɛ, ni be ni nyɛkwɛɔ yibii kpakpai ni jɛɔ bɔ ni amɛfeɔ amɛnii amɛhãa lɛ mli kɛbaa lɛ jogbaŋŋ lɛ, nyɛkasea amɛhemɔkɛyeli lɛ.+
8 Yesu Kristo lɛ, bɔ ni eyɔɔ nyɛ lɛ, nakai nɔŋŋ eyɔɔ ŋmɛnɛ, ni nakai nɔŋŋ eyɔɔ kɛmiiya naanɔ.
9 Nyɛkahãa tsɔɔmɔi srɔtoi kɛ tsɔɔmɔi krokomɛi miihã nyɛmiidu gbɛ, ejaakɛ ehi akɛ abaatsɔ dromɔ nɔ awaje tsui lɛ moŋ fe nɔ ni abaatsɔ niyenii,* ni mɛi ni kɛ amɛjwɛŋmɔ fɛɛ maa nɔ lɛ náaa he sɛɛ ko lɛ, nɔ awaje lɛ.+
10 Wɔyɛ afɔleshaa latɛ ko ni mɛi ni kɛ sɔɔmɔ krɔŋŋ hãa yɛ mama tsũ lɛ mli lɛ bɛ hegbɛ akɛ amɛyeɔ enɔ nii.+
11 Ejaakɛ nakai kooloi lɛ ni osɔfonukpa lɛ ŋɔɔ amɛlá kɛyaa he krɔŋkrɔŋ lɛ akɛ esha he afɔle lɛ agbohii lɛ, ayashãa yɛ nsara lɛ sɛɛ.+
12 No hewɔ lɛ, Yesu hu na amanehulu yɛ maŋ lɛ agbó lɛ sɛɛ,+ bɔ ni afee ni ekɛ lɛ diɛŋtsɛ elá afee maŋbii lɛ krɔŋkrɔŋ.+
13 Belɛ, nyɛhãa wɔyaa eŋɔɔ yɛ nsara lɛ sɛɛ, ni wɔtere ehiɛshishwiemɔ lɛ,+
14 ejaakɛ wɔbɛ maŋ ni yaa nɔ ehiɔ shi yɛ biɛ, shi moŋ wɔkɛ hiɛdɔɔ miitao nɔ ni baaba lɛ sɛɛ gbɛ.+
15 Nyɛhãa wɔtsɔa enɔ wɔkɛ yijiemɔ afɔle ahãa Nyɔŋmɔ be fɛɛ be,+ no ji wɔnaabui lɛ ayibii+ ni jajeɔ egbɛ́i lɛ tsɔɔ lɛ.+
16 Agbɛnɛ hu, nyɛhiɛ akakpaa ekpakpafeemɔ nɔ, ni nyɛhiɛ akakpaa nɔ hu akɛ nyɛkɛ mɛi baaja nii ni nyɛyɔɔ lɛ,+ ejaakɛ afɔlei ni tamɔ nɛkɛ saa Nyɔŋmɔ hiɛ jogbaŋŋ.+
17 Nyɛboa mɛi ni nyiɛɔ hiɛ yɛ nyɛteŋ lɛ toi+ ni nyɛbaa nyɛhe shi nyɛhãa amɛ,+ ejaakɛ amɛmiibu nyɛhe,* ni amɛbaabu enɛ he akɔntaa,+ koni amɛkɛ miishɛɛ afee enɛ, shi jeee kɛ mligbigblimɔ, ejaakɛ no baaye nyɛ awui.
18 Nyɛyaa nɔ nyɛsɔlea nyɛhãa wɔ, ejaakɛ wɔyɛ nɔmimaa akɛ wɔyɛ henilee kpakpa,* ni wɔmiisumɔ ni wɔye anɔkwa yɛ nibii fɛɛ ni wɔfeɔ lɛ amli.+
19 Shi miiwo nyɛ hewalɛ waa akɛ nyɛsɔle koni akɛ mi ahã nyɛ ekoŋŋ oya.
20 Agbɛnɛ, toiŋjɔlɛ Nyɔŋmɔ lɛ, mɔ ni jie gwantɛŋi lɛ akwɛlɔ kpele+ lɛ, ni ji wɔ-Nuŋtsɔ Yesu ni hiɛ naanɔ kpaŋmɔ lɛ lá lɛ, kɛjɛ gbohii ateŋ lɛ,
21 asaa nyɛ kɛ nibii kpakpai fɛɛ koni nyɛfee esuɔmɔnaa nii, ni etsɔ Yesu Kristo nɔ etsu nɔ ni sa ehiɛ jogbaŋŋ yɛ wɔmli, lɛ akɛ anunyam ahã kɛya naanɔi anaanɔ. Amen.
22 Agbɛnɛ, nyɛmimɛi, miiwo nyɛ hewalɛ koni nyɛto nyɛtsui shi kɛbo hewalɛwoo wiemɔ nɛɛ toi, ejaakɛ miŋma nyɛ wolo kuku.
23 Miitao nyɛle akɛ ajie wɔnyɛmi Timoteo. Kɛ́ eba mra lɛ, no lɛ mikɛ lɛ baaba mabana nyɛ.
24 Nyɛŋaa mɛi fɛɛ ni nyiɛɔ hiɛ yɛ nyɛteŋ lɛ, kɛ mɛi krɔŋkrɔŋi lɛ fɛɛ nyɛhãa mi. Mɛi ni yɔɔ Italia+ lɛ miiŋa nyɛ.
25 Dromɔ lɛ kɛ nyɛ fɛɛ ahia shi.
Shishigbɛ Niŋmaa
^ Loo “mlihilɛ kpo ni ajieɔ atsɔɔ gbɔi.”
^ Greek sht. ŋm., “mɛi ni afimɔ amɛ lɛ; mɛi ni yɔɔ gboklɛi amli lɛ.”
^ Shishitsɔɔmɔi komɛi kɛɔ akɛ, “tamɔ nɔ ni nyɛkɛ amɛ fɛɛ naa amanehulu lɛ.”
^ Kwɛmɔ Wiemɔi Titrii Amligbalamɔ lɛ, “Ajwamaŋbɔɔ.”
^ Kwɛmɔ Saji Krokomɛi A5 lɛ.
^ Ni tsɔɔ akɛ, niyenii ahe mlai.
^ Loo “nyɛsusumai ahe.”
^ Loo “henilee ni yeɔ anɔkwa.”
