Yesaia 45:1-25
45 Nɔ ni Yehowa kɛɔ Koresh, ni ji mɔ ni efɔ lɛ mu,+Mɔ ni mimɔ eninejurɔ mli+Koni maba jeŋmaji ashi yɛ ehiɛ,+Koni majie tawuu nii yɛ maŋtsɛmɛi ahe,*Koni magbele shinai ntai yɛ ehiɛ,Bɔ ni afee ni akaŋamɔ agbói lɛ nɛ:
2 “Manyiɛ ohiɛ,+Ni mahã gɔŋkpɔi lɛ afee trɛnɛɛ.
Makumɔ akɔɔble shinai lɛ dukuduku,Ni mafolɔ dade adabaŋi* lɛ mashwie shi.+
3 Mikɛ duŋ mli jwetrii lɛ baahã boKɛ jwetrii ni aŋɔtee ni akɛto teemɔhei lɛ,+Koni oná ole akɛ miji Yehowa lɛ,Israel Nyɔŋmɔ lɛ, mɔ ni tsɛɔ bo kɛ ogbɛ́i lɛ.+
4 Mitsulɔ Yakob kɛ Israel, mɔ ni mihala lɛ lɛ hewɔMitsɛɔ bo kɛ ogbɛ́i lɛ.
Oleee mi moŋ, shi miihã bo gbɛ́i ni yɔɔ nyam.
5 Miji Yehowa, ni mɔ ko mɔ ko bɛ dɔŋŋ.
Nyɔŋmɔ ko Nyɔŋmɔ ko bɛ, ja mi.+
Oleee mi moŋ, shi mawaje bo.*
6 Koni mɛi aleKɛjɛ hulushiteehe kɛyashi hulushinyɔɔhe*Akɛ misɛɛ lɛ, mɔ ko mɔ ko bɛ dɔŋŋ.+
Miji Yehowa, ni mɔ ko mɔ ko bɛ dɔŋŋ.+
7 Mi mishɔ̃ la,+ ni mibɔ duŋ,+Mi mifee toiŋjɔlɛ,+ ni mibɔ sane fɔŋ;+Mi Yehowa, mi mifeɔ enɛɛmɛi fɛɛ.
8 Nyɛ ŋwɛii, nyɛhãa nugbɔ anɛa kɛjɛa ŋwɛi;+Nyɛhãa atatui lɛ afɔsea jalɛ nifeemɔ ashwiea shi.
Nyɛhãa shikpɔŋ lɛ naa agbelea ni ewo yiwalaheremɔ yibii,Koni ehã jalɛ nifeemɔ aba yɛ nakai beiaŋ nɔŋŋ.+
Mi Yehowa, mi mibɔ enɛ.”
9 Kpoo hã mɔ ni kɛ mɔ ni fee lɛ* lɛ taa saji anaa lɛ,Ejaakɛ eji gbɛ́ ni ejwa fã ko kɛkɛYɛ gbɛ́ ni ejwa lɛ fãi krokomɛi ni jwere shikpɔŋ lɛ ateŋ!
Ani esa akɛ sũ lɛ akɛɛ Gbɛshɔ̃lɔ* lɛ akɛ: “Mɛni oshɔ̃ nɛɛ?”+
Ni ani esa akɛ oninenaa nitsumɔ lɛ akɛɛ akɛ: “Ebɛ niji”?*
10 Kpoo hã mɔ ni kɛɔ tsɛ akɛ: “Mɛni ofɔ?”
Ni ekɛɔ yoo hu akɛ: “Mɛni ofɔɔ lɛ?”*
11 Nɔ ni Yehowa, Israel Mɔ Krɔŋkrɔŋ lɛ,+ mɔ ni shɔ̃ lɛ lɛ kɛɛ nɛ:
“Ani nyɛ nyɛbaabi mi sane yɛ nibii ni baa lɛ aheNi nyɛfã mi yɛ mibihii+ kɛ mininenaa nitsumɔi lɛ ahe?
12 Mi mifee shikpɔŋ lɛ,+ ni mibɔ gbɔmɔ miwo nɔ.+
Mikɛ mi diɛŋtsɛ miniji kpã ŋwɛii lɛ amli,+Ni mifãa amɛsraafoi lɛ fɛɛ.”+
13 “Mitee gbɔmɔ ko shi yɛ jalɛ nifeemɔ hewɔ,+Ni mahã egbɛi fɛɛ aja.
Lɛ ji mɔ ni baasaa eto mimaŋ lɛ+Ni ehã miwebii ni aŋɔ amɛ nom lɛ aye amɛhe+ ni eheee shika loo nyɔɔŋnii,”+ Yehowa, taiatsɛ lɛ kɛɛ.
14 Nɔ ni Yehowa kɛɛ nɛ:
“Ejipt sɛɛnamɔ* lɛ kɛ jarayeli nibii* ni jɛ Etiopia kɛ Sabeabii ni ji gbɔmɛi ni kwɔlɔ lɛ aŋɔɔ lɛ,Baaba nyɛŋɔɔ ni amɛbaatsɔmɔ nyɛnii.
Abaawo amɛ tsein* kɛbaanyiɛ nyɛsɛɛ.
Amɛbaaba ni amɛbakoto nyɛ.+
Amɛbaakɛɛ bo yɛ sɔlemɔ mli akɛ, ‘Nyɔŋmɔ kɛ bo yɛ lɛɛlɛŋ,+Ni mɔ ko mɔ ko bɛ dɔŋŋ; Nyɔŋmɔ kroko ko bɛ dɔŋŋ.’”
