Yesaia 43:1-28
43 Agbɛnɛ nɔ ni Yehowa,Ni ji bo Yakob, o-Bɔlɔ lɛ, bo Israel, mɔ ni shɔ̃ bo lɛ, kɛɛ nɛ:+
“Kaashe gbeyei, ejaakɛ mikpɔ̃ bo.+
Mikɛ ogbɛ́i etsɛ bo.
Minii ji bo.
2 Kɛ́ oyatsɔ nui amli lɛ, mafata ohe,+Ni kɛ́ oyatsɔ fai amli lɛ, amɛhaŋ onɔ.+
Kɛ́ oyanyiɛ la mli lɛ, eshãŋ bo,Ni lalilɛi hu eshãŋ ohe.
3 Ejaakɛ, miji Yehowa, o-Nyɔŋmɔ lɛ,Israel Mɔ Krɔŋkrɔŋ lɛ, o-Yiwalaherelɔ lɛ.
Mikɛ Ejipt ehã kɛmiikpɔ̃ bo,Mikɛ Etiopia kɛ Seba ehã yɛ onajiaŋ.
4 Ejaakɛ ojara wa yɛ mihiɛ,+Ohiɛ eba nyam, ni misumɔɔ bo.+
No hewɔ lɛ, mikɛ maŋ baahã yɛ onajiaŋKɛ jeŋmaji hu yɛ owala* najiaŋ.
5 Kaashe gbeyei, ejaakɛ mikɛ bo yɛ.+
Mikɛ oseshi* lɛ baajɛ bokã kɛbaNi mabua onaa kɛbaajɛ anai kɛba.+
6 Makɛɛ kooyigbɛ akɛ, ‘Okɛ amɛ ahã!’+
Kɛ wuoyigbɛ hu akɛ, ‘Kaatsĩ amɛnaa.
Okɛ mibihii lɛ ajɛ shɔŋŋ kɛba, ni okɛ mibiyei lɛ ajɛ shikpɔŋ lɛ naagbeehei lɛ kɛba,+
7 Mɔ fɛɛ mɔ ni akɛ migbɛ́i lɛ tsɛɔ lɛ,+Mɔ ni mibɔ kɛhã mi diɛŋtsɛ minunyam,Mɔ ni mishɔ̃ lɛ ni mifee lɛ lɛ.’+
8 Okɛ maŋ lɛ aba. Amɛyɛ hiŋmɛii shi amɛshwila,Amɛyɛ toii, shi amɛmu toi.+
9 Jeŋmaji lɛ fɛɛ abua amɛhe naa yɛ he kome,Ni majimaji lɛ hu abua amɛhe naa.+
Amɛteŋ namɔ baanyɛ agba enɛ?
Ani amɛbaanyɛ amɛhã wɔnu klɛŋklɛŋ nibii lɛ?*+
Amɛkɛ amɛdasefoi aba ni amɛbatsɔɔ akɛ amɛsane ja,Amɛhã amɛnu ni amɛkɛɛ akɛ, ‘Eji anɔkwale!’”+
10 “Nyɛji midasefoi,”+ Yehowa kɛɛ,“Lɛɛlɛŋ, mitsulɔ ni mihala,+Koni nyɛle ni nyɛhe mi nyɛye*Ni nyɛnu shishi akɛ mi nɔŋŋ ni.+
Atsɔko mihiɛ ashɔ̃ko Nyɔŋmɔ ko,Ni eko eko hu bako yɛ misɛɛ.+
11 Mi, mi nɔŋŋ miji Yehowa lɛ,+ ni misɛɛ lɛ, yiwalaherelɔ ko bɛ.”+
12 “Miji mɔ ni jaje etsɔɔ, ni ehere yiwala, ni ehã aleBe ni maŋsɛɛ nyɔŋmɔ ko bɛ nyɛteŋ lɛ.+
No hewɔ lɛ, nyɛji midasefoi,” Yehowa kɛɛ, “ni miji Nyɔŋmɔ.+
13 Agbɛnɛ hu, be fɛɛ be lɛ mi nɔŋŋ ni;+Ni mɔ ko mɔ ko nyɛŋ ashɔ̃ nɔ ko yɛ midɛŋ.+
Kɛ́ miifee nɔ ko lɛ, namɔ baanyɛ atsĩ naa?”+
14 Nɔ ni Yehowa, o-Kpɔ̃lɔ lɛ,+ Israel Mɔ Krɔŋkrɔŋ lɛ+ kɛɛ nɛ:
“Nyɛ hewɔ lɛ, matsu kɛya Babilon koni ayajie agbói lɛ asɛɛ adabaŋi* lɛ fɛɛ ashwie shi,+Ni aba Kaldeabii lɛ ashi yɛ amɛmeelei lɛ amli ni amɛbolɔ waa.+
15 Miji Yehowa, nyɛ-Mɔ Krɔŋkrɔŋ lɛ,+ Israel Bɔlɔ lɛ,+ nyɛ-Maŋtsɛ lɛ.”+
16 Nɔ ni Yehowa kɛɛ nɛ,Mɔ ni gbaa gbɛ yɛ ŋshɔ mliKɛ nanegbɛ po yɛ nui ni efee hamahama amli lɛ,+
17 Mɔ ni jieɔ ta shwiili kɛ okpɔŋɔ kpo,+Mɔ ni jieɔ asraafoi kɛ tawulɔi kãkãlɔi fɛɛ kpo lɛ kɛɛ nɛ:
“Amɛbaakamɔ shi ni amɛteŋ shi.+
Amɛbaagboi, hɛɛ, abaagbe amɛ tamɔ agbeɔ kane mli kpãa ni miitso lɛ.”
