Yeremia 40:1-16
40 Wiemɔ ni jɛ Yehowa ŋɔɔ ba Yeremia ŋɔɔ be ni Nebuzaradan,+ bulɔi lɛ anɔkwɛlɔ lɛ eŋmɛɛ ehe yɛ Rama+ lɛ sɛɛ lɛ. Ekɛ lɛ tee jɛmɛ ní ewo eniji gboklɛi, ni efata Yerusalembii kɛ Yudabii fɛɛ ni aaŋɔ amɛ nom kɛmiiya Babilon lɛ ahe.
2 Kɛkɛ ni bulɔi lɛ anɔkwɛlɔ lɛ ŋɔ Yeremia kɛtee afã ni ekɛɛ lɛ akɛ: “Yehowa, o-Nyɔŋmɔ lɛ, gba sane fɔŋ nɛɛ eshi biɛ nɛɛ,
3 ni Yehowa ehã nɔ ni ewie lɛ eba mli pɛpɛɛpɛ, ejaakɛ nyɛfee esha nyɛshi Yehowa, ni nyɛbooo egbee toi. No hewɔ ni nɛkɛ sane nɛɛ eba nyɛnɔ lɛ.+
4 Shi ŋmɛnɛ lɛ, miifɛne gboklɛi ni akɛwo oniji lɛ. Kɛ́ esa ohiɛ akɛ ofata mihe kɛya Babilon lɛ, ba, ni makwɛ bo. Shi kɛ́ osumɔɔɔ akɛ ofataa mihe kɛyaa Babilon lɛ, kaaba. Kwɛmɔ! Shikpɔŋ muu lɛ fɛɛ kã ohiɛ nɛɛ. Yaa he fɛɛ he ni osumɔɔ.”+
5 Be ni Yeremia yɔɔ jɛmɛ lolo ni ekuko esɛɛ lɛ, Nebuzaradan kɛɛ akɛ: “Kuu osɛɛ kɛya Gedalia,+ Shafan+ binuu Ahikam+ binuu lɛ, mɔ ni Babilon maŋtsɛ lɛ ewó lɛ Yuda maji lɛ anɔ lumɔ lɛ ŋɔɔ, ni okɛ lɛ ayahi shi yɛ maŋbii lɛ ateŋ; loo yaa he fɛɛ he ni osumɔɔ.”
Kɛkɛ ni bulɔi lɛ anɔkwɛlɔ lɛ hã lɛ niyenii, kɛ nikeenii, ni ehã etee.
6 No hewɔ lɛ, Yeremia tee Gedalia, Ahikam binuu lɛ ŋɔɔ yɛ Mizpa,+ ni ekɛ lɛ yahi shi yɛ maŋbii ni eshwɛ yɛ shikpɔŋ lɛ nɔ lɛ ateŋ.
7 Sɛɛ mli lɛ, tatsɛmɛi ni kɛ amɛhii lɛ yɔɔ ŋa lɛ nɔ lɛ nu akɛ Babilon maŋtsɛ lɛ ewó Gedalia, Ahikam binuu lɛ lumɔ yɛ shikpɔŋ lɛ nɔ, ni ekɛ hii, kɛ yei, kɛ gbekɛbii ni jɛ shikpɔŋ lɛ nɔ ohiafoi lɛ ateŋ ni aŋɔko amɛ nom kɛyako Babilon lɛ ewo eshishi.+
8 No hewɔ lɛ, amɛba Gedalia ŋɔɔ yɛ Mizpa.+ Amɛji Ishmael,+ Netania binuu lɛ, kɛ Yohanan+ kɛ Yonatan, Karea bihii lɛ, kɛ Seraia, Tanhumet binuu lɛ, kɛ Netofatnyo Efai bihii lɛ, kɛ Yezania,+ Maakatnyo lɛ binuu lɛ, kɛ amɛhii ni fata amɛhe lɛ.
9 Gedalia, Shafan binuu Ahikam binuu lɛ kã amɛ kɛ amɛhii lɛ kitã akɛ: “Nyɛkashea gbeyei akɛ nyɛbaasɔmɔ Kaldeabii lɛ. Nyɛhia shikpɔŋ lɛ nɔ, ni nyɛsɔmɔa Babilon maŋtsɛ lɛ, ni ebaahi ehã nyɛ.+
10 Mi lɛ, mahi Mizpa koni madamɔ Kaldeabii lɛ ni baa wɔŋɔɔ lɛ ahiɛ mahã nyɛ. Shi nyɛyabuaa wain yibii, kɛ latsa beiaŋ aduawai, kɛ mu naa nyɛwoa nyɛgbɛ́i ni nyɛkɛ nii toɔ mli lɛ amli, ni nyɛhi maji ni nyɛyahi mli lɛ amli.”+
11 Ni Yudafoi fɛɛ ni yɔɔ Moab, kɛ Amon, kɛ Edom, kɛ amɛteŋ mɛi ni yɔɔ shikpɔji krokomɛi lɛ fɛɛ anɔ lɛ hu nu akɛ Babilon maŋtsɛ lɛ eshi mɛi komɛi yɛ Yuda, ni ewó Gedalia, Shafan binuu Ahikam binuu lɛ lumɔ eto amɛnɔ.
12 No hewɔ lɛ, Yudafoi lɛ fɛɛ bɔi amɛsɛɛkuu kɛjɛ hei fɛɛ ni ashwie amɛ kɛtee lɛ, ni amɛba Gedalia ŋɔɔ yɛ Mizpa yɛ Yuda shikpɔŋ lɛ nɔ. Ni amɛbua wain yibii kɛ latsa beiaŋ aduawai babaoo diɛŋtsɛ anaa.
13 Yohanan, Karea binuu lɛ, kɛ tatsɛmɛi lɛ fɛɛ ni yɔɔ ŋa lɛ nɔ lɛ ba Gedalia ŋɔɔ yɛ Mizpa.
14 Amɛkɛɛ lɛ akɛ: “Ani oleee akɛ, Baalis, Amonbii+ lɛ amaŋtsɛ lɛ etsu Ishmael, Netania binuu lɛ koni ebagbe bo?”+ Shi Gedalia, Ahikam binuu lɛ heee amɛ eyeee.
15 Kɛkɛ ni Yohanan, Karea binuu lɛ kɛɛ Gedalia yɛ teemɔŋ yɛ Mizpa akɛ: “Miitao maya ni mayatswa Ishmael, Netania binuu lɛ nɔ ni egbo, ni mɔ ko mɔ ko leŋ. Mɛni hewɔ esa akɛ egbe bo,* ni mɛni hewɔ esa akɛ agbɛ Yudabii fɛɛ ni ebua amɛhe naa kɛba oŋɔɔ lɛ ashwã, ni Yudabii ni eshwɛ lɛ agboi?”
16 Shi Gedalia,+ Ahikam binuu lɛ kɛɛ Yohanan, Karea binuu lɛ akɛ: “Kaafee nakai, ejaakɛ nɔ ni owieɔ yɛ Ishmael he lɛ ji amale.”
Shishigbɛ Niŋmaa
^ Loo “etswa osusuma nɔ.”
