Yeremia 42:1-22
42 Kɛkɛ ni tatsɛmɛi lɛ fɛɛ kɛ Yohanan,+ Karea binuu lɛ, kɛ Yezania, Hoshaia binuu lɛ, kɛ maŋbii lɛ fɛɛ, kɛjɛ mɔ bibioo fe fɛɛ nɔ kɛyashi mɔ wulu fe fɛɛ nɔ tsi amɛbɛŋkɛ
2 ni amɛkɛɛ gbalɔ Yeremia akɛ: “Ofainɛ, bo fai ni wɔkpaa bo lɛ toi, ni osɔle ohã Yehowa, o-Nyɔŋmɔ lɛ, ohã mɛi ni eshwɛ nɛɛ fɛɛ, ejaakɛ tamɔ bɔ ni onaa nɛɛ, kulɛ wɔyi fa babaoo, shi amrɔ nɛɛ eshwɛ wɔyi fioo pɛ.+
3 Yehowa, o-Nyɔŋmɔ lɛ atsɔɔ wɔ gbɛ ni wɔnyiɛ nɔ, kɛ nɔ ni esa akɛ wɔfee.”
4 Gbalɔ Yeremia here amɛ nɔ akɛ: “Minu, ni masɔle mahã Yehowa, nyɛ-Nyɔŋmɔ lɛ, tamɔ bɔ ni nyɛkɛɛ lɛ; ni wiemɔ fɛɛ wiemɔ ni Yehowa kɛbaahã nyɛ hetoo lɛ, makɛɛ nyɛ. Mikɛ sane ko sane ko eteŋ nyɛ.”
5 Ni amɛhere Yeremia nɔ akɛ: “Yehowa afee anɔkwa odasefonyo ni aheɔ lɛ ayeɔ ashi wɔ kɛ́ wɔyeee wiemɔ fɛɛ wiemɔ ni Yehowa, o-Nyɔŋmɔ lɛ, baatsɔ onɔ ekɛɛ wɔ lɛ nɔ pɛpɛɛpɛ lɛ.
6 Ekpakpa jio, efɔŋ jio, wɔbaabo Yehowa, wɔ-Nyɔŋmɔ lɛ, mɔ ni wɔtsuɔ bo eŋɔɔ lɛ gbee toi, koni ahi ahã wɔ, ejaakɛ wɔbo Yehowa, wɔ-Nyɔŋmɔ lɛ, gbee toi.”
7 Gbii nyɔŋma sɛɛ lɛ, Yehowa kɛ Yeremia wie.
8 No hewɔ lɛ, etsu ayatsɛ Yohanan, Karea binuu lɛ, kɛ tatsɛmɛi ni fata ehe lɛ fɛɛ, kɛ maŋbii lɛ fɛɛ kɛba, kɛjɛ mɔ bibioo fe fɛɛ nɔ kɛyashi mɔ wulu fe fɛɛ nɔ.+
9 Ekɛɛ amɛ akɛ: “Nɔ ni Yehowa, Israel Nyɔŋmɔ lɛ, mɔ ni nyɛtsu mi eŋɔɔ koni mikɛ fai ni nyɛkpaa koni ena nyɛ mɔbɔ lɛ ayafɔ̃ ehiɛ lɛ kɛɛ nɛ:
10 ‘Kɛ́ nyɛbaaya nɔ nyɛhi shikpɔŋ nɛɛ nɔ lɛ, no lɛ, matswa nyɛ mama shi, ni mikumɔŋ nyɛ mishwieŋ shi, ni madu* nyɛ ni mifamɔŋ nyɛ, ejaakɛ mashwa mihe* yɛ sane fɔŋ ni mihã eba nyɛnɔ lɛ he.+
11 Nyɛkashea gbeyei yɛ Babilon maŋtsɛ lɛ, mɔ ni nyɛsheɔ lɛ gbeyei lɛ hewɔ.’+
“‘Nyɛkashea gbeyei yɛ ehewɔ,’ Yehowa kɛɛ, ‘ejaakɛ mikɛ nyɛ yɛ, koni mahere nyɛ ni majie nyɛ kɛje edɛŋ.
