Yeremia 11:1-23
11 Wiemɔ ni jɛ Yehowa ŋɔɔ ba Yeremia ŋɔɔ nɛ:
2 “Nyɛ maŋbii, nyɛboa kpaŋmɔ nɛɛ mli wiemɔi lɛ atoi!
“Wiemɔ* enɛɛmɛi otsɔɔ Yuda hii lɛ kɛ mɛi ni yɔɔ Yerusalem lɛ
3 ni okɛɛ amɛ akɛ, ‘Nɔ ni Yehowa, Israel Nyɔŋmɔ lɛ kɛɛ nɛ: “Loomɔ kã mɔ fɛɛ mɔ ni booo kpaŋmɔ nɛɛ mli wiemɔi lɛ atoi lɛ nɔ,+
4 wiemɔi ni mikɛwo nyɛtsɛmɛi lɛ kitã yɛ gbi nɔ ni mijie amɛ kɛje Ejipt shikpɔŋ lɛ nɔ,+ kɛje dade seremɔ flɔnɔɔ lɛ mli akɛ,+ ‘Nyɛboa migbee toi, ni nyɛfea nibii fɛɛ ni mifã nyɛ lɛ; ni nyɛbaatsɔ mimaŋ ni matsɔ nyɛ-Nyɔŋmɔ,+
5 koni maye kitã ni mikã nyɛtsɛmɛi lɛ akɛ mahã amɛ shikpɔŋ ni mliki kɛ wo hoɔ yɛ nɔ+ tamɔ eji ŋmɛnɛ lɛ nɔ.’”’”
Ni mihere nɔ akɛ: “Ao Yehowa, Amen.”*
6 Kɛkɛ ni Yehowa kɛɛ mi akɛ: “Shiɛmɔ wiemɔi nɛɛ fɛɛ yɛ Yuda maji lɛ amli kɛ Yerusalem gbɛjegbɛi lɛ anɔ akɛ: ‘Nyɛboa kpaŋmɔ nɛɛ mli wiemɔi lɛ atoi, ni nyɛyea nɔ.
7 Ejaakɛ miwie mitsɔɔ nyɛtsɛmɛi lɛ yɛ gbi nɔ ni mijie amɛ kɛje Ejipt shikpɔŋ lɛ nɔ, ni mitee nɔ miwie mitsɔɔ amɛ daa kɛ daa* kɛbashi ŋmɛnɛ gbi nɛɛ akɛ: “Nyɛboa migbee toi.”+
8 Shi amɛbooo toi ni amɛbaaa amɛtoi shi hu; shi moŋ, amɛteŋ mɔ fɛɛ mɔ tee nɔ ekɛ kuɛŋtimɔ nyiɛ etsui fɔŋ lɛ sɛɛ.+ No hewɔ lɛ, mi hu mihã kpaŋmɔ nɛɛ mli wiemɔi lɛ fɛɛ ni mifã amɛ ni amɛye nɔ, shi amɛyeee nɔ lɛ ba amɛnɔ.’”
9 Kɛkɛ ni Yehowa kɛɛ mi akɛ: “Yuda hii lɛ kɛ mɛi ni yɔɔ Yerusalem lɛ ekpaŋ miyi nɔ.
10 Amɛku amɛsɛɛ kɛtee amɛtsɛmɛi ni hi shi yɛ blema ni booo miwiemɔi lɛ atoi lɛ atɔmɔi lɛ ahe.+ Amɛ hu amɛnyiɛ nyɔŋmɔi krokomɛi asɛɛ ni amɛmiisɔmɔ amɛ.+ Israel shĩa lɛ kɛ Yuda shĩa lɛ eku kpaŋmɔ ni mi kɛ amɛtsɛmɛi lɛ kpaŋ lɛ mli.+
11 No hewɔ lɛ, nɔ ni Yehowa kɛɛ nɛ, ‘Naa mikɛ sane fɔŋ ni amɛnyɛŋ mli amɛje miiba amɛnɔ.+ Kɛ́ amɛtsɛ mi ni miye mibua amɛ lɛ, miboŋ amɛ toi.+
12 Kɛkɛ lɛ, Yuda maji lɛ kɛ mɛi ni yɔɔ Yerusalem lɛ baaya nyɔŋmɔi ni amɛshãa afɔlei* amɛhãa amɛ lɛ aŋɔɔ koni amɛtsɛ amɛ ni amɛye amɛbua amɛ,+ shi nyɔŋmɔi nɛɛ hereŋ amɛ kɔkɔɔkɔ yɛ amɛmanehulu be lɛ mli.
