Yeremia 34:1-22
34 Wiemɔ ni jɛ Yehowa ŋɔɔ ba Yeremia ŋɔɔ, be ni Babilon maŋtsɛ Nebukadnezar* kɛ esraafoi lɛ fɛɛ, kɛ shikpɔŋ lɛ nɔ maŋtsɛyelii fɛɛ ni yɔɔ enɔyeli shishi kɛ majimaji lɛ fɛɛ miiwu amɛmiishi Yerusalem kɛ emaji lɛ fɛɛ lɛ nɛ:+
2 “Nɔ ni Yehowa, Israel Nyɔŋmɔ lɛ kɛɛ nɛ, ‘Yaa ni okɛ Yuda maŋtsɛ Zedekia+ ayawie ni okɛɛ lɛ akɛ: “Nɔ ni Yehowa kɛɛ nɛ, ‘Naa, mikɛ maŋ nɛɛ miiwo Babilon maŋtsɛ lɛ dɛŋ, ni ekɛ la baashã maŋ lɛ.+
3 Ni bo diɛŋtsɛ hu ojeŋ edɛŋ, ejaakɛ bɔ fɛɛ bɔ ni fee lɛ abaamɔ bo ni akɛ bo baawo edɛŋ.+ Ni obaana Babilon maŋtsɛ lɛ hiɛ kɛ hiɛ, ni ekɛ bo baawie naabu kɛ naabu, ni obaaya Babilon.’+
4 Shi bo Yuda maŋtsɛ Zedekia, bo Yehowa wiemɔ lɛ toi, ‘Nɔ ni Yehowa kɛɛ yɛ ohe nɛ: “Ogboŋ yɛ klante naa.
5 Obaagbo yɛ toiŋjɔlɛ mli,+ ni amɛbaashã nii amɛhã bo tamɔ bɔ ni amɛfee amɛhã otsɛmɛi lɛ, blema maŋtsɛmɛi ni tsɔ ohiɛ lɛ, ni amɛbaafó bo akɛ, ‘Ao, nuŋtsɔ, kpoo oo!’ ejaakɛ ‘Mi miwie wiemɔ lɛ,’ Yehowa kɛɛ.”’”’”
6 Kɛkɛ ni gbalɔ Yeremia yajaje wiemɔi nɛɛ fɛɛ etsɔɔ Yuda maŋtsɛ Zedekia yɛ Yerusalem,
7 be ni Babilon maŋtsɛ lɛ asraafoi lɛ miiwu amɛmiishi Yerusalem, kɛ Yuda maji ni eshwɛ lɛ,+ kɛ Lakish,+ kɛ Azeka+ lɛ; ejaakɛ maji nɛɛ pɛ ji maji ni atswa gbogboi awo amɛhe ni eshwɛ yɛ Yuda maji lɛ ateŋ.
8 Wiemɔ ni jɛ Yehowa ŋɔɔ ba Yeremia ŋɔɔ, be ni Maŋtsɛ Zedekia kɛ mɛi fɛɛ ni yɔɔ Yerusalem lɛ ekpaŋ kpaŋmɔ koni ashiɛ heyeli ahã amɛ lɛ sɛɛ nɛ,+
9 ashiɛ akɛ mɔ fɛɛ mɔ ahã enyɔji ni ji Hebribii, hii kɛ yei fɛɛ, aye amɛhe, koni mɔ ko mɔ ko kɛ enyɛmi Yudanyo akahi shi akɛ enyɔŋ dɔŋŋ.
10 No hewɔ lɛ, lumɛi lɛ kɛ maŋbii lɛ fɛɛ bo toi. Amɛkpaŋ kpaŋmɔ akɛ mɔ fɛɛ mɔ ahã enyɔji hii kɛ yei fɛɛ aye amɛhe, ni amɛkɛ amɛ akahi shi akɛ amɛnyɔji dɔŋŋ. Amɛbo toi, ni amɛŋmɛɛ amɛhe.
11 Shi sɛɛ mli lɛ, amɛhã nyɔji hii kɛ yei ni amɛŋmɛɛ amɛhe lɛ ku sɛɛ kɛba amɛŋɔɔ ekoŋŋ, ni amɛnyɛ amɛnɔ koni amɛtsɔmɔ amɛnyɔji ekoŋŋ.
12 No hewɔ lɛ, Yehowa wiemɔ jɛ Yehowa ŋɔɔ ba Yeremia ŋɔɔ akɛ:
13 “Nɔ ni Yehowa, Israel Nyɔŋmɔ lɛ kɛɛ nɛ, ‘Mikɛ nyɛtsɛmɛi lɛ kpaŋ kpaŋmɔ+ yɛ gbi nɔ ni mijie amɛ kɛje Ejipt shikpɔŋ lɛ nɔ, kɛje nyɔji ashĩa+ lɛ akɛ:
14 “Kɛ́ afii kpawo lɛ ba naagbee lɛ, nyɛteŋ mɔ fɛɛ mɔ aŋmɛa enyɛmi Hebrinyo ni ahɔ̃ɔ lɛ ahã lɛ, ni esɔmɔ lɛ afii ekpaa lɛ he; ŋmɛɛmɔ ehe.”+ Shi nyɛtsɛmɛi lɛ booo toi, ni amɛbaaa amɛtoi shi hu amɛhãaa mi.
