Wolo Ni Akɛmaje Romabii Lɛ 14:1-23
14 Nyɛherea mɔ ni leee nibii komɛi ni hemɔkɛyeli lɛ ŋmɛɔ lɛ gbɛ ni efee* lɛ atuu,+ ni nyɛkakojoa lɛ yɛ saji ni mɔ fɛɛ mɔ baanyɛ akpɛ eyiŋ bɔ ni esumɔɔ yɛ he lɛ ahe.*
2 Mɔ ko heɔ eyeɔ akɛ ebaanyɛ eye nɔ fɛɛ nɔ, shi mɔ ni he waaa yɛ hemɔkɛyeli lɛ mli lɛ yeɔ yelibai* pɛ.
3 Mɔ ni yeɔ nɔ fɛɛ nɔ lɛ akabu mɔ ni yeee nɔ fɛɛ nɔ lɛ akɛ ejeee mɔ ko, ni mɔ ni yeee nɔ fɛɛ nɔ lɛ akakojo mɔ ni yeɔ nɔ fɛɛ nɔ lɛ,+ ejaakɛ Nyɔŋmɔ ehere lɛ atuu.
4 Namɔ ji bo ni okojoɔ mɔ kroko tsulɔ?+ Edamɔ shi jio, egbee shi jio, lɛ diɛŋtsɛ enuŋtsɔ lɛ sane ni.+ Anɔkwa, abaahã edamɔ shi, ejaakɛ Yehowa* baanyɛ ahã edamɔ shi.
5 Mɔ ko buɔ gbi ko akɛ ehe hiaa fe gbi kroko;+ mɔ ko hu buɔ gbi fɛɛ gbi pɛpɛɛpɛ;+ mɔ fɛɛ mɔ aná nɔmimaa akɛ nɔ ni esusuɔ lɛ ja.
6 Mɔ ni buɔ gbi ko akɛ ehe hiaa lɛ, miifee nakai koni ekɛwo Yehowa* hiɛ nyam. Agbɛnɛ hu, mɔ ni yeɔ nii lɛ, miiye koni ekɛwo Yehowa* hiɛ nyam, ejaakɛ edaa Nyɔŋmɔ shi yɛ he;+ ni mɔ ni yeee nii lɛ, eyeee koni ekɛwo Yehowa* hiɛ nyam, ni lɛ hu edaa Nyɔŋmɔ shi.+
7 Anɔkwa, wɔteŋ mɔ ko hiɛ kãaa kɛwooo lɛ pɛ ehiɛ nyam,+ ni mɔ ko gbooo hu kɛwooo lɛ pɛ ehiɛ nyam.
8 Ejaakɛ kɛ́ wɔhiɛ kã lɛ, wɔhiɛ kã koni wɔkɛwo Yehowa* hiɛ nyam,+ ni kɛ́ wɔgboi hu lɛ, wɔgboi koni wɔkɛwo Yehowa* hiɛ nyam. No hewɔ lɛ, kɛ́ wɔhiɛ kã jio, wɔgboi jio, Yehowa* nii ji wɔ.+
9 Ejaakɛ enɛ hewɔ Kristo gbo ni eba wala mli ekoŋŋ lɛ, koni etsɔ gbohii kɛ hiɛkãalɔi fɛɛ a-Nuŋtsɔ.+
10 Shi bo lɛ, mɛni hewɔ okojoɔ onyɛmi?+ Aloo bo hu, mɛni hewɔ obuɔ onyɛmi akɛ ejeee mɔ ko? Ejaakɛ wɔ fɛɛ wɔbaadamɔ Nyɔŋmɔ kojomɔ sɛi lɛ hiɛ.+
11 Ejaakɛ aŋma akɛ: “‘Gbii abɔ ni mihiɛ kã nɛɛ,’+ Yehowa* kɛɛ, ‘nakutso fɛɛ nakutso baakoto mi, ni lilɛi fɛɛ lilɛi baajie miyi ni ekɛɛ akɛ, miji Nyɔŋmɔ.’”+
12 No hewɔ lɛ, agbɛnɛ, wɔteŋ mɔ fɛɛ mɔ baabu lɛ diɛŋtsɛ ehe akɔntaa ehã Nyɔŋmɔ.+
13 No hewɔ lɛ, nyɛkahãa wɔkojokojoa wɔhe dɔŋŋ,+ shi moŋ, nyɛtswaa nyɛfai shi akɛ nyɛkɛ nanetɔ̃tɔmɔnɔ loo gbɛtsiinii ko emaŋ nyɛmi ko hiɛ.+
14 Mile, ni miyɛ nɔmimaa hu yɛ Nuŋtsɔ Yesu mli akɛ, nɔ ko nɔ ko bɛ ni he tseee;+ kɛ́ mɔ ko buɔ nɔ ko akɛ ehe tseee lɛ, no lɛ, lɛ ebuɔ lɛ akɛ ehe tseee.