13 Ejaakɛ bo Yuda, bɔ ni omaji lɛ fa lɛ, nakai onyɔŋmɔi lɛ fa, ni bɔ ni gbɛjegbɛi ni yɔɔ Yerusalem lɛ fa lɛ, nakai nyɛmamɔ afɔleshaa latɛi babaoo nyɛhã hiɛgbejianii nɛɛ,* afɔleshaa latɛi ni akɛshãa afɔlei ahãa Baal.’+
14 “Shi bo* lɛ, kaasɔle ohã maŋ nɛɛ. Kaafó otsɛ mi yɛ amɛhewɔ, ni kaasɔle ohã amɛ hu,+ ejaakɛ kɛ́ amɛbo amɛtsɛ mi yɛ amɛmanehulu lɛ hewɔ lɛ, miboŋ amɛ toi.
15 Mɛni hewɔ esa akɛ misuɔlɔ lɛ aya nɔ ahi mishĩa lɛBe ni mɛi babaoo miitsɔ ŋaa fɔji?
Ani amɛbaanyɛ amɛkɛ loo krɔŋkrɔŋ* atsi sane fɔŋ lɛ naa kɛ́ eba onɔ?
Ani omii baashɛ ohe yɛ nakai be lɛ mli?
16 Be ko ni eho lɛ, Yehowa tsɛ bo oliv tso frɔ̃frɔ̃,Tso fɛfɛo ni woɔ yibii kpakpai.
Anu gbɛɛmɔ wulu ko he, ni ekɛ* la shã esuɔlɔ lɛ,Ni amɛkumɔ oliv tso lɛ niji lɛ.
17 “Yehowa, taiatsɛ lɛ, mɔ ni du bo lɛ,+ ewie akɛ sane fɔŋ baaba onɔ yɛ efɔŋ ni Israel shĩa lɛ kɛ Yuda shĩa lɛ efee lɛ hewɔ, mɛi ni shãa afɔlei amɛhãa Baal kɛwoɔ mimli la lɛ.”+
18 Yehowa kɛɛ mi koni male;Nakai be lɛ mli lɛ, ohã mina nɔ ni amɛfeɔ lɛ.
19 Mitsɔ tamɔ gwantɛŋbi ni he jɔ ni akɛ lɛ miiya ayagbe lɛ.
Mileee ŋaa ni amɛtsɔɔ yɛ mihe+ akɛ:
“Nyɛhãa wɔkpãtãa tso lɛ kɛ enɔ yibii lɛ fɛɛ hiɛ,Ni nyɛhãa wɔfoa lɛ wɔshɛa wɔfɔ̃a kɛjea hiɛkãalɔi ashikpɔŋ lɛ nɔ,Koni akakai egbɛ́i dɔŋŋ” lɛ.
20 Shi Yehowa, taiatsɛ lɛ, kojoɔ yɛ jalɛ naa;Epɛiɔ mligbɛ susumɔi* kɛ tsui lɛ mli.+
Hã mana owele ni obaatɔ yɛ amɛnɔ lɛ,Ejaakɛ bo mikɛ misane lɛ ehã.
21 No hewɔ lɛ, nɔ ni Yehowa wieɔ eshiɔ Anatot+ hii ni taoɔ aŋɔ owala* ni amɛkɛɔ akɛ: “Kaagba yɛ Yehowa gbɛ́i mli,+ kɛjeee nakai lɛ obaatsɔ wɔnine nɔ ogbo” lɛ nɛ;
22 no hewɔ lɛ, nɔ ni Yehowa, taiatsɛ lɛ kɛɛ nɛ: “Naa, magbala amɛtoi. Oblahii lɛ baagboi yɛ klante naa,+ ni amɛbihii kɛ amɛbiyei lɛ baagboi yɛ hɔmɔ hewɔ.+
23 Amɛteŋ mɔ ko mɔ ko po eshwɛŋ, ejaakɛ mikɛ sane fɔŋ baaba Anatot+ hii lɛ anɔ yɛ afi mli ni magbala amɛtoi lɛ.”
Shishigbɛ Niŋmaa
^ Eeenyɛ efee akɛ, akɛ Yeremia miiwie.
^ Loo “aba mli nakai.”
^ Hebri sht. ŋm., “ni miteɔ shi leebi maŋkpa miwieɔ mitsɔɔ amɛ.”
^ Loo “lasu afɔlei.”
^ Loo “nyɔŋmɔ ni ji hiɛgbejianii lɛ.”
^ Ni ji, Yeremia.
^ Ni ji, afɔlei ni amɛshãa yɛ sɔlemɔ shĩa lɛ.
^ Ni ji, Yehowa.
^ Loo “mligbɛ henumɔi.” Hebri sht. ŋm., “sabai.”
^ Loo “taoɔ osusuma.”