15 Ni nyɛsɛɛ nɛɛ nɔŋŋ lɛ,* nyɛ diɛŋtsɛ nyɛku nyɛsɛɛ ni nyɛfee nɔ ni sa mihiɛ ni nyɛshiɛ heyeli nyɛhã nyɛhe gbɔmɛi, ni nyɛkpaŋ kpaŋmɔ yɛ mihiɛ yɛ shĩa ni migbɛ́i kã nɔ lɛ mli.
16 Shi nyɛku nyɛsɛɛ ni nyɛbule migbɛ́i lɛ,+ ejaakɛ nyɛhã nyɛnyɔji hii kɛ yei ni nyɛŋmɛɛ amɛhe yɛ amɛsuɔmɔnaa* lɛ eku amɛsɛɛ kɛba ekoŋŋ, ni nyɛnyɛ amɛnɔ koni amɛtsɔmɔ nyɛnyɔji ekoŋŋ.’
17 “No hewɔ lɛ, nɔ ni Yehowa kɛɛ nɛ: ‘Nyɛboko mi toi yɛ heyeli ni nyɛteŋ mɔ fɛɛ mɔ shiɛ ehã enyɛmi kɛ ehe gbɔmɔ lɛ mli.+ No hewɔ lɛ, agbɛnɛ mi hu mashiɛ heyeli mahã nyɛ,’ Yehowa kɛɛ, ‘kɛhã klante, kɛ tsɛŋemɔ hela ni gbeɔ mɔ, kɛ hɔmɔ,+ ni mahã nyɛtsɔ nɔ ko ni hãa mɔ he jɔ̃ɔ ehe mahã shikpɔŋ lɛ nɔ maŋtsɛyelii lɛ fɛɛ.+
18 Ni nɔ ni baaba hii ni ku mikpaŋmɔ lɛ mli ni amɛyeee kpaŋmɔ ni amɛkpaŋ yɛ mihiɛ be ni amɛgba tsinabi lɛ mli enyɔ ni amɛtsɔ efãfãi lɛ ateŋ kɛho lɛ nɔ lɛ anɔ nɛ,+
19 ni tsɔɔ akɛ nɔ ni baaba Yuda lumɛi lɛ, kɛ Yerusalem lumɛi lɛ, kɛ maŋtsɛ shĩa onukpai lɛ, kɛ osɔfoi lɛ, kɛ shikpɔŋ lɛ nɔ bii lɛ fɛɛ ni tsɔ tsinabi lɛ fãfãi lɛ ateŋ kɛho lɛ anɔ nɛ:
20 mikɛ amɛ baawo amɛhenyɛlɔi lɛ, kɛ mɛi ni taoɔ ashɔ̃ amɛwala yɛ amɛdɛŋ* lɛ adɛŋ, ni amɛgbohii lɛ baatsɔ niyenii ahã ŋwɛi loofɔji kɛ shikpɔŋ lɛ nɔ kooloi.+
21 Ni mikɛ Yuda maŋtsɛ Zedekia kɛ elumɛi lɛ baawo amɛhenyɛlɔi lɛ, kɛ mɛi ni taoɔ ashɔ̃ amɛwala yɛ amɛdɛŋ* lɛ, kɛ Babilon maŋtsɛ lɛ asraafoi ni ba amɛ tutuamɔ shi amɛmiiku amɛsɛɛ+ lɛ adɛŋ.’+
22 “‘Naa, mikɛ famɔ baahã,’ Yehowa kɛɛ, ‘ni mikɛ amɛ baaku sɛɛ kɛba nɛkɛ maŋ nɛɛ mli, ni amɛbaawu amɛshi maŋ lɛ, ni amɛbaaŋɔ maŋ lɛ, ni amɛbaashã maŋ lɛ kɛ la;+ ni mahã Yuda maji lɛ atsɔmɔ shikpɔji ni akɛfeee nɔ ko ni mɔ ko mɔ ko ehiii mli.’”+
Shishigbɛ Niŋmaa
^ Hebri sht. ŋm., “Nebukadrezar,” gbɛ kroko ni aŋmaa egbɛ́i lɛ.
^ Hebri sht. ŋm., “Ni ŋmɛnɛ lɛ.”
^ Loo “yɛ amɛsusuma naa.”
^ Loo “mɛi ni taoɔ amɛsusumai.”
^ Loo “mɛi ni taoɔ amɛsusumai.”
