Yoshua 10:1-43
10 Be ni Yerusalem maŋtsɛ Adoni-zedek nu akɛ Yoshua eŋɔ Ai ni ekpãtã hiɛ, ni efee Ai kɛ emaŋtsɛ+ lɛ tamɔ bɔ ni efee Yeriko kɛ emaŋtsɛ lɛ,+ ni agbɛnɛ hu, Gibeonbii lɛ kɛ Israel eyakpaŋ toiŋjɔlɛ kpaŋmɔ+ ni amɛyahi amɛteŋ lɛ nɔŋŋ lɛ,
2 etsui fã waa,+ ejaakɛ Gibeon ji maŋ kpeteŋkpele, tamɔ maŋtsɛmɛi amaji lɛ eko nɔŋŋ. Eda fe Ai,+ ni emli hii lɛ fɛɛ lɛ, tawulɔi sɔŋŋ ni.
3 No hewɔ lɛ, Yerusalem maŋtsɛ Adoni-zedek tsu ayakɛɛ Hebron maŋtsɛ Hoham,+ kɛ Yarmut maŋtsɛ Piram, kɛ Lakish maŋtsɛ Yafia, kɛ Eglon maŋtsɛ Debir+ akɛ:
4 “Nyɛbawaa mi ni wɔyatutuaa Gibeon, ejaakɛ ekɛ Yoshua kɛ Israelbii lɛ eyakpaŋ toiŋjɔlɛ kpaŋmɔ.”+
5 Kɛkɛ ni Amorbii+ amaŋtsɛmɛi enumɔ lɛ, ni ji Yerusalem maŋtsɛ lɛ kɛ Hebron maŋtsɛ lɛ kɛ Yarmut maŋtsɛ lɛ kɛ Lakish maŋtsɛ lɛ kɛ Eglon maŋtsɛ lɛ, bua amɛhe naa, amɛ kɛ amɛsraafoi lɛ, ni amɛtee amɛyabɔ nsara amɛwo Gibeon he koni amɛkɛ lɛ awu.
6 Ni Gibeonbii lɛ tsu ayakɛɛ Yoshua yɛ nsara lɛ mli yɛ Gilgal+ akɛ: “Kaakwa onyɔji lɛ.*+ Ba oya nɔŋŋ! Baahere wɔ, ni oye obua wɔ! Amorbii amaŋtsɛmɛi fɛɛ ni yɔɔ gɔji lɛ anɔ lɛ ebabua amɛhe naa amɛwo wɔ.”
7 No hewɔ lɛ, Yoshua kɛ hii ni yaa ta lɛ fɛɛ kɛ tawulɔi kãkãlɔi lɛ fɛɛ fã kɛjɛ Gilgal ni amɛkwɔ kɛtee.+
8 Ni Yehowa kɛɛ Yoshua akɛ: “Kaashe amɛ gbeyei,+ ejaakɛ mikɛ amɛ ewo odɛŋ.+ Amɛteŋ mɔ ko mɔ ko nyɛŋ ohiɛ edamɔ.”+
9 Yoshua nyiɛ kɛjɛ Gilgal jenamɔ muu fɛɛ, ni ebatutua amɛ trukaa.
10 Yehowa hã amɛjijaa yɛ Israel hiɛ,+ ni amɛgbe amɛteŋ mɛi babaoo yɛ Gibeon, ni amɛnyiɛ amɛsɛɛ kɛtsɔ gbɛ ni atsɔɔ nɔ kɛkwɔɔ kɛyaa Bet-horon lɛ nɔ, ni amɛtswia amɛ nii aahu kɛyashi Azeka kɛ Makeda tɔ̃ɔ.
11 Be ni amɛjoɔ foi yɛ Israel hiɛ ni amɛshɛ Bet-horon shikpelekemɔhe lɛ, Yehowa hã nyɔŋmɔŋtɛi wuji nɛ kɛjɛ ŋwɛi shwie amɛnɔ kɛyashi Azeka tɔ̃ɔ, ni amɛhiɛ kpãtã. Anɔkwa, mɛi ni nyɔŋmɔŋtɛi lɛ gbe lɛ ayi fa fe mɛi ni Israelbii lɛ kɛ klante gbe lɛ.
12 Gbi nɔ ni Yehowa ye Amorbii lɛ anɔ kunim butuu yɛ Israelbii lɛ ahiɛ lɛ, nakai gbi lɛ Yoshua kɛɛ Yehowa yɛ Israel hiɛ akɛ:
“Hulu, wa odamɔ shi+ yɛ Gibeon,+Ni bo nyɔɔŋtsere hu, wa odamɔ shi yɛ Ayalon Jɔɔ lɛ mli!”
