Yesaia 6:1-13
6 Afi nɔ ni Maŋtsɛ Uzia gbo lɛ,+ mina Yehowa ta maŋtsɛ sɛi ko ni kwɔ ni sɛŋ kɔɔyɔɔ mli nɔ,+ ni etade kakadaŋŋ lɛ naamuu lɛ eyi sɔlemɔ shĩa lɛ fɛɛ obɔ.
2 Serafim damɔ eŋwɛigbɛ; amɛteŋ mɔ fɛɛ mɔ yɛ fiji ekpaa ekpaa. Amɛteŋ mɔ fɛɛ mɔ kɛ* fiji enyɔ haa ehiɛ, ni ekɛ fiji enyɔ haa enaji ahe, ni ekɛ fiji enyɔ filikiɔ kɛyaa kɛbaa.
3 Ni mɔ nɛ boɔ ekɛɔ mɔ nɛ akɛ:
“Krɔŋkrɔŋ, krɔŋkrɔŋ, krɔŋkrɔŋ ji Yehowa, taiatsɛ lɛ.+
Enunyam lɛ eyi shikpɔŋ muu lɛ fɛɛ nɔ obɔ.”
4 Ni amɛgbee lɛ naawalɛ* lɛ hã nɔ ni shinai lɛ tsɔmɔɔ yɛ nɔ lɛ hoso, ni lasu yi shĩa lɛ fɛɛ obɔ.+
5 Kɛkɛ ni mikɛɛ akɛ: “Kpoo hã mi!
Migbo mitã,*Ejaakɛ gbɔmɔ ni naabu he tseee ji mi,Ni miyɛ mɛi ni naabu he tseee ateŋ;+Ejaakɛ mihiŋmɛii ena Maŋtsɛ lɛ, Yehowa, taiatsɛ lɛ diɛŋtsɛ!”
6 Kɛkɛ ni serafim lɛ ateŋ mɔ kome filiki kɛba miŋɔɔ, ni ehiɛ ŋai ni miitso+ ni ekɛ nibɛɛnii eyakɔ yɛ afɔleshaa latɛ lɛ nɔ yɛ edɛŋ.+
7 Eta minaabu he ni ekɛɛ:
“Naa! Akɛni enɛ esa onaabu he hewɔ lɛ,
Ajie otɔmɔ lɛ,Ni akɛ ohe esha lɛ eke bo.”*
8 Kɛkɛ ni minu Yehowa gbee miikɛɛ akɛ: “Namɔ matsu, ni namɔ baaya ahã wɔ?”+ Ni mikɛɛ akɛ: “Naa mi! Tsu mi!”+
9 Ni ekɛɛ, “Yaa ni oyakɛɛ maŋ nɛɛ akɛ:
‘Nyɛbaanu ni nyɛnu ekoŋŋ,Shi nyɛnuŋ shishi;Nyɛbaana ni nyɛna ekoŋŋ,Shi nyɛleŋ nii.’+
10 Hã maŋ nɛɛ tsui akpiliŋ,+Ni ohã amɛtoii awa,+Ni ohã amɛhiŋmɛii akpɛtɛ,Koni amɛkana nii kɛ amɛhiŋmɛiiNi amɛkanu nii kɛ amɛtoii,Koni amɛtsui akanu shishi,Ni amɛku amɛsɛɛ ni atsa amɛ.”+
11 Kɛkɛ ni mikɛɛ akɛ: “Ao Yehowa, kɛyashi mɛɛ be?” Kɛkɛ ni ekɛɛ akɛ:
“Kɛyashi abaakumɔ maji lɛ fɛɛ ni mɔ ko mɔ ko ehiii mliNi shĩai lɛ hu mɔ ko mɔ ko ehiii mliNi akpãtã shikpɔŋ lɛ hiɛ ni etsɔ amaŋfɔ;+
12 Kɛyashi Yehowa baashwie mɛi kɛya shɔŋŋ+Ni hei babaoo baakamɔ shi efoji yɛ shikpɔŋ lɛ nɔ.
13 “Shi mlijai nyɔŋma mli ekome baashwɛ yɛ nɔ kɛ̃, ni abaashã ekoŋŋ. Etamɔ bɔ ni kɛ́ afo tso agbo loo ooki tso afɔ̃ shi lɛ, ashiɔ etsoku lɛ; dumɔwu* krɔŋkrɔŋ ko baafee etsoku lɛ.”
Shishigbɛ Niŋmaa
^ Hebri sht. ŋm., “Ekɛ.”
^ Hebri sht. ŋm., “Ni mɔ ni boɔ lɛ gbee.”
^ Hebri sht. ŋm., “Minaa eka.”
^ Loo “akpãtã ohe esha lɛ.”
^ Loo “seshi.”