12 Mana nyɛ mɔbɔ,+ ni ebaana nyɛ mɔbɔ, ni ebaahã nyɛku nyɛsɛɛ kɛya nyɛ diɛŋtsɛ nyɛshikpɔŋ lɛ nɔ.
13 “‘Shi kɛ́ nyɛkɛɛ akɛ, “Dabi, wɔyaŋ nɔ wɔhiŋ shikpɔŋ nɛɛ nɔ!” ni nyɛbooo Yehowa, nyɛ-Nyɔŋmɔ lɛ gbee toi
14 nyɛkɛɛ akɛ, “Dabi, wɔbaaya Ejipt shikpɔŋ lɛ nɔ moŋ,+ he ni wɔnaŋ ta, ni wɔnuŋ tɛtɛrɛmantɛrɛ* gbɛɛmɔ he, ni blodo* he hɔmɔ hu yeŋ wɔ yɛ lɛ; jɛmɛ wɔbaayahi lɛ,”
15 no lɛ, nyɛ Yudabii ni eshwɛ, nyɛboa Yehowa wiemɔ toi. Nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ: “Kɛ́ nyɛtswa nyɛfai shi akɛ nyɛbaaya Ejipt, ni nyɛtee nyɛyahi* jɛmɛ lɛ,
16 no lɛ, klante kome too lɛ nɔŋŋ ni nyɛsheɔ lɛ gbeyei lɛ baabanina nyɛ yɛ jɛmɛ yɛ Ejipt shikpɔŋ lɛ nɔ, ni hɔmɔ kome too lɛ nɔŋŋ ni nyɛsheɔ lɛ gbeyei lɛ baanyiɛ nyɛsɛɛ kɛya Ejipt, ni jɛmɛ nyɛbaagboi yɛ.+
17 Ni hii fɛɛ ni etswa amɛfai shi akɛ amɛbaaya Ejipt ni amɛyahi jɛmɛ lɛ, klante, kɛ hɔmɔ, kɛ tsɛŋemɔ hela ni gbeɔ mɔ baagbe amɛ. Amɛteŋ mɔ ko mɔ ko yi náŋ wala, ni amɛteŋ mɔ ko mɔ ko hu ejeŋ sane fɔŋ ni mikɛbaaba amɛnɔ lɛ mli.”’
18 “Ejaakɛ nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ: ‘Bɔ ni afɔse mimlifu kɛ mimlila lɛ ashwie mɛi ni yɔɔ Yerusalem lɛ anɔ lɛ,+ nakai abaafɔse mimlila lɛ ashwie nyɛnɔ kɛ́ nyɛtee Ejipt, ni nyɛbaatsɔ nii ni akɛlomɔɔ, nii ni hãa mɔ he jɔ̃ɔ ehe, kɛ loomɔ, kɛ ahorabɔɔ nɔ,+ ni nyɛnaŋ biɛ nɛɛ dɔŋŋ.’
19 “Nyɛ Yudabii ni eshwɛ, Yehowa ewie eshi nyɛ. Nyɛkayaa Ejipt. Nyɛnáa nyɛlea krɛdɛɛ akɛ, mibɔ nyɛ kɔkɔ ŋmɛnɛ gbi nɛɛ
20 akɛ nyɛtɔmɔ lɛ baahã nyɛwala* aŋmɛɛ nyɛ. Ejaakɛ nyɛtsu mi Yehowa, nyɛ-Nyɔŋmɔ lɛ, ŋɔɔ nyɛkɛɛ akɛ, ‘Sɔlemɔ ohã Yehowa, wɔ-Nyɔŋmɔ lɛ ohã wɔ, ni okɛɛ wɔ nɔ fɛɛ nɔ ni Yehowa, wɔ-Nyɔŋmɔ lɛ, baakɛɛ lɛ, ni wɔbaaye nɔ.’+
21 Ni mikɛɛ nyɛ ŋmɛnɛ gbi nɛɛ, shi nyɛbooo Yehowa, nyɛ-Nyɔŋmɔ lɛ gbee toi, ni nyɛfeee nɔ ni etsu mi ni mibakɛɛ nyɛ lɛ eko eko.+
22 No hewɔ lɛ, nyɛnáa nyɛlea akɛ, bɔ fɛɛ bɔ ni fee lɛ, klante, kɛ hɔmɔ, kɛ tsɛŋemɔ hela ni gbeɔ mɔ baagbe nyɛ yɛ he ni nyɛsumɔɔ akɛ nyɛya ni nyɛyahi lɛ.”+
Shishigbɛ Niŋmaa
^ Loo “matɛo.”
^ Loo “miwerɛ baaho mihe; nyɛnii baafee mi mɔbɔ.”
^ Hebri sht. ŋm., “akolonto.”
^ Kwɛmɔ Wiemɔi Titrii Amligbalamɔ lɛ.
^ Loo “nyɛyato gbɔ yɛ.”
^ Loo “nyɛsusumai.”
