Nɔ Ni Yohane Ŋma 2:1-25
2 Ni gbi ni ji etɛ lɛ nɔ lɛ, aŋmɛ yookpeemɔ he okpɔlɔ ko yɛ Kana ni yɔɔ Galilea lɛ, no mli lɛ Yesu mami yɛ jɛmɛ.
2 Afɔ̃ Yesu kɛ ekaselɔi lɛ hu nine kɛtee yookpeemɔ he okpɔlɔŋmɛɛ lɛ shishi.
3 Be ni wain lɛ miihe atã lɛ, Yesu mami kɛɛ lɛ akɛ: “Amɛbɛ wain.”
4 Shi Yesu kɛɛ lɛ akɛ: “Yoo, mɛni no kɔɔ yɛ mi kɛ bo he?* Miŋmɛlɛtswaa lɛ shɛko.”
5 Emami kɛɛ mɛi ni sɔmɔɔ lɛ akɛ: “Nɔ fɛɛ nɔ ni ebaakɛɛ nyɛ lɛ, nyɛfea.”
6 No mli lɛ, tɛ nugbɛ́i ekpaa mamɔ jɛmɛ tamɔ bɔ ni Yudafoi lɛ amlai ni kɔɔ hetsemɔ he lɛ biɔ lɛ,+ ni eko fɛɛ eko yeɔ nu susumɔnii enyɔ loo etɛ.*
7 Yesu kɛɛ amɛ akɛ: “Nyɛwoa gbɛ́i lɛ amli nu obɔbɔ.” No hewɔ lɛ, amɛwo amɛ obɔbɔ.
8 Ni ekɛɛ amɛ akɛ: “Agbɛnɛ, nyɛyɛa eko ni nyɛkɛyahãa okpɔlɔŋmɛɛ lɛ nɔkwɛlɔ lɛ.” Ni amɛkɛtee.
9 Be ni okpɔlɔŋmɛɛ lɛ nɔkwɛlɔ lɛ sa nu ni amrɔ nɛɛ ahã etsɔ wain lɛ naa ni eleee he ni ejɛ (shi tsuji ni yɛ nu lɛ le) lɛ, okpɔlɔŋmɛɛ lɛ nɔkwɛlɔ lɛ tsɛ ayemforo wu lɛ
10 ni ekɛɛ lɛ akɛ: “Mɔ fɛɛ mɔ kɛ wain kpakpa lɛ maa shi klɛŋklɛŋ, ni be ni mɛi lɛ etɔrɔ lɛ, ekɛ nɔ ni eŋɔɔɔ lɛ baa. Bo lɛ, okɛ wain kpakpa lɛ eto kɛbashi amrɔ nɛɛ.”
11 Yesu fee enɛ yɛ Kana ni yɔɔ Galilea lɛ kɛje ekadii lɛ ashishi, ni ehã enunyam lɛ fee faŋŋ,+ ni ekaselɔi lɛ ná hemɔkɛyeli yɛ emli.
12 Enɛ sɛɛ lɛ, ekɛ emami kɛ enyɛmimɛi hii+ lɛ kɛ ekaselɔi lɛ kpeleke shi kɛtee Kapernaum,+ shi amɛyeee gbii pii yɛ jɛmɛ.
13 Agbɛnɛ, Yudafoi lɛ a-Hehoo+ lɛ miihe ashɛ, ni Yesu kwɔ kɛtee Yerusalem.
14 Eyana mɛi ni hɔ̃ɔ tsinai kɛ gwantɛŋi kɛ okpoi,+ kɛ shikatsakelɔi lɛ tara shi yɛ sɔlemɔ shĩa lɛ.
15 No hewɔ lɛ, be ni efee kpãi ni akɛgwaoɔ mɔ lɛ, eshwie amɛ fɛɛ kɛ amɛgwantɛŋi kɛ amɛtsinai lɛ kɛje sɔlemɔ shĩa lɛ, ni etsɔ shikatsakelɔi lɛ ashika lɛ eshwie shi ni etsirɛ amɛkpɔlɔi lɛ etswiatswiaa shi.+
16 Ni ekɛɛ mɛi ni hɔ̃ɔ okpoi lɛ akɛ: “Nyɛjiea nibii nɛɛ kɛjea biɛ! Nyɛkɛ mi-Tsɛ shĩa lɛ akpaa jarayeli shĩa* feemɔ!”+
17 Ekaselɔi lɛ kai akɛ aŋma akɛ: “Oshĩa lɛ he hiɛdɔɔ lɛ baaye mi.”+
18 No hewɔ lɛ, Yudafoi lɛ kɛɛ lɛ akɛ: “Akɛni oofee nibii nɛɛ hewɔ lɛ, mɛɛ okadi okɛbaatsɔɔ wɔ?”+
19 Yesu hã amɛ hetoo ekɛɛ: “Nyɛkumɔa sɔlemɔ shĩa nɛɛ, ni gbii etɛ mli lɛ mawó nɔ mama shi.”+
20 Kɛkɛ ni Yudafoi lɛ kɛɛ: “Afii 46 akɛma sɔlemɔ shĩa nɛɛ, ni bo lɛ, okɛ gbii etɛ baawó nɔ oma shi?”
21 Shi no mli lɛ eewie egbɔmɔtso lɛ he akɛ sɔlemɔ shĩa.+
22 Shi be ni atee lɛ shi kɛjɛ gbohii ateŋ lɛ, ekaselɔi lɛ kai akɛ no mli lɛ efɔɔ enɛ kɛɛmɔ,+ ni amɛhe ŋmalɛ lɛ kɛ nɔ ni Yesu wie lɛ amɛye.
23 Shi be ni eyɔɔ Yerusalem, yɛ Hehoo Gbijurɔyeli lɛ mli lɛ, mɛi babaoo na okadii ni efeɔ lɛ, ni amɛná hemɔkɛyeli yɛ egbɛ́i lɛ mli.
24 Shi Yesu lɛ, eheee amɛ eyeee ejaakɛ ele amɛ fɛɛ
25 ni ehe ehiaaa lɛ akɛ mɔ ko aye gbɔmɔ ko he odase atsɔɔ lɛ, ejaakɛ ele nɔ ni yɔɔ gbɔmɔ mli.+
Shishigbɛ Niŋmaa
^ Greek sht. ŋm., “Mɛni kɛhã mi kɛ kɛhã bo, yoo?” Eji fɔŋwiemɔ ní akɛkuɔ mɔ naa kɛtsɔɔ akɛ akpɛlɛɛɛ nɔ ko nɔ. Wiemɔ ni ji “yoo” ni ekɛtsu nii lɛ etsɔɔɔ akɛ ebuuu emami.
^ Eeenyɛ efee akɛ, nu susumɔnɔ lɛ ji bat, ni bat kome feɔ litai 22 (galɔn 5.81). Kwɛmɔ Saji Krokomɛi B14 lɛ.
^ Loo “jara nɔ.”