13 No hewɔ lɛ, hulu lɛ wa edamɔ shi ni nyɔɔŋtsere lɛ hu tsiii ehe kɛyashi maŋ lɛ tɔ owele yɛ amɛhenyɛlɔi lɛ anɔ. Aŋma enɛ yɛ Yashar wolo+ lɛ mli. Hulu lɛ wa damɔ shi yɛ ŋwɛi teŋ ni eyeee oyai ní eyanyɔ shi, aaafee gbi muu fɛɛ.
14 Gbi ko bako dã ni tamɔ nakai gbi lɛ, eko tsɔko hiɛ bako ni eko hu bako yɛ no sɛɛ, ní Yehowa ebo gbɔmɔ gbee toi tamɔ nɛkɛ,+ ejaakɛ no mli lɛ Yehowa miiwu eehã Israel.+
15 No sɛɛ lɛ, Yoshua kɛ Israel fɛɛ ku amɛsɛɛ kɛba nsara lɛ mli yɛ Gilgal.+
16 No mli lɛ, maŋtsɛmɛi enumɔ lɛ ejo foi amɛyatee amɛhe yɛ tɛkplo ni yɔɔ Makeda lɛ mli.+
17 Ni abakɛɛ Yoshua akɛ: “Ayana maŋtsɛmɛi enumɔ lɛ ni amɛyatee amɛhe yɛ tɛkplo ni yɔɔ Makeda lɛ mli.”+
18 No hewɔ lɛ, Yoshua kɛɛ: “Nyɛkokloa tɛi wuji kɛtsimɔa tɛkplo lɛ naa, ní nyɛhã hii abu amɛhe.
19 Shi nyɛteŋ mɛi ni eshwɛ lɛ, nyɛkawaa nyɛdamɔa shi. Nyɛtiua nyɛhenyɛlɔi lɛ ni nyɛtswiaa amɛ nii kɛjɛa amɛsɛɛgbɛ.+ Nyɛkahãa amɛbotea amɛmaji lɛ amli, ejaakɛ Yehowa, nyɛ-Nyɔŋmɔ lɛ, kɛ amɛ ewo nyɛdɛŋ.”
20 Be ni Yoshua kɛ Israelbii lɛ egbe amɛteŋ mɛi babaoo ní amɛyi miihe atã, ní mɛi ni shwɛ pɛ ji mɛi ni jo foi kɛyabote maji ni atswa gbogboi awo amɛhe lɛ amli lɛ,
21 mɛi lɛ fɛɛ ku amɛsɛɛ kɛba Yoshua ŋɔɔ shweshweeshwe yɛ nsara lɛ mli yɛ Makeda. Mɔ ko mɔ ko ekaaa akɛ ebaawie wiemɔ kome folo po eshi* Israelbii lɛ.
22 Kɛkɛ ni Yoshua kɛɛ: “Nyɛgbelea tɛkplo lɛ naa ni nyɛjiea maŋtsɛmɛi enumɔ lɛ kɛjɛa tɛkplo lɛ mli nyɛbahãa mi.”
23 No hewɔ lɛ, amɛjie maŋtsɛmɛi enumɔ nɛɛ kɛjɛ tɛkplo lɛ mli amɛbahã lɛ: Yerusalem maŋtsɛ lɛ kɛ Hebron maŋtsɛ lɛ kɛ Yarmut maŋtsɛ lɛ kɛ Lakish maŋtsɛ lɛ kɛ Eglon maŋtsɛ lɛ.+
24 Be ni amɛkɛ maŋtsɛmɛi nɛɛ bahã Yoshua lɛ, etsɛ Israel hii lɛ fɛɛ kɛba eŋɔɔ ni ekɛɛ tawulɔi ni kɛ lɛ tee ta lɛ anɔ tatsɛmɛi lɛ akɛ: “Nyɛtsia kɛbaa. Nyɛkɛ nyɛnaji abamamɔa maŋtsɛmɛi nɛɛ akuɛi asɛɛ.” No hewɔ lɛ, amɛtsi kɛba, ni amɛkɛ amɛnaji bamamɔ amɛkuɛi asɛɛ.+
25 Ni Yoshua kɛɛ amɛ akɛ: “Nyɛkashea gbeyei, ni nyɛtsui akafãa hu.+ Nyɛfea ekãa ni nyɛwajea nyɛhe, ejaakɛ nɛkɛ ji bɔ ni Yehowa baafee nyɛhenyɛlɔi fɛɛ ni nyɛkɛwuɔ lɛ.”+
26 No sɛɛ lɛ, Yoshua tswia amɛ nii ni egbe amɛ, ni esɛŋ amɛ yɛ tsei jaŋŋi enumɔ anɔ, ni amɛtsotsoro tsei lɛ anɔ kɛyashi gbɛkɛnaashi.
