Lalai 51:1-19
Kɛhã lalatsɔɔlɔ lɛ. Lala ni David fo be ni ekɛ Bat-sheba+ ná bɔlɛ ni no sɛɛ lɛ gbalɔ Natan tee eŋɔɔ lɛ.
51 Ao Nyɔŋmɔ, naa mi mɔbɔ yɛ osuɔmɔ ni tsakeee lɛ hewɔ.+
Tsumɔmɔ* minɔtɔmɔi lɛ yɛ omɔbɔnalɛ babaoo lɛ hewɔ.+
2 Fɔ mitɔmɔ lɛ fɛɛ yɛ mihe,+Ni ohã mihe atse kɛje mihe esha lɛ mli.+
3 Ejaakɛ mile mitɔmɔi lɛ jogbaŋŋ,Ni mihe esha lɛ yɛ mihiɛ daa.*+
4 Bo, bo titri,* mifee esha mishi;+Nɔ ni ehiii yɛ ohiɛ lɛ, no mifee lɛ.+
No hewɔ lɛ, kɛ́ owie lɛ osane jaNi okojomɔ lɛ hu ja.+
5 Naa! afɔ mi akɛ mɔ ko ni tɔmɔ yɛ ehe,Ni mimami ŋɔ mi hɔ yɛ esha mli.*+
6 Naa! Onáa anɔkwale ni yɔɔ tsui mli* lɛ he miishɛɛ;+Tsɔɔmɔ mitsui* nii ni ená hiɛshikamɔ diɛŋtsɛ.
7 Okɛ hisopo ajie mihe esha lɛ kɛje mihe koni mihe atse;+Fɔflɔmɔ mihe koni mayɛ futaa fe snoo.+
8 Hã manu nyamɔ kɛ miishɛɛ he,Koni wui ni okumɔ lɛ aná miishɛɛ.+
9 Jiemɔ ohiɛ* kɛje mihe eshai lɛ anɔ,+Ni otsumɔ* mitɔmɔi lɛ fɛɛ.+
10 Ao Nyɔŋmɔ, bɔɔ tsui ni he tse yɛ mimli ohã mi,+Ni okɛ mumɔ hee, mumɔ ni fĩɔ shi, awo mimli.+
11 Kaashɛ mi ofɔ̃ kɛje ohiɛ;Ni kaajie omumɔ krɔŋkrɔŋ lɛ yɛ minɔ.
12 Hã maná miishɛɛ ekoŋŋ yɛ oyiwalaheremɔ lɛ hewɔ;+Kanyamɔ mi koni majɛ misuɔmɔ mli mabo bo toi.*
13 Matsɔɔ nɔtɔlɔi ogbɛi lɛ,+Koni eshafeelɔi aku amɛsɛɛ kɛba oŋɔɔ.
14 Ao Nyɔŋmɔ, miyiwalaheremɔ Nyɔŋmɔ,+ heremɔ mi kɛje lá he sɔ̃yeli+ mli,Koni mililɛi kɛ miishɛɛ ajaje ojalɛ nifeemɔ lɛ.+
15 Ao Yehowa, gbelemɔ minaa,Koni minaabu ajaje oyijiemɔ lɛ.+
16 Ejaakɛ jeee afɔle otaoɔ, kulɛ mikɛbaahã;+Onáaa shãa afɔle he miishɛɛ.+
17 Afɔlei ni Nyɔŋmɔ náa he miishɛɛ ji tsui* ni werɛ eho ehe;Ao Nyɔŋmɔ, tsui ni ekumɔ ni werɛ eho ehe lɛ, okpoŋ.*+
18 Jɛɛ odromɔ lɛ mli ofee Zion ejurɔ;Tswaa Yerusalem gbogboi lɛ oma shi ekoŋŋ.
19 Kɛkɛ lɛ, obaaná afɔlei ni ashãa yɛ jalɛ mli lɛ ahe miishɛɛ,Shãa afɔlei jio, afɔlei muji jio;Kɛkɛ lɛ, akɛ tsinahii baashã afɔle yɛ ofɔleshaa latɛ lɛ nɔ.+
Shishigbɛ Niŋmaa
^ Loo “Gbee.”
^ Loo “Ni mijwɛŋmɔ yɛ mihe esha lɛ nɔ daa.”
^ Hebri sht. ŋm., “bo okome too.”
^ Loo “Ni esha yɛ mihe kɛjɛ be ni minyɛ ŋɔ mi hɔ lɛ mli tɔ̃ɔ.”
^ Loo “anɔkwale ni yɔɔ mligbɛ gbɔmɔ lɛ mli.”
^ Loo “miteemɔŋ gbɔmɔ lɛ.”
^ Loo “Okɛ ohiɛ atee.”
^ Loo “ogbe.”
^ Hebri sht. ŋm., “Okɛ mumɔ ni sumɔɔ afi misɛɛ.”
^ Loo “mumɔ.”
^ Loo “onyaŋeŋ.”