15 Ejaakɛ kɛ́ nɔ ko ni oyeɔ lɛ gbaa onyɛmi naa lɛ, no lɛ, jeee suɔmɔ naa onyiɛɔ yɛ lɛ dɔŋŋ.+ Okɛ oniyenii akakpãtã mɔ ni Kristo gbo ehã lɛ lɛ hiɛ.+
16 No hewɔ lɛ, nyɛkahãa awiea ekpakpa ni nyɛfeɔ lɛ he efɔŋ.
17 Ejaakɛ Nyɔŋmɔ Maŋtsɛyeli lɛ, jeee niyeli kɛ ninumɔ ni,+ shi moŋ eji jalɛ kɛ toiŋjɔlɛ kɛ miishɛɛ ni tsɔɔ mumɔ krɔŋkrɔŋ nɔ kɛbaa.
18 Ejaakɛ mɔ fɛɛ mɔ ni sɔmɔɔ Kristo akɛ nyɔŋ yɛ nɛkɛ gbɛ nɔ lɛ, esaa Nyɔŋmɔ hiɛ, ni gbɔmɛi náa ehe miishɛɛ hu.
19 No hewɔ lɛ, agbɛnɛ, nyɛhãa wɔtiua nibii ni kɛ toiŋjɔlɛ baa+ kɛ nibii ni wɔkɛbaatswa wɔnyɛmimɛi lɛ wɔma shi lɛ asɛɛ.+
20 Nyɛkpaa Nyɔŋmɔ nitsumɔ lɛ kuumɔ kɛ shishwiemɔ yɛ niyenii hewɔ.+ Eji anɔkwale akɛ, nibii fɛɛ ahe tse, shi ehiii akɛ* mɔ ko yeɔ nɔ ko kɛ́ no baatɔ̃tɔ mɔ kroko nane.+
21 Ehi akɛ okaye loo ko, loo okanu wain, loo okafee nɔ kroko ni baatɔ̃tɔ onyɛmi nane.+
22 Hemɔkɛyeli ni oyɔɔ lɛ, okɛto ohã bo diɛŋtsɛ ohe yɛ Nyɔŋmɔ hiɛ. Mɔ ni ekojooo lɛ diɛŋtsɛ ehe yɛ nɔ ni enáa he miishɛɛ lɛ naa lɛ yɛ miishɛɛ.
23 Shi kɛ́ eyiŋ etɛ̃ɛɛ lɛ lɛ, kɛji eye lɛ, abu lɛ fɔ momo, ejaakɛ jeee hemɔkɛyeli mli ejɛ eye. Anɔkwa, nɔ fɛɛ nɔ ni jɛɛɛ hemɔkɛyeli mli lɛ, esha ni.
Shishigbɛ Niŋmaa
^ Shishitsɔɔmɔi komɛi kɛɔ akɛ, “yɛ yiŋkɔshikɔshifeemɔi ahe.”
^ Loo “mɔ ni he waaa yɛ hemɔkɛyeli lɛ mli.”
^ Yelibai ji nibii tamɔ kontomire kɛ ameo kɛ shitɔ kɛ amɛhenɔi lɛ.
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Loo “esaaa akɛ.”