15 Lɛɛlɛŋ, oji Nyɔŋmɔ ni kɛ ehe teɔ,Ao Israel Nyɔŋmɔ, Yiwalaherelɔ.+
16 Amɛ fɛɛ amɛhiɛ baagboi ni amɛhiɛ baashwie shi;Mɛi ni feɔ amagai lɛ fɛɛ baanyiɛ kɛ hiɛshishwiemɔ.+
17 Shi Yehowa baahere Israel kɛ naanɔ yiwalaheremɔ.+
Nyɛhiɛ gboiŋ loo nyɛhiɛ eshwieŋ shi dɔŋŋ kɛbaaya naanɔi anaanɔ.+
18 Ejaakɛ nɔ ni Yehowa,Mɔ ni bɔ ŋwɛi lɛ,+ anɔkwa Nyɔŋmɔ lɛ,Mɔ ni shɔ̃ shikpɔŋ lɛ, mɔ ni fee shikpɔŋ lɛ ni ekɛma shi shiŋŋ,+Ni ebɔɔɔ lɛ efolo,* shi moŋ eshɔ̃ ni ahi nɔ lɛ kɛɛ nɛ:+
“Miji Yehowa, ni mɔ ko mɔ ko bɛ dɔŋŋ.
19 Jeee teemɔhe+ loo shikpɔŋ ni nɔ ewo duŋ nɔ mijɛ miwie;Mikɛɛɛ Yakob seshi* lɛ akɛ,‘Nyɛtaoa misɛɛ gbɛ, shi ebaatɔ nyɛ efolo.’*
Miji Yehowa, mɔ ni wieɔ jalɛ wiemɔ ni ejajeɔ nɔ ni ja lɛ.+
20 Nyɛbuaa nyɛhe naa ni nyɛbaa.
Nyɛ fɛɛ nyɛtsia nyɛbɛŋkɛa, nyɛ mɛi ni nyɛjo foi kɛje jeŋmaji lɛ amli.+
Mɛi ni tereɔ amagai ni agbɔ kɛnyiɛɔ,Ni amɛsɔleɔ amɛhãa nyɔŋmɔ ni nyɛŋ amɛ ahere lɛ, amɛleee nɔ ko nɔ ko.+
21 Nyɛkɛ nyɛmaniɛ lɛ afɔ̃a shi, nyɛjajea nyɛsane lɛ.
Amɛfee ekome kɛsusu nii ahe.
Namɔ gba enɛ kɛjɛ blema tɔ̃ɔNi ejaje enɛ kɛjɛ blema tɔ̃ɔ?
Ani jeee mi, Yehowa?
Nyɔŋmɔ ko Nyɔŋmɔ ko bɛ, ja mi;Nyɔŋmɔ ni ja kɛ Yiwalaherelɔ,+ misɛɛ lɛ mɔ ko mɔ ko bɛ.+
22 Nyɛ shikpɔŋ lɛ naagbeehei fɛɛ, nyɛbaa miŋɔɔ koni nyɛyi aná wala,+Ejaakɛ miji Nyɔŋmɔ, ni mɔ ko mɔ ko bɛ dɔŋŋ.+
23 Mikɛ mi diɛŋtsɛ mihe ekã kitã;Wiemɔ lɛ eje minaa yɛ jalɛ nifeemɔ hewɔ,Ni ekuŋ esɛɛ kɛbaŋ miŋɔɔ:+
Nakutso fɛɛ nakutso baakoto mi,Lilɛi fɛɛ lilɛi baakã mi anɔkwayeli he kitã+
24 Ekɛɛ akɛ, ‘Yehowa mli jalɛ nifeemɔ kɛ hewalɛ yɔɔ lɛɛlɛŋ.
Mɛi fɛɛ ni mli efu lɛ lɛ baaba ehiɛ kɛ hiɛgbele.
25 Abaabu Israel seshi* lɛ fɛɛ jalɔ yɛ Yehowa hewɔ,+Ni amɛbaashwã yɛ ehewɔ.’”
Shishigbɛ Niŋmaa
^ Hebri sht. ŋm., “Koni mafɛne maŋtsɛmɛi ahɛfiinii.”
^ Adabaŋ ji dade loo tso ni akɛbeleɔ shinaa loo agbó sɛɛ kɛlaa sɛɛ.
^ Hebri sht. ŋm., “mafi omli kpɛŋŋ.”
^ Loo “Kɛjɛ bokã kɛyashi anai.”
^ Loo “mɔ ni shɔ̃ lɛ.”
^ Loo “mɔ ni shɔ̃ lɛ.”
^ Shishitsɔɔmɔi komɛi kɛɔ akɛ, “Ani esa akɛ sũ lɛ akɛɛ akɛ: ‘Oninenaa nitsumɔ lɛ bɛ niji’?”
^ Loo “Mɛni okɔ̃mɔɔ ni ofɔ?”
^ Shishitsɔɔmɔi komɛi kɛɔ akɛ, “apaafoi.”
^ Shishitsɔɔmɔi komɛi kɛɔ akɛ, “jarayelɔi.”
^ Loo “kɔsɔŋkɔsɔi.”
^ Shishitsɔɔmɔi komɛi kɛɔ akɛ, “ebɔɔɔ ni ekã shi efolo.”
^ Hebri sht. ŋm., “dumɔwu.”
^ Loo “Nyɛtaoa misɛɛ gbɛ yakatswaa.”
^ Hebri sht. ŋm., “dumɔwu.”
