Maleaki 2:1-17
2 “Ni agbɛnɛ, nyɛ osɔfoi, kitã ni awoɔ nyɛ nɛ.+
2 Kɛji nyɛbooo toi, ni nyɛhãaa ekã nyɛtsui nɔ koni nyɛwo migbɛ́i lɛ hiɛ nyam lɛ,” Yehowa, taiatsɛ lɛ kɛɛ, “no lɛ, matsu loomɔ kɛba nyɛnɔ,+ ni mahã nyɛjɔɔmɔi lɛ atsɔ loomɔi.+ Hɛɛ, mihã jɔɔmɔi lɛ etsɔ loomɔi, ejaakɛ nyɛhãaa ekã nyɛtsui nɔ.”
3 “Naa! Makpãtã* wui ni nyɛdu lɛ ahiɛ yɛ nyɛhewɔ,+ ni magbɛ fei, ni ji nyɛgbii juji lɛ anɔ fei lɛ mashwã nyɛhiɛiaŋ; ni abaaloo nyɛ kɛya he.*
4 Ni nyɛbaaná nyɛle akɛ mi miwo nyɛ kitã nɛɛ, bɔ ni afee ni kpaŋmɔ ni mikɛ Levi kpaŋ lɛ akã he ahi shi,”+ Yehowa, taiatsɛ lɛ kɛɛ.
5 “Kpaŋmɔ ni mikɛ lɛ kpaŋ lɛ, wala kɛ toiŋjɔlɛ kpaŋmɔ ni, ni mikɛhã lɛ bɔ ni afee ni eshe gbeyei.* No hewɔ lɛ, eshe mi gbeyei, hɛɛ, eshe migbɛ́i lɛ gbeyei.
6 Anɔkwale mla* lɛ yɛ edaaŋ,+ ni anaaa nɔ ko ni ejaaa yɛ enaa. Ekɛ mi nyiɛ yɛ toiŋjɔlɛ kɛ jalɛ mli,+ ni ekpale mɛi pii kɛje tɔmɔ he.
7 Ejaakɛ esa akɛ osɔfo naabu abaa nilee yi, ni lɛ edaaŋ esa akɛ gbɔmɛi atao mla* kɛjɛ,+ ejaakɛ Yehowa, taiatsɛ lɛ, tsulɔ ji lɛ.
8 “Shi nyɛ diɛŋtsɛ lɛ, nyɛgbá afã kɛje gbɛ lɛ nɔ. Nyɛhã mɛi babaoo etɛrɛ yɛ mla lɛ gbɛfaŋ.*+ Nyɛfite Levi kpaŋmɔ lɛ,”+ Yehowa, taiatsɛ lɛ kɛɛ.
9 “No hewɔ lɛ, mahã nyɛtsɔmɔ mɛi ni anyaŋeɔ, ni maba nyɛ shi yɛ maŋbii lɛ fɛɛ ahiɛ, ejaakɛ nyɛnyiɛɛɛ migbɛi lɛ anɔ, shi moŋ, nyɛkwɛɔ hiɛiaŋ yɛ mla lɛ kɛnitsumɔ mli.”+
10 “Ani jeee tsɛ kome wɔ fɛɛ wɔyɔɔ?+ Ani jeee Nyɔŋmɔ kome bɔ wɔ? No hewɔ lɛ, mɛni hewɔ wɔteŋ mɔ fɛɛ mɔ yeee enyɛmi anɔkwa,+ ni wɔkɛbuleɔ wɔtsɛmɛi lɛ akpaŋmɔ lɛ?
