Yeremia 24:1-10
-
Agbamii kpakpai kɛ agbamii ni ehiii (1-10)
24 Be ni Babilon maŋtsɛ Nebukadnezar* eŋɔ Yekonia,*+ Yehoiakim binuu lɛ,+ ni ji Yuda maŋtsɛ lɛ, kɛ Yuda lumɛi lɛ, kɛ ŋaalɔi lɛ, kɛ sɔ̃lɔi* lɛ nom kɛjɛ Yerusalem kɛtee Babilon+ lɛ sɛɛ lɛ, Yehowa hã mina kɛntɛŋi enyɔ ni amɛyimɔ obɔbɔ kɛ agbamii ni mamɔ Yehowa sɔlemɔ shĩa lɛ hiɛ.
2 Agbamii kpakpai ni hi jogbaŋŋ diɛŋtsɛ yɛ kɛntɛŋ kome mli, amɛtamɔ agbamii ni tsu klɛŋklɛŋ, shi agbamii ni ehiii kwraa yɛ kɛntɛŋ kroko lɛ mli, ehiii aahu akɛ ehiii yeli.
3 Kɛkɛ ni Yehowa bi mi akɛ: “Yeremia, mɛni onaa?” No hewɔ lɛ, mikɛɛ akɛ: “Agbamii; agbamii kpakpai lɛ hi jogbaŋŋ diɛŋtsɛ, shi nɔ ni ehiii lɛ, ehiii aahu akɛ ehiii yeli.”+
4 Kɛkɛ ni Yehowa kɛɛ mi* akɛ:
5 “Nɔ ni Yehowa, Israel Nyɔŋmɔ lɛ kɛɛ nɛ, ‘Bɔ ni agbamii kpakpai nɛɛ ji lɛ, nakai mana Yudabii ni aŋɔ amɛ nom kɛjɛ biɛ kɛtee Kaldeabii lɛ ashikpɔŋ lɛ nɔ lɛ yɛ gbɛ kpakpa nɔ.
6 Mahã mihiŋmɛii ahi amɛhe koni mafee amɛ ekpakpa, ni mahã amɛku amɛsɛɛ kɛba shikpɔŋ nɛɛ nɔ.+ Matswa amɛ mama shi, ni mikumɔŋ amɛ; madu* amɛ, ni mifãŋ amɛ.+
7 Ni mahã amɛ tsui ni amɛkɛle mi, akɛ miji Yehowa.+ Amɛbaatsɔ mimaŋ, ni matsɔ amɛ-Nyɔŋmɔ,+ ejaakɛ amɛkɛ amɛtsui fɛɛ baaku amɛsɛɛ kɛba miŋɔɔ.+
8 “‘Shi nɔ ni Yehowa wieɔ yɛ agbamii gbohii ni ehiii aahu akɛ ehiii yeli+ lɛ ahe nɛ: “Nakai mana Yuda maŋtsɛ Zedekia,+ kɛ elumɛi lɛ, kɛ Yerusalembii ni eshwɛ ni yɔɔ shikpɔŋ nɛɛ nɔ, kɛ mɛi ni yɔɔ Ejipt shikpɔŋ lɛ nɔ lɛ.+
9 Mahã amɛtsɔ nɔ ko ni hãa mɔ he jɔ̃ɔ ehe, kɛ sane fɔŋ kɛhã shikpɔŋ lɛ nɔ maŋtsɛyelii lɛ fɛɛ,+ amɛbaatsɔ ahorabɔɔ nɔ, abɛbuu nɔ, nɔ ni akɛyeɔ fɛo, kɛ loomɔ+ yɛ hei fɛɛ ni mashwie amɛ kɛya lɛ.+
10 Ni matsu klante,+ kɛ hɔmɔ, kɛ tsɛŋemɔ hela ni gbeɔ mɔ+ kɛnyiɛ amɛsɛɛ kɛyashi amɛbaatã yɛ shikpɔŋ ni mikɛhã amɛ kɛ amɛtsɛmɛi lɛ nɔ.”’”
Shishigbɛ Niŋmaa
^ Hebri sht. ŋm., “Nebukadrezar,” gbɛ kroko ni aŋmaa egbɛ́i lɛ.
^ Atsɛɔ lɛ hu akɛ Yehoiakin kɛ Konia.
^ Shishitsɔɔmɔi komɛi kɛɔ akɛ, “gbogbotswalɔi.”
^ Loo “Kɛkɛ ni Yehowa wiemɔ ba miŋɔɔ.”
^ Loo “matɛo.”