18 “Nyɛkakaia blema nibii lɛ,Ni nyɛkajwɛŋa nibii ni eho lɛ anɔ.
19 Naa, miifee nɔ ko hee;+Amrɔ nɛɛ po, eeba mli.
Ani nyɛnaaa lo?
Magba gbɛ kɛtsɔ ŋa lɛ nɔ+Ni mahã fai hu aho kɛtsɔ ŋa kpataa lɛ nɔ.+
20 Ŋa mli kooloi baawo mihiɛ nyam,Ŋa mli gbei kɛ okpɔŋɔ-loofɔji* hu baafee nakai,Ejaakɛ mahã nu aba ŋa lɛ nɔ,Ni mahã fai hu aho yɛ ŋa kpataa lɛ nɔ,+Koni mimaŋ lɛ, maŋ ni mihala lɛ,+ anu,
21 Maŋ ni mishɔ̃ mihã miheKoni amɛjaje miyijiemɔ lɛ amɛtsɔɔ lɛ.+
22 Shi bo Yakob, obooo otsɛɛɛ mi,+Ejaakɛ, bo Israel, misane eje otsine.+
23 Obahãko mi gwantɛŋi kɛhã shãa afɔleiNi okɛ ofɔlei lɛ woko mihiɛ nyam.
Minyɛko onɔ doo akɛ obake mi nii,Ni miyeee otsui doo akɛ obahã mi frankinsɛnsi.+
24 Okɛ oshika heko kalamo* ohãko mi,Ni ohãko matɔ kɛ ofɔlei lɛ ahe fɔ lɛ.+
Shi moŋ, ohã ohe eshai lɛ etsɔ jatsu ehã miNi ohã etɔ mi kɛ otɔmɔi lɛ.+
25 Mi, miji mɔ ni gbeɔ otɔmɔi*+ lɛ fɛɛ yɛ mi diɛŋtsɛ mihewɔ,+Ni mikaiŋ ohe eshai lɛ dɔŋŋ.+
26 Kaimɔ mi; hã wɔteŋ mɔ fɛɛ mɔ kɛ esane aba ni akojo;Jajemɔ osane lɛ ni akwɛ akɛ osane ja lo.
27 Oklɛŋklɛŋ tsɛ* lɛ fee esha,Ni bo diɛŋtsɛ onaawielɔ* lɛ tse mihiɛ atua.+
28 No hewɔ lɛ, mabule he krɔŋkrɔŋ lɛ lumɛi lɛ,Ni mahã akpãtã Yakob hiɛNi mahã adɔ jɛmɔ ato Israel nɔ.+
Shishigbɛ Niŋmaa
^ Loo “osusuma.”
^ Hebri sht. ŋm., “odumɔwu.”
^ Eeenyɛ efee akɛ, ekɔɔ nibii ni baaba mli klɛŋklɛŋ wɔsɛɛ lɛ he.
^ Loo “ni nyɛkɛ nyɛhiɛ afɔ̃ minɔ.”
^ Adabaŋ ji dade loo tso ni akɛbeleɔ shinaa loo agbó sɛɛ kɛlaa sɛɛ.
^ Loo “dugumai.” Blɔfo mli lɛ, ostrich.
^ Eji tso ko ni jeɔ ŋma. Aleee bɔ ni eji jogbaŋŋ.
^ Loo “nibii ni ofee kɛtse mihiɛ atua.”
^ Loo “blematsɛ.”
^ Eeenyɛ efee akɛ, ekɔɔ mɛi ni tsɔɔ Mla lɛ ahe.
