Yesaia 33:1-24
33 Kpoo hã bo, bo mɔ ni okpãtãa nii ahiɛ ni akpãtãko ohiɛ;+Bo mɔ ni olakaa mɛi ni alakako bo!
Kɛ́ okpãtã nii ahiɛ otã lɛ, bo hu abaakpãtã ohiɛ.+
Kɛ́ olaka mɛi otã lɛ, bo hu abaalaka bo.
2 Ao Yehowa, naa wɔ mɔbɔ.+
Bo onɔ wɔhiɛ kã.
Daa leebi lɛ, tsɔ nine*+ ohã wɔ,Hɛɛ, tsɔ wɔyiwalaheremɔ yɛ haomɔ be mli.+
3 Majimaji joɔ foi kɛ́ amɛnu hoofeemɔ he.
Kɛ́ ote shi lɛ, jeŋmaji gbɛɔ shwãa.+
4 Bɔ ni agãi ni fiteɔ nii waa buaa amɛhe naa lɛ, nakai abaabua ota mli nii lɛ anaa;Mɛi baaha ota mli nii lɛ tamɔ baalabii pii.
5 Abaawó Yehowa nɔ gojoo,Ejaakɛ ehiɔ ŋwɛi tɔ̃ɔ.
Ebaahã jalɛsaneyeli kɛ jalɛ nifeemɔ ayi Zion obɔ.
6 Lɛ ji mɔ ni hãa obei lɛ maa shi shiŋŋ;Yiwalaheremɔ,+ kɛ hiɛshikamɔ, kɛ nilee, kɛ Yehowa gbeyeishemɔ+ babaoo—Enɛ ji ejwetri.
7 Naa! Amɛhii kãkãlɔi lɛ miibolɔ yɛ gbɛjegbɛ lɛ nɔ;Toiŋjɔlɛ tsuji lɛ miifó waa.
8 Mɛi eshi gbɛjegbɛi lɛ anɔ;Mɔ ko mɔ ko enyiɛɛɛ nanegbɛi lɛ anɔ.
Eku* kpaŋmɔ lɛ mli;Ekpoo maji lɛ;Ebuuu gbɔmɔ adesa* ehãaa nɔ ko.+
9 Shikpɔŋ lɛ miiye awerɛho* ni egbi waa.
Lebanon hiɛ egbo;+ ekpɔtɔ.
Sharon etsɔ tamɔ ŋa kpataa,Ni Bashan kɛ Karmel ekpala amɛnɔ bai lɛ amɛshwie shi.+
10 Yehowa kɛɛ: “Agbɛnɛ mate shi,Agbɛnɛ mawó minɔ gojoo;+Agbɛnɛ mawo mihiɛ nyam.
11 Nyɛhiɛɔ jwɛi gbiŋ musu, ni nyɛfɔɔ ŋmaa* tsei.
Nyɛ diɛŋtsɛ nyɛmumɔ baakpãtã nyɛhiɛ tamɔ la.+
12 Ni majimaji lɛ baatsɔ tamɔ kaaloo ni ashã yɛ la mli.
Abaawo amɛmli la tamɔ ŋmei tsei ni afolɔ ashwie shi.+
13 Nyɛ mɛi ni nyɛyɔɔ shɔŋŋ, nyɛboa nɔ ni mafee lɛ toi!
Ni nyɛ mɛi ni nyɛbɛŋkɛ, nyɛyoa mihewalɛ lɛ!
14 Eshafeelɔi ni yɔɔ Zion lɛ atsui efã;+Mɛi ni ekwa Nyɔŋmɔ lɛ ahe miikpokpo, amɛmiikɛɛ:
‘Namɔ baanyɛ ahi he ni la ni kpãtãa nii ahiɛ yɔɔ?+
Namɔ baanyɛ ahi la ni anyɛɛɛ agbe he?’
