Hiob 4:1-21
4 Kɛkɛ ni Elifaz,+ Temannyo lɛ, jie naa akɛ:
2 “Kɛ́ mɔ ko ka akɛ ekɛ bo baawie lɛ, ani omli baafu?
Ejaakɛ namɔ baanyɛ amua enaa ni ewieee?
3 Eji anɔkwale akɛ ojaje mɛi pii,Owaje niji ni egbɔjɔ lɛ.
4 Owiemɔi wó mɔ ni etɛ ni eyaagbee shi lɛ nɔ edamɔ shi,Ni owaje mɛi ni nakutsei egbɔjɔ lɛ.
5 Shi agbɛnɛ, eba onɔ, ni ojijaa;*Esa ohe, ni onaaa naa.
6 Ani gbeyei ni osheɔ Nyɔŋmɔ lɛ hãaa okɛ ohiɛ afɔ̃ enɔ?
Ani anɔkwa ni oyeɔ lɛ hãaa oná hiɛnɔkamɔ?+
7 Ofainɛ, okɛ ohiɛ awo mli okwɛ: Mɛɛ gbɔmɔ yɔɔ ni efeko efɔŋ ko ni ehiɛ ekpãtã pɛŋ?
Ani akpãtã jalɔi ahiɛ pɛŋ?
8 Nɔ ni mina ji akɛ, mɛi ni huɔ nɔ fɔŋ ŋmɔ*Kɛ mɛi ni duɔ haomɔ lɛ, no nɔŋŋ amɛbaakpa.
9 Kɛ́ Nyɔŋmɔ mu emumɔ lɛ, amɛhiɛ kpãtãa,Ni kɛ́ emlifu lɛ fɛ́ lɛ, amɛhiɛ kpãtãa kwraa.
10 Jata hũɔ, ni jatanuu* shiɔ esɛ̃ŋ,Shi jatai ni he wala* po anyanyɔji kumɔɔ.
11 Jata hiɛ kpãtãa kɛ́ enáaa kooloo emɔ eye,Ni jatabii gbɛɔ shwãa.
12 Agbɛnɛ, akɛ wiemɔ ko bahã mi yɛ teemɔŋ,Ni minu ehe ablɛbi yɛ mitoiŋ.
13 Nyɔɔŋ mli be ni ninai gbaa mɔ jwɛŋmɔ naa,Be ni wɔ ni tsii nyɔɔ mɛi anɔ lɛ,
14 Mihe kpokpo gbeyeigbeyei,Ehã miwuiaŋ fɛɛ yimɔ obɔbɔ kɛ gbeyeishemɔ.
15 Mumɔ ko batsɔ mihiɛ kɛho;Mihetsɔi fɛɛ te shi damɔ shi.
16 Kɛkɛ ni ewa edamɔ shi,Shi miyooo esu.
Nɔ ko badamɔ mihiɛ;Jɛmɛ fee diŋŋ, kɛkɛ ni minu gbee ko kɛɛ:
17 ‘Ani gbɔmɔ adesa* baanyɛ aja fe Nyɔŋmɔ?
Ani gbɔmɔ he baanyɛ atse fe e-Feelɔ lɛ?’
18 Naa! Eheee etsuji eyeee,Ni etaoɔ tɔmɔ yɛ ebɔfoi lɛ ahe.
19 Belɛ eyɛ faŋŋ akɛ, mɛi ni yɔɔ shĩai ni akɛ sũ fee lɛ amli,Ni amɛfaneshi yɔɔ mulu mli,+Ni akpɔtɔɔ amɛ yɛ gbɛ ni waaa nɔ tamɔ abɛi* lɛ, enaŋ amɛ nɔ ko kwraa!
20 Akpɔtɔɔ amɛ kwraa kɛjɛɔ leebi kɛyashiɔ gbɛkɛ;Amɛhiɛ kpãtãa kɛyaa naanɔ, ni mɔ ko mɔ ko yɔseee.
21 Ani amɛtamɔɔɔ mama tsũ ni ajie emli kpãa?
Amɛgboɔ ní amɛbɛ hiɛshikamɔ.
Shishigbɛ Niŋmaa
^ Hebri sht. ŋm., “ni etɔ bo bliboo.”
^ Loo “mɛi ni tsɔɔ nɔ fɔŋ he ŋaa.”
^ Loo “jata oblanyo.”
^ Loo “jatahii kɛ amɛkuɛ he tsɔi kusuu.”
^ Loo “gbɔmɔ ni gboɔ.”
^ Ni ji, abɛi henɔ ko ni fiteɔ mama.
