Yeremia 23:1-40
23 “Kpoo hã tookwɛlɔi ni kpãtãa gwantɛŋi ni yɔɔ milɛɛhe lɛ ahiɛ ni amɛgbɛɔ amɛ amɛshwãa lɛ!” Yehowa kɛɛ.+
2 No hewɔ lɛ, nɔ ni Yehowa, Israel Nyɔŋmɔ lɛ wieɔ eshiɔ tookwɛlɔi ni kwɛɔ mimaŋ lɛ nɔ lɛ nɛ: “Nyɛgbɛ migwantɛŋi lɛ nyɛshwã; nyɛyaa nɔ nyɛshwieɔ amɛ, ni nyɛkwɛɛɛ amɛ.”+
“No hewɔ lɛ, magbala nyɛtoi* yɛ nyɛnifeemɔi fɔji lɛ ahewɔ,” Yehowa kɛɛ.
3 “Kɛkɛ lɛ, mabua migwantɛŋi ni eshwɛ lɛ anaa kɛjɛ shikpɔji fɛɛ ni mishwie amɛ ketee nɔ lɛ anɔ,+ ni mikɛ amɛ baaku sɛɛ kɛba amɛlɛɛhe lɛ,+ ni amɛbaafɔ ni amɛyi baafa.+
4 Ni mikɛ tookwɛlɔi ni baakwɛ amɛnɔ jogbaŋŋ baato amɛnɔ.+ Amɛsheŋ gbeyei ni amɛtsui hu efãŋ dɔŋŋ, ni amɛteŋ ekome folo po elaajeŋ,” Yehowa kɛɛ.
5 “Naa! Gbii miiba,” Yehowa kɛɛ, “ni mahã tso fɔ ko ni ja atsɛ̃ ahã David.*+ Ni maŋtsɛ ko baaye nɔ+ ni ekɛ sɛɛyoomɔ baatsu nii, ni ebaaye jalɛ sane ni ebaafee nɔ ni ja yɛ shikpɔŋ lɛ nɔ.+
6 Abaahere Yuda yɛ egbii lɛ amli,+ ni Israel hu baahi shi shweshweeshwe.+ Ni gbɛ́i ni akɛbaatsɛ lɛ nɛ: Yehowa Ji Wɔjalɛ Nifeemɔ.”+
7 “Shi gbii miiba,” Yehowa kɛɛ, “ni amɛkɛŋ dɔŋŋ akɛ: ‘Gbii abɔ ni Yehowa, mɔ ni jie Israelbii lɛ kɛje Ejipt shikpɔŋ lɛ nɔ lɛ hiɛ kã nɛɛ!’+
8 shi moŋ amɛbaakɛɛ akɛ: ‘Gbii abɔ ni Yehowa, mɔ ni jie Israel shĩa lɛ seshibii lɛ kɛje kooyigbɛ shikpɔŋ lɛ nɔ kɛ shikpɔji fɛɛ ni eshwie* amɛ kɛtee nɔ lɛ anɔ ni ekɛ amɛ ku sɛɛ kɛba lɛ hiɛ kã nɛɛ,’ ni amɛbaahi amɛ diɛŋtsɛ amɛshikpɔŋ nɔ.”+
9 Gbalɔi lɛ hu anɔ nɛ:
Mitsui ekumɔ yɛ mimli.
Miwui fɛɛ miikpokpo.
Mitamɔ nuu ko ni etɔ dãaNi mitamɔ nuu ko ni wain eba ehiɛ,Yɛ Yehowa kɛ ewiemɔi krɔŋkrɔŋi lɛ ahewɔ.
10 Ejaakɛ gbalafitelɔi eyi shikpɔŋ lɛ nɔ obɔ;+Loomɔ lɛ hewɔ lɛ, shikpɔŋ lɛ miiye awerɛho+Ni kooloi alɛɛhei ni yɔɔ ŋa lɛ nɔ lɛ egbi.+
Amɛsubaŋ ehiii, ni amɛkɛ amɛhewalɛ lɛ efeee nɔ kpakpa.
11 “Gbalɔ kɛ osɔfo fɛɛ he tseee.*+
Minaa amɛnɔfɔŋfeemɔ lɛ yɛ mishĩa lɛ po,”+ Yehowa kɛɛ.
12 “No hewɔ lɛ, amɛgbɛ lɛ nɔ baashamɔ ni enɔ baawo duŋ;+Abaatsi amɛyisɛɛ ni amɛbaagbee shi.
Ejaakɛ mikɛ sane fɔŋ baaba amɛnɔYɛ afi ni makojo amɛ lɛ nɔ,” Yehowa kɛɛ.
13 “Ni mina nɔ ko ni yɔɔ taŋ yɛ Samaria+ gbalɔi lɛ ahe.
Amɛgbalɛi lɛ jɛ Baal ŋɔɔ,Ni amɛhãa mimaŋ Israel duɔ gbɛ.
