Yeremia 20:1-18
20 Agbɛnɛ, be ni Yeremia gbaa nibii nɛɛ, no mli lɛ, Pashur, Imer binuu lɛ, ni ji osɔfo lɛ, ni lɛ nɔŋŋ eji Yehowa shĩa lɛ nɔkwɛlɔi lɛ ahiɛnyiɛlɔ lɛ miibo toi.
2 Kɛkɛ ni Pashur gba gbalɔ Yeremia ma, ni ebɔ lɛ apã+ yɛ Benyamin Ŋwɛigbɛ Agbó ni yɔɔ Yehowa shĩa lɛ mli lɛ mli.
3 Shi enɔ jetsɛremɔ be ni Pashur jie Yeremia kɛje apã lɛ mli lɛ, Yeremia kɛɛ lɛ akɛ:
“Yehowa tsɛŋ bo Pashur* dɔŋŋ, shi moŋ ebaatsɛ bo He Fɛɛ He Efee Gbeyei.*+
4 Ejaakɛ nɔ ni Yehowa kɛɛ nɛ, ‘Mahã otsɔ gbeyei nɔ ohã bo diɛŋtsɛ ohe kɛ onanemɛi lɛ fɛɛ, ni amɛbaanyɔ yɛ amɛhenyɛlɔi lɛ aklante lɛ naa be ni ohiŋmɛii miikwɛ;+ ni mikɛ Yuda fɛɛ baawo Babilon maŋtsɛ lɛ dɛŋ, ni ebaaŋɔ amɛ nom kɛya Babilon ni ekɛ klante baagbe amɛ.+
5 Ni mikɛ maŋ nɛɛ ninámɔ lɛ fɛɛ, kɛ enii ni eyɔɔ lɛ fɛɛ, kɛ enii ni jara wa lɛ fɛɛ, kɛ Yuda maŋtsɛmɛi lɛ ajwetrii lɛ fɛɛ baawo amɛhenyɛlɔi lɛ adɛŋ.+ Ni amɛbaaloo amɛnibii lɛ, ni amɛŋɔ nibii lɛ kɛya Babilon.+
6 Ni bo Pashur, kɛ mɛi fɛɛ ni yɔɔ oshĩa lɛ mli lɛ, abaaŋɔ nyɛ nom kɛya. Akɛ bo baaya Babilon ni jɛmɛ obaagbo yɛ, ni abaafu bo kɛ onanemɛi lɛ fɛɛ yɛ jɛmɛ, ejaakɛ ogba amalei otsɔɔ amɛ.’”+
7 Ao Yehowa, oshwɛ mi akpa, ni akpa lɛ edu mi.
Okɛ ohewalɛ lɛ tsu nii yɛ minɔ, ni oye minɔ.+
Mitsɔ mɔ ni aŋmɔɔ lɛ gbi muu fɛɛ;Mɔ fɛɛ mɔ yeɔ mihe fɛo.+
8 Ejaakɛ be fɛɛ be ni mawie lɛ, ja mibolɔ ni mishiɛ akɛ,“Yiwalɛ kɛ hiɛkpatamɔ!”
Ejaakɛ Yehowa wiemɔ lɛ hãa ajɛɔ mi ni ayeɔ mihe fɛo gbi muu fɛɛ.+
9 No hewɔ lɛ, mikɛɛ akɛ: “Mitsiŋ etã dɔŋŋ,Ni miwieŋ yɛ egbɛ́i lɛ mli dɔŋŋ.”+
Shi yɛ mitsui mli lɛ, wiemɔ lɛ tsɔ tamɔ la ni miitso ni atsĩ naa awo miwui amli,Ni minyɛɛɛ naa matsĩ dɔŋŋ;Minyɛɛɛ naa madamɔ dɔŋŋ.+
10 Ejaakɛ minuɔ ni mɛi miiwie saji fɔji babaoo yɛ mihe;Gbeyei ebɔle mi.+
Amɛkɛɔ akɛ: “Nyɛkɛ sane afɔ̃a enɔ; nyɛhãa wɔkɛ sane afɔ̃a enɔ!”
Mɔ fɛɛ mɔ ni taoɔ maná toiŋjɔlɛ lɛ kwɛɔ mishigbeemɔ gbɛ+ ekɛɔ akɛ:
“Ekolɛ ebaafee buuluianii ko,Ni wɔbaaye enɔ, ni wɔbaatɔ wɔhe owele yɛ enɔ.”
11 Shi Yehowa yɛ mimasɛi tamɔ tawulɔ ni he yɔɔ gbeyei.+
No hewɔ ni mɛi ni waa mi yi lɛ baatɛrɛ ni amɛyeŋ kunim lɛ.+
Amɛhiɛ baagboi kpɔtɔɔ, ejaakɛ amɛyeŋ omanye.
Hiɛ kpaŋ amɛhiɛ ni baashwie shi kɛya naanɔ lɛ nɔ.+
12 Shi bo Yehowa, taiatsɛ, otaoɔ jalɔ mli okwɛɔ;Onaa mligbɛ susumɔi* kɛ tsui lɛ mli.+
Hã mana owele ni obaatɔ yɛ amɛnɔ lɛ,+Ejaakɛ bo mikɛ misane lɛ ehã.+
13 Nyɛláa nyɛhãa Yehowa! Nyɛjiea Yehowa yi!
Ejaakɛ ejie ohiafo* lɛ kɛje efɔŋfeelɔi lɛ adɛŋ.
14 Alomɔ gbi ni afɔ mi yɛ nɔ lɛ;
Akajɔɔ gbi ni minyɛ fɔ mi yɛ nɔ lɛ!+
15 Alomɔ nuu ni hiɛ sane kpakpa kɛbahã mitsɛ akɛ:
“Afɔ binuu ahã bo!”
Ni ehã ená miishɛɛ waa lɛ.
16 Nakai nuu lɛ atsɔ tamɔ maji ni Yehowa butu amɛ ni edɔɔɔ lɛ lɛ.*
Enu yaafo he leebi kɛ ta oshebɔɔ he shwane fintiŋŋ.
17 Mɛni hewɔ egbeee mi yɛ minyɛ musu mli,Koni minyɛ atsɔ mifuuheNi ehiɛ hɔ kɛya naanɔ?+
18 Mɛni hewɔ po mije kpo kɛje minyɛ musu mli?Koni mibana haomɔ kɛ awerɛho lo?Koni migbii lɛ aba naagbee yɛ hiɛgbele mli lo?+
Shishigbɛ Niŋmaa
^ Eshishi ji, “Nɔ Ni Eshwɛ Yɛ He Fɛɛ He.”
^ Hebri mli lɛ “Magormisabib.”
^ Loo “mligbɛ henumɔi.” Hebri sht. ŋm., “sabai.”
^ Loo “ohiafo lɛ susuma.”
^ Loo “ni eshwaaa ehe lɛ.”
