Yakobo Wolo Lɛ 4:1-17
4 Nɛgbɛ tawui kɛ nɔmɔi ni yɔɔ nyɛteŋ lɛ jɛ? Ani jeee nibii ni nyɛheloo lɛ shweɔ ni yaa nɔ wuɔ ta yɛ nyɛmli* lɛ amli ejɛ?+
2 Nyɛshweɔ nii, shi nyɛnáaa. Nyɛyaa nɔ nyɛgbeɔ mɛi, ni nyɛhiɛ kɔ̃ɔ nii anɔ, shi nyɛnine shɛɛɛ nɔ. Nyɛyaa nɔ nyɛnɔɔ ni nyɛwuɔ ta.+ Nyɛnáaa ejaakɛ nyɛbiii.
3 Kɛ́ nyɛbi hu, nyɛnine shɛɛɛ nɔ ejaakɛ yiŋtoo fɔŋ hewɔ nyɛbiɔ, koni nyɛkɛtsu nibii ni nyɛheloo lɛ shweɔ lɛ ahe nii.
4 Gbalafitelɔi,* ani nyɛleee akɛ naanyo ni akɛ je lɛ bɔɔ lɛ ji nyɛɛ ni anyɛɔ Nyɔŋmɔ? No hewɔ lɛ, mɔ fɛɛ mɔ ni sumɔɔ akɛ etsɔ je lɛ naanyo lɛ, eetsɔ ehe Nyɔŋmɔ henyɛlɔ.+
5 Aloo nyɛsusuɔ akɛ yaka ni ŋmalɛ lɛ kɛɔ akɛ: “Hiɛkɔ̃ɔ* mumɔ ni yɔɔ wɔmli lɛ yaa nɔ eshweɔ nibii fɛɛ” lɛ?+
6 Shi dromɔ ni Nyɔŋmɔ kɛhãa lɛ da fe no. No hewɔ lɛ, ŋmalɛ lɛ kɛɔ akɛ: “Nyɔŋmɔ tsĩɔ henɔwolɔi anaa,+ shi edroɔ heshibalɔi.”+
7 No hewɔ lɛ, nyɛbaa nyɛhe shi nyɛwoa Nyɔŋmɔ shishi;+ shi nyɛtsĩa Abonsam gbɛ,+ ni ebaajo nyɛnaa foi.+
8 Nyɛtsia nyɛbɛŋkɛa Nyɔŋmɔ, ni ebaatsi ebɛŋkɛ nyɛ.+ Nyɛtsua nyɛniji ahe, nyɛ eshafeelɔi,+ ni nyɛhãa nyɛtsuii ahe atsea,+ nyɛ jwɛŋmɔi enyɔnyɔɔnyɔtsɛmɛi.
9 Nyɛhaoa, ni nyɛyea awerɛho, ni nyɛfóa.+ Nyɛhãa nyɛŋmɔlɔ lɛ atsɔa awerɛhoyeli, ni nyɛmiishɛɛ lɛ hu atsɔa nijiaŋwujee.
10 Nyɛbaa nyɛhe shi yɛ Yehowa* hiɛ,+ ni ebaawó nyɛnɔ.+
11 Nyɛmimɛi, nyɛkpaa wiemɔ ni nyɛwieɔ nyɛshiɔ nyɛhe lɛ.+ Mɔ fɛɛ mɔ ni wieɔ eshiɔ nyɛmi ko, aloo ekojoɔ enyɛmi lɛ, eewie eeshi mla, ni eekojo mla. Agbɛnɛ, kɛ́ okojo mla lɛ, jeee mɔ ni kɛ mla tsuɔ nii ji bo, shi moŋ kojolɔ ji bo.
12 Mɔ kome pɛ ji Mlawolɔ kɛ Kojolɔ,+ mɔ ni nyɛɔ ehereɔ yiwala ni enyɛɔ ekpãtãa hiɛ hu lɛ.+ Shi bo lɛ, namɔ ji bo ni okojoɔ onyɛmi gbɔmɔ?+
13 Agbɛnɛ, nyɛboa toi, nyɛ mɛi ni nyɛkɛɔ akɛ: “Ŋmɛnɛ loo wɔ́ lɛ wɔbaafã gbɛ kɛya maŋ nɛɛ nɔ ni wɔbaayaye afi kome yɛ jɛmɛ, ni wɔbaaye jara ni wɔbaaná sɛɛ,”+
14 shi nyɛleee nɔ ni baaba nyɛnɔ wɔ́.+ Ejaakɛ nyɛtamɔ afua ni pueɔ be fioo, kɛkɛ lɛ elaaje.+
15 Shi moŋ, esa akɛ nyɛkɛɛ akɛ: “Kɛ́ Yehowa* miisumɔ lɛ,+ wɔbaahi wala mli ni wɔfee enɛ loo enɛ.”
16 Shi amrɔ nɛɛ, nyɛkɛ nyɛhenɔwomɔi lɛ shwãa. Nɛkɛ shwãa nɛɛ fɛɛ lɛ, efɔŋ ni.
17 No hewɔ lɛ, kɛ́ mɔ ko le bɔ ni eeefee efee nɔ ni ja, shi efeee lɛ, esha ji no hã lɛ.+
Shishigbɛ Niŋmaa
^ Greek sht. ŋm., “yɛ nyɛhenii lɛ amli.”
^ Loo “Nyɛ mɛi ni nyɛyeee anɔkwa.”
^ Loo “Hetsɛ̃.”
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