14 Ni mina nibii komɛi ni bɛ hiŋmɛi nɔ yɛ Yerusalem gbalɔi lɛ ahe.
Amɛfiteɔ gbãla+ ni amɛnyiɛɔ yɛ amale mli;+Amɛwoɔ efɔŋfeelɔi hewalɛ,*Ni amɛtsiii amɛhe kɛjeee amɛnifɔjianii lɛ ahe.
Amɛ fɛɛ amɛtamɔ Sodom yɛ mihiɛ,+Ni mɛi ni yɔɔ emli lɛ tamɔ Gomora yɛ mihiɛ.”+
15 No hewɔ lɛ, nɔ ni Yehowa, taiatsɛ lɛ wieɔ eshiɔ gbalɔi lɛ nɛ:
“Naa, mahã amɛye joomɔtsoNi mahã amɛnu nu ni pɔizin yɔɔ mli.+
Ejaakɛ Yerusalem gbalɔi lɛ ehã mɛi ekwa mi yɛ shikpɔŋ lɛ nɔ fɛɛ.”
16 Nɔ ni Yehowa, taiatsɛ lɛ kɛɛ nɛ:
“Nyɛkaboa gbalɔi ni gbaa amɛtsɔɔ nyɛ lɛ awiemɔi lɛ atoi.+
Amɛmiilaka nyɛ.*
Ninaa ni amɛgbaa lɛ jɛ amɛ diɛŋtsɛ amɛtsui mli,+Ejɛɛɛ Yehowa naa.+
17 Daa kɛ daa lɛ, amɛkɛɔ mɛi ni ebuuu mi lɛ akɛ,‘Yehowa kɛɛ: “Nyɛbaaná toiŋjɔlɛ.”’+
Ni amɛkɛɔ mɔ fɛɛ mɔ ni nyiɛɔ etsuiŋwalɛ lɛ sɛɛ lɛ akɛ,‘Sane fɔŋ ko baŋ onɔ.’+
18 Ejaakɛ namɔ damɔɔ mɛi ni bɛŋkɛ Yehowa lɛ ateŋ,Koni ena ni enu ewiemɔ lɛ?
Namɔ boɔ ewiemɔ lɛ toi jogbaŋŋ koni enu?
19 Naa! Yehowa kɔɔyɔɔ ni naa wa lɛ baatswa kɛ mlifu;Ebaabɔle mɛi fɔji lɛ ayitsei ahe tamɔ ahum ni miibɔle ehe.+
20 Yehowa mlifu lɛ ekuŋ esɛɛKɛyashi ebaatsu etsuiŋ yiŋtoi lɛ ahe nii, ni egbe naa.
Yɛ gbii lɛ anaagbee lɛ mli lɛ, obaanu enɛ shishi jogbaŋŋ.
21 Mitsuko gbalɔi lɛ shi amɛhiɛ foi.
Mikɛ amɛ ewieko shi amɛgba.+
22 Shi eji amɛbadamɔ mɛi ni bɛŋkɛ mi lɛ ateŋ kulɛ,Amɛbaahã mimaŋ lɛ anu miwiemɔi lɛNi kulɛ no baahã amɛku amɛsɛɛ kɛje amɛgbɛ fɔŋ lɛ nɔ ni amɛkpa amɛnifeemɔi fɔji lɛ afeemɔ.”+
23 “Ani ja mibɛŋkɛ pɛ dani miji Nyɔŋmɔ? Kɛ́ miyɛ shɔŋŋ lɛ jeee Nyɔŋmɔ ji mi lo?” Yehowa kɛɛ.
24 “Ani mɔ ko baanyɛ atee yɛ teemɔhe ko ni minaŋ lɛ?”+ Yehowa kɛɛ.
“Ani miyiko ŋwɛi kɛ shikpɔŋ lɛ fɛɛ obɔ?”+ Yehowa kɛɛ.
25 “Minu amale gbalɛi ni gbalɔi lɛ gbaa yɛ migbɛ́i mli akɛ, ‘Mila lamɔ ko! Mila lamɔ ko!’ lɛ.+
26 Mɛɛ be nɔŋŋ enɛ baaya nɔ yɛ gbalɔi lɛ atsui mli kɛyashi, akɛ amɛbaaya nɔ amɛgba amale gbalɛi? Amɛji gbalɔi yɛ amɛ diɛŋtsɛ amɛtsui mli lakamɔ lɛ naa.+
27 Amɛmiitao amɛtsɔ lamɔi ni amɛgbaa amɛhe lɛ nɔ amɛhã mimaŋ lɛ hiɛ akpa migbɛ́i lɛ nɔ, tamɔ bɔ ni amɛtsɛmɛi lɛ ahiɛ kpa migbɛ́i lɛ nɔ yɛ Baal hewɔ lɛ.+
28 Kɛ́ gbalɔ ko ela lamɔ ko lɛ, egba lamɔ lɛ, shi mɔ ni hiɛ miwiemɔ lɛ, ewie miwiemɔ lɛ mli anɔkwale lɛ.”
“Mɛni jwɛi yɔɔ kɔmɔ yɛ ŋmaa* mli?” Yehowa kɛɛ.