15 Mɔ ni yaa nɔ enyiɛɔ yɛ jalɛ nifeemɔ mli,+Ni ewieɔ nɔ ni ja,+Ni esumɔɔɔ ojotswaa kɛ shishiumɔ* nii,Ni eniji ekpɛlɛɛɛ nyɔɔŋnii ni emɔɔɔ mli hu,+Ni etsimɔɔ etoi kɛ́ aawie lashishwiemɔ he,Ni eŋamɔɔ ehiŋmɛii koni ekakwɛ nɔ ko gbonyo lɛ
16 —Ebaahi ŋwɛi shɔŋŋ;Tɛsai teemɔhei lɛ amli ebobaahe ni yɔɔ shweshweeshwe* lɛ baahi,Ni abaahã lɛ eblodo,*Ni enu hu etãŋ.”+
17 Ohiŋmɛii baana maŋtsɛ yɛ enunyam mli;Amɛbaana shikpɔŋ ko yɛ shɔŋŋ.
18 Obaakai nii ni yɔɔ gbeyei lɛ* yɛ otsui mli akɛ:
“Nɛgbɛ woloŋmalɔ lɛ yɔɔ?
Nɛgbɛ mɔ ni ŋmɛɔ nikeenii* lɛ ekwɛɔ lɛ yɔɔ?+
Nɛgbɛ mɔ ni kaneɔ mɔji lɛ yɔɔ?”
19 Onaŋ maŋ ni ebuuu nɔ ko lɛ dɔŋŋ,Maŋ ni amɛwiemɔ lɛ wa* aahu akɛ anyɛɛɛ anu shishi,Ni onyɛɛɛ onu amɛmumɔhaa lilɛi lɛ shishi lɛ.+
20 Naa Zion, wɔgbijurɔyelii lɛ amaŋ lɛ!+
Ohiŋmɛii baana Yerusalem akɛ shihilɛhe ni toiŋjɔlɛ yɔɔ jɛmɛ,Mama tsũ ni ajieŋ dɔŋŋ.+
Afamɔŋ mama tsũ lɛ he tsei kɛ amɛnaa piɔpiɔi lɛ dɔŋŋ,Ni ehe kpãi lɛ eko eko tseŋ.
21 Shi Yehowa, Anunyamtsɛ lɛ baahi jɛmɛ ahã wɔTamɔ kpokpaa ni fai yɔɔ nɔ, nujɔi ni lɛɛ,He ni lɛji wuji nyɛŋ ayaNi meelei wuji nyɛŋ atsɔ jɛmɛ kɛho.
22 Ejaakɛ Yehowa ji wɔ-Kojolɔ,+Yehowa ji wɔ-Mlawolɔ,+Yehowa ji wɔ-Maŋtsɛ;+Lɛ ji mɔ ni baahere wɔyiwala.+
23 Okpãi lɛ amli baagbɔjɔ;Amɛnyɛŋ amɛhiɛ abalaa tso* lɛ mli, ni amɛnyɛŋ amɛshi abalaa lɛ.
Nakai be lɛ mli lɛ, abaaja ta mli nii babaoo;Obubuafo po baaloo pii.+
24 Ni mɛi ni yɔɔ mli lɛ ateŋ mɔ ko ekɛŋ akɛ: “Mibɛ hewalɛ.”*+
Akɛ mɛi ni yɔɔ shikpɔŋ lɛ nɔ lɛ atɔmɔ lɛ baake amɛ.+
Shishigbɛ Niŋmaa
^ Loo “hewalɛ.”
^ Loo “gbɔmɔ ni gboɔ.”
^ Ni ji, henyɛlɔ lɛ.
^ Shishitsɔɔmɔi komɛi kɛɔ akɛ, “miigbi.”
^ Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
^ Loo “lakamɔ.”
^ Loo “egɔŋ nɔ mɔɔ ni yɔɔ shweshweeshwe.”
^ Kwɛmɔ Wiemɔi Titrii Amligbalamɔ lɛ.
^ Loo “Obaajwɛŋ nii ni yɔɔ gbeyei lɛ nɔ.”
^ Eeenyɛ efee akɛ, “nikeenii” nɛɛ ji maŋ too ko ni maŋtsɛmɛi lɛ baawo koni amɛná toiŋjɔlɛ ni abu amɛmaŋ lɛ he.
^ Hebri sht. ŋm., “mli kwɔ.”
^ Loo “lɛlɛ mli shimaatso.”
^ Loo “Mihe miiye.”
