Yeremia 28:1-17
-
Yeremia kɛ amale gbalɔ Hanania (1-17)
28 Yɛ nakai afi lɛ mli nɔŋŋ yɛ Yuda maŋtsɛ Zedekia+ nɔyeli lɛ shishijee mli, yɛ afi ni ji ejwɛ lɛ mli yɛ nyɔɔŋ ni ji enumɔ lɛ mli lɛ, gbalɔ Hanania, Azur ni jɛ Gibeon+ lɛ binuu lɛ kɛɛ mi yɛ Yehowa shĩa lɛ yɛ osɔfoi lɛ kɛ maŋbii lɛ fɛɛ ahiɛ akɛ:
2 “Nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ, ‘Makumɔ Babilon maŋtsɛ lɛ kɔɔŋtso lɛ.+
3 Biɛ afii enyɔ* mli lɛ, mikɛ Yehowa shĩa lɛ nibii fɛɛ ni Babilon maŋtsɛ Nebukadnezar loo kɛje biɛ kɛtee Babilon lɛ baaku sɛɛ kɛba biɛ ekoŋŋ.’”+
4 “‘Agbɛnɛ hu, mikɛ Yekonia,+ Yehoiakim+ binuu lɛ, ni ji Yuda maŋtsɛ lɛ kɛ mɛi fɛɛ ni aŋɔ amɛ nom kɛjɛ Yuda kɛtee Babilon lɛ baaku sɛɛ kɛba biɛ ekoŋŋ,’+ Yehowa kɛɛ, ‘ejaakɛ makumɔ Babilon maŋtsɛ lɛ kɔɔŋtso lɛ.’”
5 Kɛkɛ ni gbalɔ Yeremia kɛ gbalɔ Hanania wie yɛ osɔfoi lɛ kɛ maŋbii lɛ fɛɛ ni damɔ shi yɛ Yehowa shĩa lɛ ahiɛ.
6 Gbalɔ Yeremia kɛɛ akɛ: “Amen!* Yehowa afee nakai! Yehowa ahã wiemɔi ni ogba lɛ aba mli, ni ekɛ Yehowa shĩa lɛ nibii lɛ kɛ mɛi fɛɛ ni aŋɔ amɛ nom lɛ aku sɛɛ kɛjɛ Babilon kɛba!
7 Shi ofainɛ, bo sane nɛɛ ni miwieɔ yɛ otoiiaŋ kɛ maŋbii lɛ fɛɛ atoiiaŋ lɛ toi.
8 Gbalɔi ni tsɔ mi kɛ bo fɛɛ hiɛ kɛjɛ blema lɛ gba amɛshi shikpɔji babaoo kɛ maŋtsɛyelii kpelei akɛ tai, kɛ saji fɔji, kɛ tsɛŋemɔ helai ni gbeɔ mɔ baaba amɛnɔ.
9 Kɛ́ gbalɔ ko gba akɛ toiŋjɔlɛ baaba, ni gbalɔ lɛ wiemɔ lɛ ba mli lɛɛlɛŋ lɛ, no akɛleɔ akɛ Yehowa ji mɔ ni tsu nakai gbalɔ lɛ lɛɛlɛŋ.”
10 Kɛkɛ ni gbalɔ Hanania jie kɔɔŋtso lɛ kɛje gbalɔ Yeremia kuɛ, ni ekumɔ mli.+
11 Ni Hanania kɛɛ yɛ maŋbii lɛ fɛɛ ahiɛ akɛ: “Nɔ ni Yehowa kɛɛ nɛ, ‘Nɛkɛ pɛpɛɛpɛ mibakumɔ Babilon maŋtsɛ Nebukadnezar kɔɔŋtso lɛ kɛje jeŋmaji lɛ fɛɛ akuɛ yɛ biɛ afii enyɔ mli.’”+ Ni gbalɔ Yeremia yi mli etee.
12 Be ni gbalɔ Hanania kumɔ kɔɔŋtso lɛ kɛje gbalɔ Yeremia kuɛ lɛ sɛɛ lɛ, Yehowa wiemɔ nɛɛ ba Yeremia ŋɔɔ akɛ:
13 “Yaa ni oyakɛɛ Hanania akɛ, ‘Nɔ ni Yehowa kɛɛ nɛ: “Okumɔ tso kɔɔŋtsei,+ shi obaafee dade kɔɔŋtsei oto amɛnajiaŋ.”
14 Ejaakɛ nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ: “Mikɛ dade kɔɔŋtso baafɔ̃ jeŋmaji nɛɛ fɛɛ akuɛ koni amɛsɔmɔ Babilon maŋtsɛ Nebukadnezar, ni amɛbaasɔmɔ lɛ kɛ̃.+ Mikɛ ŋa nɔ kooloi po baahã lɛ.”’”+
15 Kɛkɛ ni gbalɔ Yeremia kɛɛ gbalɔ Hanania+ akɛ: “Bo Hanania, ofainɛ, bo toi! Yehowa tsuko bo, shi ohã maŋ nɛɛ kɛ amɛhiɛ efɔ̃ amale nɔ.+
16 No hewɔ lɛ, nɔ ni Yehowa kɛɛ nɛ, ‘Naa! Miijie bo kɛmiije shikpɔŋ lɛ nɔ. Afi nɛɛ obaagbo, ejaakɛ owo mɛi hewalɛ koni amɛtse Yehowa hiɛ atua.’”+
17 No hewɔ lɛ, gbalɔ Hanania gbo yɛ nakai afi lɛ mli, yɛ nyɔɔŋ ni ji kpawo lɛ mli.
