Nahum 3:1-19
3 Kpoo hã maŋ ni shwieɔ lá shi lɛ!
Mɔlakamɔ kɛ juu eyi emli obɔ.
Be fɛɛ be nɛɛ, emɔ nɔ ko!
2 Kpãa miigbɛɛ, ni shwiilii ataii* hu miigbɛɛ,Okpɔŋɔi miisha foi, ni shwiilii hu hiɛ foi.
3 Okpɔŋɔnɔtalɔ miiba, klante miikpɛlɛ nyɛramnyɛram, ni akpɔlɔ hu miikpɛlɛ kaŋkaŋ,Agbe mɛi babaoo, ni gbohii bua shi—Anyɛɛɛ akane gbohii lɛ ayifalɛ.
Amɛmiitɛrɛ gbohii lɛ.
4 Enɛ fɛɛ jɛ ashawo yoo lɛ ashawo nifeemɔi babaoo lɛ,Yoo ni he yɔɔ fɛo waa diɛŋtsɛ ni, ŋkunyaayelɔi anyɛ ni,Ekɛ eshawofeemɔ lɛ duɔ jeŋmaji, ni ekɛ ekunyaayeli lɛ hu duɔ wekui.
5 “Naa! Mikɛ bo* ená,” Yehowa, taiatsɛ lɛ kɛɛ,+“Mawó otade* lɛ nɔ kɛha ohiɛ;Mahã jeŋmaji ana oyayaiaŋ,Ni maŋtsɛyelii baana ohiɛgbele lɛ.
6 Ni matsi muji nii mashwie onɔNi mahã ohe afee nyaŋemɔ;Mahã akwɛ bo gãa.+
7 Mɔ fɛɛ mɔ ni baana bo lɛ baajo onaa foi,+ ni ebaakɛɛ,‘Akpãtã Ninive hiɛ!
Namɔ aaaye lɛ ŋkɔmɔ?’
Nɛgbɛ maná miishɛjelɔi yɛ mahã bo?
8 Ani ohi fe No-amon*+ ní no mli lɛ ekã Nilo nujɔi lɛ anaa lɛ?+
No mli lɛ, nui ebɔle lɛ kɛkpe;Ŋshɔ lɛ ji enii ni eyɔɔ, ni ŋshɔ lɛ nɔŋŋ ji egbogbo.
9 Etiopia ji he ni ená ehewalɛ ni sɛɛ efooo lɛ kɛjɛ, kɛ Ejipt hu.
Put+ kɛ Libiabii lɛ ji eyelikɛbualɔi.*+
10 Shi lɛ po, aŋɔ lɛ nom;Etee nomŋɔɔ mli.+
Akɛ ebii lɛ tswiatswia shi ni amɛkumɔ dukuduku yɛ gbɛjegbɛ fɛɛ gbɛjegbɛ koŋ.*
Afɔ̃ ehii ni hiɛ yɔɔ nyam lɛ anɔ oshiki,Ni awo egbɔmɛi wuji lɛ fɛɛ gboklɛi.
11 Bo hu obaatɔ dãa;+Obaayatee ohe.
Obaatao abobaahe yɛ ohenyɛlɔ lɛ ŋɔɔ.
12 Ohei ni atswa gbogboi awo amɛhe lɛ fɛɛ tamɔ agbami tsei kɛ amɛnɔ yibii ni tsuɔ klɛŋklɛŋ;Kɛji ahoso amɛ lɛ, amɛbaashwie yelɔi lɛ adaaŋ.
13 Naa! Osraafoi ni yɔɔ oteŋ lɛ tamɔ yei.
Abaagbele oshikpɔŋ lɛ nɔ agbói lɛ gbanyaa ahã ohenyɛlɔi lɛ.
La baashã ogbói lɛ asɛɛ adabaŋi* lɛ.
14 Yɛɛ nu oto kɛhã kawoo lɛ!+
Wajemɔ ohei ni atswa gbogboi awo amɛhe lɛ.
Kpelekemɔ shi kɛya ŋmɔtɔ lɛ mli, ní oyanaanaa sũ nɔ;Mɔ adeka ni akɛfoɔ brik* lɛ mli.
15 La baashã bo yɛ jɛmɛ po.
Klante baafo bo afɔ̃ shi.+
Ebaaye bo tamɔ baalabii* ni darako feɔ lɛ.+
Hã oyi afa babaoo tamɔ baalabii ni darako!
Hɛɛ, hã oyi afa babaoo tamɔ baalabii!
16 Ohã ojarayelɔi lɛ ayi efa fe ŋwɛi ŋulamii.
Baalabi ni edako lɛ jieɔ ehewolo efɔ̃ɔ shi, ni efilikiɔ kɛyaa.
17 Obulɔi lɛ tamɔ baalabii,Ni onukpai lɛ hu tamɔ baalabii babaoo.
Amɛyahɔlɔɔ tɛ tsũi amli yɛ fɛ̃i gbi nɔ,Shi kɛ́ hulu bɔi tsoo lɛ, amɛfilikiɔ kɛyaa;Ni mɔ ko mɔ ko leee he ni amɛyɔɔ.
18 Bo Asiria maŋtsɛ, wɔ miiye otookwɛlɔi lɛ;Obladei lɛ hiɔ amɛshĩai amli.
Omaŋbii lɛ egbɛ eshwã gɔji lɛ anɔ,Ni mɔ ko mɔ ko buaaa amɛnaa.+
19 Onáŋ hejɔlɛ ko yɛ omanehulu lɛ mli.
Anyɛŋ opilamɔ lɛ atsa.
Mɛi fɛɛ ni baanu ohe sane lɛ baatswa amɛdɛ̃;+Ejaakɛ namɔ po oyitsoŋwalɛ nifeemɔi ni sɛɛ efooo lɛ hãko ena nɔ?”+
Shishigbɛ Niŋmaa
^ Loo “akoklolontoi.”
^ Ni ji, Ninive.
^ Loo “oskɛɛti.”
^ Ni ji, Tibis.
^ Hebri sht. ŋm., “oyelikɛbualɔi.”
^ Hebri sht. ŋm., “yɛ gbɛjegbɛi lɛ fɛɛ ayitso.”
^ Adabaŋ ji dade loo tso ni akɛbeleɔ shinaa loo agbó sɛɛ kɛlaa sɛɛ.
^ Loo “ntayaa.”
^ Baalabi ji agã henɔ ko.
