Akɛmaje Tito 1:1-16
1 Paulo, Nyɔŋmɔ nyɔŋ kɛ Yesu Kristo bɔfo yɛ mɛi ni Nyɔŋmɔ ehala lɛ ahemɔkɛyeli lɛ naa, kɛ agbɛnɛ hu, yɛ anɔkwale lɛ ni kɛ Nyɔŋmɔjamɔ kpãa gbee lɛ he nilee krɔŋŋ lɛ naa,
2 ni enɛ damɔ naanɔ wala+ lɛ he hiɛnɔkamɔ ni Nyɔŋmɔ, mɔ ni nyɛŋ emale+ lɛ wo he shi yɛ blema tɔ̃ɔ lɛ nɔ;
3 shi yɛ lɛ diɛŋtsɛ ebe ni sa mli lɛ, etsɔ shiɛmɔ ni akɛwo midɛŋ+ yɛ Nyɔŋmɔ, wɔ-Yiwalaherelɔ lɛ famɔ naa lɛ nɔ ehã ale ewiemɔ lɛ;
4 kɛ wolo nɛɛ miimaje Tito, bi krɔŋŋ yɛ hemɔkɛyeli lɛ ni wɔ fɛɛ wɔnáa mli gbɛfaŋnɔ lɛ naa lɛ akɛ:
Dromɔ kɛ toiŋjɔlɛ ni jɛ Nyɔŋmɔ, ni ji Tsɛ lɛ kɛ Kristo Yesu, wɔ-Yiwalaherelɔ lɛ dɛŋ lɛ ahã bo.
5 Mishi bo yɛ Kreta koni ojaje nibii ni ejaaa* lɛ, ni ohole asafoŋ onukpai yɛ maŋ fɛɛ maŋ mli, tamɔ bɔ ni mikɛ gbɛtsɔɔmɔ hã bo lɛ:
6 kɛ́ nuu ko yɛ ni sane ko bɛ ehe, ni eji wu ni yɔɔ ŋa kome, ni eyɛ bii ni heɔ yeɔ ni awieee amɛhe akɛ amɛnyiɛɔ basabasa* loo amɛji atuatselɔi.+
7 Nɔkwɛlɔ lɛ, akɛni eji shĩa nɔkwɛlɔ ni Nyɔŋmɔ ehala lɛ hewɔ lɛ, esa akɛ efee mɔ ni sane ko bɛ ehe, jeee mɔ ni yeɔ etsuinaa sane,+ jeee mɔ ni mli fuɔ mramra,+ jeee dãatɔlɔ, jeee mɔ ni sumɔɔ nɔmɔ,* jeee mɔ ni kɛ amimyeli tiuɔ sɛɛnamɔ gbonyo sɛɛ,
8 shi moŋ gbɔfeelɔ,+ mɔ ni sumɔɔ ekpakpa, mɔ ni jwɛŋɔ jogbaŋŋ,*+ jalɔ, anɔkwafo,+ mɔ ni yeɔ ehe nɔ,+
9 mɔ ni yɛ enitsɔɔmɔ he ŋaa+ gbɛfaŋ lɛ, ehiɛɔ anɔkwa wiemɔ lɛ* mli kpɛŋŋ, koni enyɛ ekɛ tsɔɔmɔ ni hãa mɔ náa hewalɛ*+ lɛ awo mɛi hewalɛ,* koni ekɛjaje+ mɛi ni wieɔ shiɔ tsɔɔmɔ nɛɛ hu.
10 Ejaakɛ mɛi pii yɛ ni ji atuatselɔi, mɛi ni wieɔ wiemɔi ni sɛɛnamɔ bɛ he, kɛ mɛi ni lakaa mɛi, titri lɛ, mɛi ni kpɛtɛɔ ketiafoo lɛ he lɛ.+
11 Ehe miihia ni ahã amɛbu amɛnaa, akɛni nɛkɛ mɛi nɛɛ yaa nɔ amɛbutuɔ shĩai muji fɛɛ lɛ hewɔ, ejaakɛ amɛtsɔɔ nibii ni esaaa akɛ amɛtsɔɔ yɛ sɛɛnamɔ gbonyo hewɔ.
12 Amɛteŋ mɔ ko ni ji amɛ diɛŋtsɛ amɛgbalɔ lɛ kɛɛ akɛ: “Kretabii ji amalelɔi be fɛɛ be, kooloi awuiyelɔi, ŋmaayelɔi anihaolɔi.”
13 Nɛkɛ odase nɛɛ anɔkwale ni. Enɛ hewɔ lɛ, yaa nɔ ojaje amɛ kɛ hiɛdɔɔ, koni amɛhe awa amɛ yɛ hemɔkɛyeli lɛ mli,
14 ni amɛkɛ amɛjwɛŋmɔ akaya Yudafoi adesãi kɛ gbɔmɛi ni tsiɔ amɛhe kɛjeɔ anɔkwale lɛ he lɛ akitãi lɛ anɔ.
15 Mɛi ni he tse lɛ, nibii fɛɛ he tse hã amɛ;+ shi mɛi ni abule amɛ ni amɛbɛ hemɔkɛyeli lɛ, nɔ ko nɔ ko bɛ ni he tse hã amɛ, ejaakɛ abule amɛjwɛŋmɔi kɛ amɛhenilei fɛɛ.+
16 Amɛjajeɔ yɛ faŋŋ akɛ amɛle Nyɔŋmɔ, shi amɛkɛ amɛnitsumɔi tsɔɔ akɛ amɛje esɛɛ,+ ejaakɛ amɛhe yɛ nyaŋemɔ ni amɛgboɔ toi, ni amɛsaaa hãaa nitsumɔ kpakpa ko kwraa.
Shishigbɛ Niŋmaa
^ Loo “nibii ni yeko emuu.”
^ Loo “akɛ amɛhiɛ yɛ kramakrama; akɛ amɛhiɛ ejɔɔɔ.”
^ Loo “jeee ninekpokpookpotsɛ.”
^ Loo “mɔ ni kpɛɔ eyiŋ jogbaŋŋ; mɔ ni hiɛ kã shi.”
^ Loo “sane ni abaanyɛ amu afɔ̃ nɔ lɛ.”
^ Loo “ni tsaa mɔ; ni sɛɛnamɔ yɔɔ he.”
^ Loo “awie atsɔɔ mɛi.”