11 Yuda yeee anɔkwa, ni afee nyaŋemɔ nɔ ko yɛ Israel kɛ Yerusalem; ejaakɛ Yuda ebule Yehowa krɔŋkrɔŋfeemɔ* lɛ,+ nɔ ni esumɔɔ* lɛ, ni eyaŋɔ maŋsɛɛ nyɔŋmɔ biyoo akɛ eŋa.+
12 Yehowa baafo mɔ fɛɛ mɔ ni feɔ enɛ lɛ kɛje Yakob mama tsũi lɛ amli eshɛ efɔ̃, ekɔɔɔ he eko mɔ ni eji,* kɛji ekɛ nikee afɔle bahãa Yehowa, taiatsɛ lɛ po.”+
13 “Ni nɔ kroko* hu yɛ ni nyɛfeɔ ní hãa yaafonui kɛ yaafo kɛ ŋkɔmɔyeli haa Yehowa afɔleshaa latɛ lɛ nɔ, ni no hewɔ lɛ, ekwɛɛɛ nyɛnikee afɔle lɛ, ni enáaa nyɛdɛŋ nɔ ko nɔ ko he miishɛɛ hu dɔŋŋ.+
14 Ni nyɛkɛɔ akɛ, ‘Mɛni hewɔ?’ Nɔ hewɔ lɛ ji akɛ, Yehowa ji odasefonyo yɛ bo kɛ oblahiiaŋ ŋa lɛ, mɔ ni oyeee lɛ anɔkwa lɛ teŋ, tsɛbelɛ lɛ ji ohefatalɔ kɛ okpaŋmɔ ŋa.*+
15 Shi mɔ ko yɛ ni efeee enɛ, ejaakɛ mumɔ lɛ eko eshwɛ yɛ enɔ. Ni mɛni nakai mɔ lɛ taoɔ? Nyɔŋmɔ seshi* lɛ. No hewɔ lɛ, nyɛkwɛa nyɛhe nɔ jogbaŋŋ yɛ nyɛmumɔ lɛ hewɔ, ni kaafee ohe mɔ ni yeee eblahiiaŋ ŋa lɛ anɔkwa.
16 Ejaakɛ minyɛɔ* gbalatsemɔ,”+ Yehowa, Israel Nyɔŋmɔ lɛ kɛɛ, “kɛ mɔ ni feɔ yiwalɛ nii,”* Yehowa, taiatsɛ lɛ kɛɛ. “Ni nyɛkwɛa nyɛhe nɔ jogbaŋŋ yɛ nyɛmumɔ lɛ hewɔ, ni nyɛkafea nyɛhe mɛi ni yeee anɔkwa.+
17 “Nyɛhã etɔ Yehowa kɛ nyɛwiemɔi lɛ.+ Shi nyɛkɛɔ akɛ, ‘Mɛɛ gbɛ nɔ wɔhã etɔ lɛ?’ No ji akɛ, nyɛkɛɔ akɛ, ‘Mɔ fɛɛ mɔ ni feɔ nɔ fɔŋ lɛ, ehi yɛ Yehowa hiɛ, ni enáa ehe tsui,’+ loo nyɛkɛɔ akɛ, ‘Nɛgbɛ Nyɔŋmɔ ni yeɔ jalɛ sane lɛ yɔɔ?’”
Shishigbɛ Niŋmaa
^ Hebri sht. ŋm., “Makã.”
^ Ni tsɔɔ akɛ, abaaloo amɛ kɛya he ni atsiɔ kooloi ni akɛshãa afɔlei lɛ afei lɛ ashwieɔ lɛ.
^ Loo “ni ejie bulɛ kpo.”
^ Loo “gbɛtsɔɔmɔ.”
^ Loo “gbɛtsɔɔmɔ.”
^ Shishitsɔɔmɔi komɛi kɛɔ akɛ, “yɛ nyɛgbɛtsɔɔmɔ lɛ hewɔ.”
^ Shishitsɔɔmɔi komɛi kɛɔ akɛ, “jamɔhe.”
^ Ni ji, nɔ ni Yehowa sumɔɔ.
^ Hebri sht. ŋm., “mɔ ni hiɛ etsɛ̃ kɛ mɔ ni hãa hetoo.”
^ Hebri sht. ŋm., “nɔ ni ji enyɔ nɔ.”
^ Loo “oŋa yɛ mla naa.”
^ Hebri sht. ŋm., “dumɔwu.”
^ Hebri sht. ŋm., “enyɛɔ.”
^ Loo “mɔ ni kɛ yiwalɛ haa etade nɔ.”
