Yoel 1:1-20
1 Nɔ ni Yehowa kɛɛ Yoel,* Petuel binuu lɛ nɛ:
2 “Nyɛ onukpai, nyɛboa enɛ toi,Nyɛ shikpɔŋ lɛ nɔ bii fɛɛ, nyɛboa toi.
Ani nɔ ko ni tamɔ nɛkɛ eba yɛ nyɛgbii lɛ amli,Aloo yɛ nyɛtsɛmɛi lɛ agbii lɛ amli pɛŋ?+
3 Nyɛgbaa nyɛbii,Ní nyɛbii lɛ hu agba amɛbii,Ní amɛbii lɛ hu agba yinɔ ni baaba yɛ amɛsɛɛ lɛ.
4 Nɔ ni baalabii* ni yeɔ nii hwaŋhwaŋ lɛ shi lɛ, baalabii ni keɔ yuu kɛbaa lɛ eye;+Ni nɔ ni baalabii ni keɔ yuu kɛbaa lɛ shi lɛ, baalabii ni bɛ fiji lɛ eye;Ni nɔ ni baalabii ni bɛ fiji lɛ shi lɛ, baalabii ni yeɔ nii ni amɛtɔrɔɔɔ lɛ eye.*+
5 Nyɛ dãatɔlɔi,+ nyɛhiɛ atsɛ̃a ní nyɛfóa!
Nyɛ wainnulɔi, nyɛfóa waa,Ejaakɛ ajie wain dɔkɔdɔkɔ lɛ yɛ nyɛdaaŋ.+
6 Ejaakɛ jeŋmaŋ ko efã kɛba mishikpɔŋ lɛ nɔ, ehe wa ni anyɛɛɛ emli bii lɛ akane.+
Enyanyɔji lɛ, jata nyanyɔji ni,+ ekadai lɛ, jata kadai ni.
7 Ekpãtã miwain tso lɛ hiɛ, ni ehã migbami tso lɛ etsɔ tsoku,Ekpɔlɔ tsei lɛ ahe sakoo, ni eshɛrɛ eshwie,Ni amɛniji ní etsɛ̃rɛ̃ lɛ ahe eyɛ futaa.
8 Fó waa tamɔ bɔ ni oblayoo fro* buɔ kpekpe ni efóɔ waaYɛ eblayeiaŋ ayemforo wu lɛ hewɔ lɛ.
9 Ŋmaa* afɔle+ kɛ dãa afɔle+ sɛɛ efo yɛ Yehowa shĩa lɛ;Osɔfoi lɛ, ni ji Yehowa sɔɔlɔi lɛ, miiye awerɛho.
10 Akpãtã ŋmɔji lɛ ahiɛ, shikpɔŋ lɛ miiye awerɛho;+Ejaakɛ akpãtã ŋmaa lɛ hiɛ, wain hee lɛ egbi, mu lɛ hu sɛɛ efo.+
11 Okwaafoi ahiɛ egboi, mɛi ni saa wain tsei ahe lɛ miifó waa,Yɛ wiiti kɛ barle* lɛ hewɔ;Ejaakɛ ŋmɔshi nibii ni akpa lɛ ahiɛ ekpãtã.
12 Wain tso lɛ egbi,Agbami tso lɛ eŋala.
Pomegranet tso lɛ, tɛŋ tso lɛ, kɛ apol tso lɛ,Tsei lɛ fɛɛ ni yɔɔ ŋa lɛ mli lɛ egbigbii;+Ejaakɛ miishɛɛ etsɔ hiɛgbele yɛ gbɔmɛi ateŋ.
13 Nyɛ osɔfoi, nyɛbumɔa kpekpe* ni nyɛyea awerɛho;*Nyɛ afɔleshaa latɛ lɛ he sɔɔlɔi,+ nyɛfóa waa.
Nyɛ, mi-Nyɔŋmɔ lɛ sɔɔlɔi, nyɛbaa, nyɛbumɔa kpekpe kɛwɔa;Ejaakɛ akɛ ŋmaa afɔle+ kɛ dãa afɔle+ baaa nyɛ-Nyɔŋmɔ lɛ shĩa lɛ dɔŋŋ.
14 Nyɛshiɛa akɛ ahi ŋmaa;* nyɛtsɛa henaabuamɔ krɔŋkrɔŋ.+
Nyɛbuaa onukpai lɛ kɛ shikpɔŋ lɛ nɔ bii lɛ fɛɛ anaaKɛbaa Yehowa, nyɛ-Nyɔŋmɔ lɛ shĩa lɛ,+ ni nyɛbolɔa nyɛtsɛa Yehowa koni eye ebua nyɛ.
15 Ao, nakai gbi lɛ miiba!
Yehowa gbi lɛ ebɛŋkɛ,+Ni ebaaba tamɔ hiɛkpatamɔ kɛaajɛ Ofe lɛ ŋɔɔ!
16 Bɛ wɔhiŋmɛii jwere nɔ nɛkɛ nɔŋŋ ni aŋɔ niyenii kɛje wɔhiɛ,Ni miishɛɛ kɛ nyamɔ sɛɛ fo yɛ wɔ-Nyɔŋmɔ lɛ shĩa lɛ?
17 Dumɔwui* lɛ ahiɛ ekpãtã.*
Nitoohei lɛ kamɔ shi efoji.
Akumɔ aboŋoi lɛ ashwie shi, ejaakɛ ŋmaa tsei lɛ eŋala.
18 Lɛɛ kooloi po miikɛ̃mɔ!
Tsinai miitsomlo, ejaakɛ amɛnáaa jwɛi!
Ni tookui miina nɔ.
19 Ao Yehowa, bo mibolɔɔ mitsɛɔ nɛɛ;+Ejaakɛ la ekpãtã ŋa nɔ jwɛi lɛ ahiɛ,Ni lalilɛi eshã tsei fɛɛ ni yɔɔ ŋa lɛ mli lɛ.
20 Ŋa mli kooloi lɛ po hiɛ miitse bo,Ejaakɛ fai lɛ egbi,Ni la ekpãtã ŋa nɔ jwɛi lɛ ahiɛ.”
Shishigbɛ Niŋmaa
^ Eshishi ji, “Yehowa Ji Nyɔŋmɔ.”
^ Baalabi ji agã henɔ ko.
^ Akɛ Hebri wiemɔi srɔtoi tsu nii yɛ biɛ kɛhã baalabii henɔi ejwɛ.
^ Loo “oblayoo.”
^ Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
^ Eji wiiti henɔ ko.
^ Hebri sht. ŋm., “nyɛfia nyɛhɛ.”
^ Loo “nyɛgbalaa nyɛtsitsi mai.”
^ Loo “Nyɛshiɛa ŋmaahilɛ krɔŋkrɔŋ.”
^ Shishitsɔɔmɔi komɛi kɛɔ akɛ, “Agbamii gbiji.”
^ Loo “Dumɔwui lɛ egbigbii yɛ amɛsofii lɛ ashishi.”
