Hiob 42:1-17
42 Kɛkɛ ni Hiob hã Yehowa hetoo akɛ:
2 “Agbɛnɛ, miná mile akɛ onyɛɔ nɔ fɛɛ nɔ ofeɔ,Ni nɔ ko nɔ ko bɛ ni oto oyiŋ akɛ obaafee ní onyɛŋ ofee.+
3 Okɛɛ akɛ, ‘Namɔ hu nɛ, ni etsĩɔ miyiŋtoo naa yɛ gbɛ ní nilee bɛ mli nɔ nɛɛ?’+
No hewɔ lɛ, miwie ní mibɛ niiashishinumɔ,Miwie nibii ni feɔ mi naakpɛɛ tsɔ ní mileee lɛ ahe.+
4 Okɛɛ akɛ, ‘Ofainɛ bo toi, ni mawie.
Mabi bo nii, ní otsɔɔ mi.’+
5 Mitoii enu ohe,Shi agbɛnɛ, miina bo kɛ mihiŋmɛii.
6 No hewɔ ni migbala nɔ ni miwie lɛ sɛɛ,*+Ni mitsake mitsui yɛ mulu kɛ lamulu mli lɛ.”+
7 Be ni Yehowa kɛ Hiob wie wiemɔi nɛɛ sɛɛ lɛ, Yehowa kɛɛ Elifaz, Temannyo lɛ, akɛ:
“Mimli ewo la waa ewo bo kɛ onanemɛi enyɔ lɛ,+ ejaakɛ nyɛwieee mihe anɔkwale+ tamɔ mitsulɔ Hiob fee lɛ.
8 Agbɛnɛ, nyɛmɔmɔa tsinahii kpawo kɛ gwantɛŋhii kpawo ní nyɛyaa mitsulɔ Hiob ŋɔɔ, ní nyɛyashãa shãa afɔle nyɛhãa nyɛhe. Ni mitsulɔ Hiob baasɔle ehã nyɛ.+ Bɔ fɛɛ bɔ ni fee lɛ, mabo fai ni ebaakpa akɛ mikɛ nyɛ akaye yɛ nyɛbuulufeemɔ lɛ naa lɛ toi,* ejaakɛ nyɛwieee mihe anɔkwale tamɔ mitsulɔ Hiob fee lɛ.”
9 No hewɔ lɛ, Elifaz, Temannyo lɛ, kɛ Bildad, Shuanyo lɛ, kɛ Zofar, Naamanyo lɛ, tee ni amɛyafee nɔ ni Yehowa kɛɛ amɛfee lɛ. Ni Yehowa bo Hiob sɔlemɔ lɛ toi.
10 Be ni Hiob sɔle ehã enanemɛi lɛ sɛɛ lɛ,+ Yehowa jie Hiob amanehulu lɛ,+ ni ehã eshwere ekoŋŋ.* Yehowa hã lɛ nibii ni eyɔɔ tsutsu lɛ toi enyɔ.+
11 Enyɛmimɛi hii kɛ enyɛmimɛi yei lɛ fɛɛ, kɛ etsutsu nanemɛi lɛ fɛɛ+ ba eŋɔɔ ni amɛkɛ lɛ baye nii yɛ eshĩa lɛ. Amɛye lɛ ŋkɔmɔ ni amɛshɛje emii yɛ amanehului fɛɛ ni Yehowa ŋmɛ gbɛ ni eba enɔ lɛ hewɔ. Amɛteŋ mɔ fɛɛ mɔ hã lɛ kapɛlɛ kome kɛ shika tsuru ga kome.
12 No hewɔ lɛ, Yehowa jɔɔ Hiob wala shihilɛ naagbee be lɛ fe eshishijee be lɛ,+ ni Hiob baná gwantɛŋi 14,000 kɛ afukpɔŋɔi 6,000 kɛ tsinai 2,000* kɛ tejiyei 1,000.+
13 Agbɛnɛ hu, ebaná bihii kpawo kɛ biyei etɛ ekoŋŋ.+
14 Ewo eklɛŋklɛŋ biyoo lɛ gbɛ́i akɛ Yemima, ewo mɔ ni ji enyɔ lɛ Kezia, ni ewo mɔ ni ji etɛ lɛ Keren-Hapuk.
15 Yoo ko yoo ko bɛ shikpɔŋ lɛ fɛɛ nɔ ni he yɔɔ fɛo tamɔ Hiob biyei lɛ, ni amɛpapa hã amɛ kɛ amɛnyɛmimɛi hii lɛ fɛɛ gboshinii.
16 Enɛ sɛɛ lɛ, Hiob hi shi afii 140, ni ena ebii kɛ enabii—kɛyashi yinɔ ni ji ejwɛ nɔ.
17 Naagbee lɛ, Hiob gbo be ni ehi shi afii babaoo ní etsui enyɔ emli lɛ.*
Shishigbɛ Niŋmaa
^ Loo “ni edɔ mi akɛ miwie nɔ ni miwie lɛ.”
^ Hebri sht. ŋm., “mawó ehiɛ nɔ koni mikɛ nyɛ akaye yɛ nyɛbuulufeemɔ lɛ naa.”
^ Hebri sht. ŋm., “Yehowa jie Hiob kɛjɛ nomŋɔɔ lɛ mli.”
^ Hebri sht. ŋm., “tsinai ntatai 1,000.”
^ Hebri sht. ŋm., “be ni egbɔ ní eyi obɔ kɛ gbii lɛ.”
