Yeremia 43:1-13
43 Be ni Yeremia wie wiemɔi nɛɛ fɛɛ ni jɛ Yehowa, amɛ-Nyɔŋmɔ lɛ ŋɔɔ, wiemɔi fɛɛ ni Yehowa, amɛ-Nyɔŋmɔ lɛ, kɛtsu lɛ ni ebakɛɛ amɛ lɛ etsɔɔ maŋbii lɛ fɛɛ egbe naa lɛ,
2 Azaria, Hoshaia binuu lɛ, kɛ Yohanan,+ Karea binuu lɛ, kɛ hii ni yeɔ amɛtsuinaa sane lɛ fɛɛ kɛɛ Yeremia akɛ: “Nɔ ni owie lɛ, amale ni! Yehowa, wɔ-Nyɔŋmɔ lɛ, tsuko bo ni obakɛɛ akɛ, ‘Nyɛkayaa Ejipt nyɛyahia jɛmɛ.’
3 Moŋ lɛ, Baruk,+ Neria binuu lɛ miiwo bo ŋaa fɔŋ yɛ wɔhe koni okɛ wɔ awo Kaldeabii lɛ adɛŋ, koni amɛgbe wɔ loo amɛŋɔ wɔ nom kɛya Babilon.”+
4 No hewɔ lɛ, Yohanan, Karea binuu lɛ, kɛ tatsɛmɛi lɛ fɛɛ, kɛ maŋbii lɛ fɛɛ booo Yehowa wiemɔ akɛ amɛya nɔ amɛhi Yuda shikpɔŋ lɛ nɔ lɛ toi.
5 Moŋ lɛ, Yohanan, Karea binuu lɛ, kɛ tatsɛmɛi lɛ fɛɛ ŋɔ Yudabii ni eshwɛ ni eku amɛsɛɛ kɛjɛ jeŋmaji fɛɛ ni ashwie amɛ kɛtee nɔ lɛ anɔ kɛba koni amɛbahi Yuda shikpɔŋ lɛ nɔ lɛ amɛfata amɛhe.+
6 Amɛŋɔ hii lɛ, kɛ yei lɛ, kɛ gbekɛbii lɛ, kɛ maŋtsɛ lɛ biyei lɛ, kɛ mɔ fɛɛ mɔ ni Nebuzaradan,+ bulɔi lɛ anɔkwɛlɔ lɛ shi ehã Gedalia,+ Shafan+ binuu Ahikam+ binuu lɛ, kɛ gbalɔ Yeremia kɛ Baruk, Neria binuu lɛ amɛfata amɛhe.
7 Ni amɛtee Ejipt shikpɔŋ lɛ nɔ, ejaakɛ amɛbooo Yehowa gbee toi, ni amɛtee aahu kɛyashɛ Tapanes+ tɔ̃ɔ.
8 Kɛkɛ ni Yehowa kɛɛ Yeremia yɛ Tapanes akɛ:
9 “Kɔlɔmɔ tɛi wuji ohiɛ odɛŋ, ni okɛyatee yɛ mɔɔta ni yɔɔ brikii* ni atswa yɛ Farao shĩa ni yɔɔ Tapanes lɛ shinaa lɛ shi lɛ mli, yɛ Yuda hii lɛ ahiɛ.
10 Kɛɛmɔ amɛ akɛ, ‘Nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ: “Naa, miitsu ni ayaŋɔ Nebukadnezar,* Babilon maŋtsɛ lɛ, mitsulɔ lɛ kɛba,+ ni mikɛ emaŋtsɛ sɛi lɛ baama tɛi nɛɛ ni mikɛtee lɛ anɔ, ni ebaalɛɛ emaŋtsɛyeli mama tsũ lɛ mli yɛ nɔ.+
11 Ni ebaaba ni ebatswia Ejipt shikpɔŋ lɛ nii.+ Mɔ ni ato gbele hela ahã lɛ lɛ, enɔ baafee gbele hela, ni mɔ ni ato nomŋɔɔ ahã lɛ lɛ, enɔ baafee nomŋɔɔ, ni mɔ ni ato klante ahã lɛ lɛ, enɔ baafee klante.+
12 Ni mawo Ejipt nyɔŋmɔi lɛ ashĩai* lɛ amli la,+ ni ebaashã amɛ ni ebaaŋɔ amɛ nom. Ni ebaabu shikpɔŋ lɛ tamɔ bɔ ni tookwɛlɔ buɔ emama lɛ, ni ebaashi jɛmɛ kɛya yɛ toiŋjɔlɛ mli.
13 Ni ebaakumɔ Bet-shemesh* akulashiŋi* ni yɔɔ Ejipt shikpɔŋ lɛ nɔ lɛ dukuduku, ni ekɛ la baashã Ejipt nyɔŋmɔi lɛ ashĩai* lɛ.”’”
Shishigbɛ Niŋmaa
^ Loo “ntayai.”
^ Hebri sht. ŋm., “Nebukadrezar,” gbɛ kroko ni aŋmaa egbɛ́i lɛ.
^ Loo “asɔlemɔ shĩai.”
^ Loo “Hulu Lɛ Shĩa (Sɔlemɔ Shĩa) Lɛ,” ni ji Heliopolis lɛ.
^ Loo “kaimɔ akulashiŋi.”
^ Loo “asɔlemɔ shĩai.”
