Solomon Lala 4:1-16
4 “Naa! Misuɔlɔ, ohe yɛ fɛo.
Naa! Ohe yɛ fɛo oo.
Ohiŋmɛii tamɔ okpo hiŋmɛii yɛ ohiɛhaanɔ lɛ mli.
Oyitsɔi tamɔ too abotiai akuuNi miikpeleke shi kɛmiijɛ Gilead gɔji lɛ anɔ.+
2 Onyanyɔji tamɔ gwantɛŋi akuu ni aku amɛhetsɔi etsɛkoNi ayaju amɛhe ni amɛkwɔ kɛba,Amɛ fɛɛ amɛhiɛ bii enyɔnyɔɔnyɔ,Ni amɛteŋ eko eko bi gboko.
3 Onaabu tsuɔ tamɔ kpãa tsuru,Ni owiemɔ ŋɔɔ.
Bɔ ni pomegranet aduawa ni agba mli enyɔ yɔɔ lɛ,Nakai okpaii* ji yɛ ohiɛhaanɔ lɛ mli.
4 Okuɛ+ tamɔ David mɔɔ lɛ,+Mɔɔ ni akɛ tɛi ni eko kã eko nɔ tswa lɛ,Ni akɛ tsɛŋi akpe etsotsoro he lɛ,Hii kãkãlɔi lɛ atsɛŋi koklobii lɛ fɛɛ.+
5 Ofufɔi enyɔ lɛ tamɔ adowabii enyɔAdowabii haaji+Ni yeɔ nii yɛ lili fɔfɔii lɛ ateŋ lɛ.”
6 “Maya mire gɔŋ lɛ nɔ,Kɛ frankinsɛnsi gɔŋkpɔ lɛ nɔ,+Kɛyashi kɔɔyɔɔ baatswa blɛoo yɛ gbi lɛ mli,* kɛyashi hɔɔŋ baalaaje.”
7 “Misuɔlɔ, ohe yɛ fɛo kɛyi shi,+Kpa ko kwraa bɛ ohe.
8 Miyemforo, okɛ mi ashi Lebanon,Okɛ mi ashi Lebanon.+
Kpelekemɔ shi kɛjɛ Amana* yiteŋKɛjɛ Senir yiteŋ, kɛ Hermon yiteŋ+Kɛjɛ jatai lɛ ashihilɛhe lɛ, kɛ kootsɛi agɔji lɛ anɔ.
9 Minyɛmi yoo kɛ miyemforo, omɔ mitsui,+Okɛ kwɛmɔ ni okwɛ mi shi kome lɛ,Kɛ okuɛnii lɛ mli ashinao kome kɛkɛ emɔ mitsui.
10 Minyɛmi yoo kɛ miyemforo, osuɔmɔ nifeemɔi lɛ yɛ fɛo waa!+
Osuɔmɔ nifeemɔi lɛ hi kwraa fe wain,+Ni ojeŋma ni owoɔ lɛ jeɔ ŋma fe tsofa-kɛ-ŋmai srɔtoi fɛɛ!+
11 Miyemforo, onaabu ŋɔɔ tamɔ wo ni miitsere.*+
Wo kɛ mliki yɛ olilɛi shishi,+Ni otadei lɛ amli ŋma lɛ tamɔ Lebanon ŋma.
12 Minyɛmi yoo kɛ miyemforo lɛ tamɔ abɔɔ ni aŋmɛ naa,Abɔɔ ni aŋmɛ naa, kɛ nuhiŋmɛi ni asɔo naa kpɛŋŋ.
13 Ogbeji* lɛ tamɔ paradeiso* ni pomegranet tsei yɔɔ mli,Ewo aduawai ni hi fe fɛɛ, kɛ kofer fɔfɔi kɛ nardo tsei,
14 Nardo+ kɛ safron, kalamo,*+ kɛ sinamon,+Kɛ frankinsɛnsi tsei srɔtoi fɛɛ, kɛ mire, kɛ aloe,+Kɛ ojeŋma kpakpai fɛɛ.+
15 Otamɔ abɔɔ mli nuhiŋmɛi, nubu ni mli nu mli tse,Kɛ fai ni miiho kɛmiijɛ Lebanon.+
16 Bo, kooyi kɔɔyɔɔ, tee shi;Bo, wuoyi kɔɔyɔɔ, ba mli.
Muu kɔɔyɔɔ oshwie abɔɔ ni mifee lɛ nɔ.*
Hã efã ŋma.”
“Hã misuɔlɔ lɛ aba abɔɔ ni efee lɛ mliKoni ebaye emli aduawai ni hi fe fɛɛ lɛ eko.”
Shishigbɛ Niŋmaa
^ Loo “oyitso he.”
^ Hebri sht. ŋm., “Kɛyashi gbi lɛ baamu.”
^ Loo “kɛjɛ gɔji ni hiɛ kwɛɔ Lebanon gɔji lɛ.”
^ Loo “wo ni afutuko mli.”
^ Shishitsɔɔmɔi komɛi kɛɔ akɛ, “Ohewolo.”
^ Loo “abɔɔ.”
^ Eji tso ko ni jeɔ ŋma. Aleee bɔ ni eji jogbaŋŋ.
^ Loo “Tswaa kɔɔyɔɔ blɛoo yɛ abɔɔ ni mifee lɛ mli.”
