Nɔ Ni Yohane Ŋma 17:1-26
17 Yesu wie nibii nɛɛ, ni ehole ehiŋmɛii anɔ kɛtee ŋwɛi ni ekɛɛ: “Ataa, ŋmɛlɛtswaa lɛ eshɛ. Wo obi lɛ hiɛ nyam, koni obi lɛ hu awo ohiɛ nyam,+
2 tamɔ bɔ ni ohã lɛ hegbɛ yɛ heloo* fɛɛ nɔ lɛ,+ koni lɛ hu ehã mɛi ni okɛhã lɛ+ lɛ fɛɛ naanɔ wala.+
3 Enɛ ji naanɔ wala lɛ,+ akɛ amɛbaale bo,* anɔkwa Nyɔŋmɔ kome lɛ,+ kɛ Yesu Kristo, mɔ ni otsu lɛ lɛ.+
4 Miwo ohiɛ nyam yɛ shikpɔŋ lɛ nɔ+ ejaakɛ migbe nitsumɔ ni okɛhã mi akɛ mitsu lɛ naa.+
5 No hewɔ lɛ, agbɛnɛ, Ataa, okɛ anunyam ni miyɔɔ yɛ omasɛi dani je lɛ yɔɔ lɛ awo mihiɛ nyam yɛ omasɛi.+
6 “Mijie ogbɛ́i lɛ shi mitsɔɔ mɛi ni okɛ amɛ hã mi kɛjɛ je lɛ mli lɛ.*+ Onii ji amɛ, ni okɛ amɛ hã mi, ni amɛyeɔ owiemɔ lɛ nɔ.
7 Agbɛnɛ, amɛná amɛle akɛ nibii ni okɛhã mi lɛ fɛɛ lɛ, oŋɔɔ ejɛ;
8 ejaakɛ wiemɔi ni okɛhã mi lɛ, mikɛhã amɛ,+ ni amɛmɔ mli ni amɛná amɛle lɛɛlɛŋ akɛ miba akɛ onajiaŋdamɔlɔ,+ ni amɛheɔ amɛyeɔ akɛ bo otsu mi.+
9 Miibi miihã amɛ; mibiii mihãaa je lɛ, shi moŋ miibi miihã mɛi ni okɛhã mi lɛ, ejaakɛ onii ji amɛ;
10 ni minii fɛɛ lɛ, onɔ ni, ni bo hu onii lɛ, minɔ ni,+ ni awo mihiɛ nyam yɛ amɛteŋ.
11 “Mibɛ je lɛ mli dɔŋŋ, shi amɛ lɛ, amɛyɛ je lɛ mli,+ ni miiba oŋɔɔ. Ataa Krɔŋkrɔŋ, kwɛmɔ amɛnɔ+ yɛ bo diɛŋtsɛ ogbɛ́i ni okɛhã mi lɛ hewɔ, koni amɛfee ekome tamɔ bɔ ni wɔfee ekome lɛ.+
12 Be ni mikɛ amɛ yɔɔ lɛ, mikwɛɔ amɛnɔ+ yɛ bo diɛŋtsɛ ogbɛ́i ni okɛhã mi lɛ hewɔ; ni mibu amɛhe, ni amɛteŋ mɔ kome folo po hiɛ kpãtãko+ akɛ ja hiɛkpatamɔ bi lɛ,+ koni ŋmalɛ lɛ aba mli.+
13 Shi agbɛnɛ, miiba oŋɔɔ, ni miiwie nibii nɛɛ yɛ je lɛ mli, koni amɛná mimiishɛɛ lɛ yɛ amɛmli ni eyi amɛ obɔ.+
14 Mikɛ owiemɔ lɛ ehã amɛ, shi je lɛ nyɛɔ amɛ, ejaakɛ amɛfataaa je lɛ he,+ tamɔ bɔ ni mi hu mifataaa je lɛ he lɛ.
15 “Mibiii akɛ ojie amɛ kɛje je lɛ mli, shi moŋ akɛ okwɛ amɛnɔ yɛ mɔ fɔŋ lɛ hewɔ.+
16 Amɛfataaa je lɛ he,+ tamɔ bɔ ni mi hu mifataaa je lɛ he lɛ.+
17 Okɛ anɔkwale lɛ afee amɛ krɔŋkrɔŋ;*+ owiemɔ lɛ anɔkwale ni.+
18 Bɔ ni otsu mi je lɛ mli lɛ, nakai nɔŋŋ mi hu mitsu amɛ je lɛ mli.+
19 Ni mi diɛŋtsɛ miifee mihe krɔŋkrɔŋ miihã amɛ, koni amɛ hu akɛ anɔkwale lɛ afee amɛ krɔŋkrɔŋ.
20 “Mibiii mihãaa mɛnɛɛmɛi pɛ, shi moŋ kɛhã mɛi ni tsɔɔ amɛwiemɔ nɔ amɛnáa hemɔkɛyeli yɛ mimli lɛ hu,
21 koni amɛ fɛɛ amɛfee ekome,+ tamɔ bɔ ni bo, Ataa, okɛ mi efee ekome, ni mi hu mikɛ bo efee ekome lɛ,+ koni amɛ hu amɛkɛ wɔ afee ekome, koni je lɛ ahe aye akɛ bo otsu mi.
22 Mikɛ anunyam ni okɛhã mi lɛ ehã amɛ, bɔ ni afee ni amɛfee ekome, tamɔ bɔ ni wɔ hu wɔfee ekome lɛ.+
23 Mi kɛ amɛ efee ekome, ni okɛ mi efee ekome, bɔ ni afee ni amɛfee ekome kɛmɔ shi, koni je lɛ aná ale akɛ bo otsu mi, ni akɛ, osumɔɔ amɛ tamɔ bɔ ni osumɔɔ mi lɛ.
24 Ataa, miitao ni mɛi ni okɛhã mi lɛ hu kɛ mi ahi he ni miyɔɔ lɛ,+ koni amɛna minunyam ni okɛhã mi lɛ, ejaakɛ osumɔɔ mi dani ato je lɛ shishi.*+
25 Ataa jalɔ, anɔkwa, je lɛ náko ale bo,+ shi mi lɛ, mile bo,+ ni mɛnɛɛmɛi hu ebaná amɛle akɛ bo otsu mi.
26 Mihã amɛle ogbɛ́i lɛ, ni masaa mafee nakai,+ koni suɔmɔ ni okɛsumɔ mi lɛ ahi amɛmli, ni mi hu mikɛ amɛ afee ekome.”+
Shishigbɛ Niŋmaa
^ Loo “gbɔmɛi; mɛi.”
^ Loo “amɛbaaya nɔ amɛná ohe nilee.”
^ Loo “Mihã mɛi ni okɛ amɛ hã mi kɛjɛ je lɛ mli lɛ ele ogbɛ́i lɛ.”
^ Loo “Okɛ anɔkwale lɛ ajie amɛ ato afã.”
^ Greek sht. ŋm., “dani ashɛ (dumɔwu) afɔ̃ shi,” ni tsɔɔ akɛ, dani Adam kɛ Hawa bɔi amɛbii lɛ ahɔŋɔɔ.