29 “Ani miwiemɔ lɛ tamɔɔɔ la,”+ Yehowa kɛɛ, “ni etamɔɔɔ hamlɛ ni jwaraa tɛsaa?”+
30 “No hewɔ lɛ, naa, mikɛ gbalɔ fɛɛ gbalɔ ni juɔ miwiemɔ lɛ yɛ enyɛmi gbalɔ naa lɛ ená,”+ Yehowa kɛɛ.
31 “Naa, mikɛ gbalɔi ni kɛ amɛlilɛi kɛɔ akɛ, ‘Nɔ ni ekɛɛ nɛ!’ lɛ ená,” Yehowa kɛɛ.+
32 “Naa, mikɛ gbalɔi ni laa amale lamɔi, ni amɛgbaa amɛtsɔɔ mimaŋ lɛ, ni amɛhãa mimaŋ lɛ duɔ gbɛ yɛ amɛmalemɔi kɛ amɛshwãa lɛ hewɔ lɛ ená,”+ Yehowa kɛɛ.
“Shi mitsuko amɛ, ni mifãko amɛ hu. No hewɔ lɛ, amɛyeŋ amɛbuaŋ maŋ nɛɛ kwraa,”+ Yehowa kɛɛ.
33 “Ni kɛ́ maŋ nɛɛ, loo gbalɔ ko, loo osɔfo ko bi bo akɛ, ‘Mɛni ji Yehowa jatsu* lɛ?’ kɛɛmɔ amɛ akɛ, ‘“Nyɛ, nyɛji jatsu lɛ! Ni mafɔ̃ nyɛ mashɛ mafɔ̃,”+ Yehowa kɛɛ.’
34 Ni gbalɔ fɛɛ gbalɔ, loo osɔfo fɛɛ osɔfo, loo maŋbii lɛ ateŋ mɔ ni baakɛɛ akɛ, ‘Yehowa jatsu* nɛ!’ lɛ, majie mihiɛ maka nakai mɔ lɛ kɛ eshĩabii.
35 Nɔ ni nyɛteŋ mɔ fɛɛ mɔ kɛɔ enyɛmi gbɔmɔ kɛ lɛ diɛŋtsɛ enyɛmi nɛ, ‘Mɛɛ hetoo Yehowa kɛhã? Ni mɛni Yehowa ekɛɛ?’
36 Shi nyɛkatsĩa Yehowa jatsu* lɛ tã dɔŋŋ, ejaakɛ nyɛteŋ mɔ fɛɛ mɔ daaŋ wiemɔ lɛ ji jatsu* lɛ, ni nyɛtsake Nyɔŋmɔ hiɛkãalɔ, Yehowa, taiatsɛ lɛ, ni ji wɔ-Nyɔŋmɔ lɛ wiemɔi lɛ.
37 “Nɔ ni okɛɛ gbalɔ lɛ nɛ, ‘Mɛɛ hetoo Yehowa kɛhã bo? Ni mɛni Yehowa ekɛɛ?
38 Ni kɛ́ nyɛtee nɔ nyɛkɛɛ akɛ, “Yehowa jatsu* lɛ!” nɔ ni Yehowa kɛɛ nɛ: “Akɛni nyɛmiikɛɛ akɛ, ‘Wiemɔ nɛɛ ji Yehowa jatsu* lɛ,’ be ni mikɛɛ nyɛ akɛ, ‘Nyɛkakɛa akɛ: “Yehowa jatsu* lɛ!”’ hewɔ lɛ,
39 naa! mawó nyɛ mashɛ mafɔ̃ kɛje mihiɛ, nyɛ kɛ maŋ ni mikɛhã nyɛ kɛ nyɛtsɛmɛi lɛ fɛɛ.
40 Ni mawo nyɛ hiɛgbele kɛya naanɔ ni mashwie nyɛhiɛ shi hu kɛya naanɔ, bɔ ni hiɛ kpaŋ nɔ kɔkɔɔkɔ.”’”+
Shishigbɛ Niŋmaa
^ Loo “matsɔ mihiɛ mawo nyɛ.”
^ Loo “ni matee niyelɔ ko ni ja shi mahã David.”
^ Hebri sht. ŋm., “mishwie.”
^ Loo “ekwa mi.”
^ Hebri sht. ŋm., “Amɛwajeɔ efɔŋfeelɔi aniji.”
^ Loo “Amɛkɛ hiɛnɔkamɔ ni bɛ mli miiwo nyɛmli.”
^ Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
^ Loo “sane ni tsii.” Hebri wiemɔ ni akɛtsu nii yɛ biɛ lɛ hiɛ shishinumɔi enyɔ. Abaanyɛ atsɔɔ shishi akɛ, “sane ni tsii ni jɛ Nyɔŋmɔ ŋɔɔ,” loo “nɔ ko ni tsii.”
^ Loo “sane ni tsii.”
^ Loo “sane ni tsii.”
^ Loo “sane ni tsii.”
^ Loo “sane ni tsii.”
^ Loo “sane ni tsii.”
^ Loo “sane ni tsii.”