27 Be ni hulu nyɔ shi lɛ, Yoshua fã ní ajie amɛ kɛje tsei jaŋŋi lɛ anɔ,+ ní ashɛrɛ amɛ ashwie tɛkplo ni amɛyatee amɛhe yɛ mli lɛ mli. Ni akɛ tɛi wuji tsimɔ tɛkplo lɛ naa, ni eyɛ nakai kɛbashi ŋmɛnɛ.
28 Yoshua ye Makeda+ nɔ kunim yɛ nakai gbi lɛ nɔ, ni ekɛ klante kpãtã maŋ lɛ hiɛ. Ekpãtã emli maŋtsɛ lɛ kɛ mɔ fɛɛ mɔ* ni yɔɔ mli lɛ hiɛ, ehãaa mɔ kome folo po ashwɛ ni hiɛ kã.+ Efee Makeda maŋtsɛ+ lɛ tamɔ bɔ ni efee Yeriko maŋtsɛ lɛ pɛpɛɛpɛ.
29 Ni Yoshua kɛ Israel fɛɛ fã kɛjɛ Makeda kɛtee Libna, ni amɛkɛ Libna+ yawu.
30 Yehowa kɛ maŋ lɛ kɛ emli maŋtsɛ+ lɛ hu wo Israel dɛŋ, ni amɛkɛ klante kpãtã maŋ lɛ kɛ mɔ fɛɛ mɔ* ni yɔɔ mli lɛ hiɛ, amɛhãaa mɔ kome folo po ashwɛ yɛ mli ni hiɛ kã. No hewɔ lɛ, amɛfee emli maŋtsɛ lɛ tamɔ bɔ ni amɛfee Yeriko maŋtsɛ lɛ pɛpɛɛpɛ.+
31 No sɛɛ lɛ, Yoshua kɛ Israel fɛɛ fã kɛjɛ Libna kɛtee Lakish,+ ni amɛyabɔ nsara yɛ jɛmɛ, ni amɛkɛ lɛ wu.
32 Yehowa kɛ Lakish wo Israel dɛŋ, ni amɛye enɔ kunim yɛ gbi ni ji enyɔ lɛ nɔ. Amɛkɛ klante kpãtã maŋ lɛ kɛ mɔ fɛɛ mɔ* ni yɔɔ mli lɛ hiɛ,+ tamɔ bɔ ni amɛfee Libna lɛ pɛpɛɛpɛ.
33 Ni Gezer+ maŋtsɛ Horam kwɔ kɛtee koni eyaye ebua Lakish, shi Yoshua tswia lɛ kɛ ewebii lɛ nii kɛyashi be ni eshwɛɛɛ mɔ kome folo po ni hiɛ kã.
34 Yoshua kɛ Israel fɛɛ fã kɛjɛ Lakish kɛtee Eglon,+ ni amɛyabɔ nsara yɛ jɛmɛ, ni amɛkɛ lɛ wu.
35 Amɛye enɔ kunim yɛ nakai gbi lɛ nɔ, ni amɛkɛ klante kpãtã hiɛ. Nakai gbi lɛ, amɛkpãtã mɔ fɛɛ mɔ* ni yɔɔ mli lɛ hiɛ, tamɔ bɔ ni amɛfee Lakish lɛ pɛpɛɛpɛ.+
36 Yoshua kɛ Israel fɛɛ fã kɛjɛ Eglon ni amɛkwɔ kɛtee Hebron,+ ni amɛkɛ lɛ yawu.
37 Amɛye enɔ kunim, ni amɛkɛ klante kpãtã maŋ lɛ kɛ emli maŋtsɛ lɛ kɛ ehewɔ maji lɛ kɛ mɔ fɛɛ mɔ* ni yɔɔ mli lɛ hiɛ, amɛhãaa mɔ kome folo po ashwɛ ni hiɛ kã. Ekpãtã maŋ lɛ kɛ mɔ fɛɛ mɔ* ni yɔɔ mli lɛ hiɛ, tamɔ bɔ ni efee Eglon lɛ pɛpɛɛpɛ.
38 Naagbee lɛ, Yoshua kɛ Israel fɛɛ dɔ amɛyi kɛtee Debir,+ ni amɛkɛ lɛ yawu.
39 Eye maŋ lɛ kɛ emli maŋtsɛ lɛ kɛ ehewɔ maji lɛ fɛɛ anɔ kunim, ni amɛkɛ klante gbe amɛ, ni amɛkpãtã mɔ fɛɛ mɔ* ni yɔɔ mli lɛ hiɛ,+ amɛhãaa mɔ kome folo po ashwɛ ni hiɛ kã.+ Bɔ ni efee Hebron, kɛ bɔ ni efee Libna kɛ emli maŋtsɛ lɛ, nakai pɛpɛɛpɛ efee Debir kɛ emli maŋtsɛ lɛ.
40 Yoshua ye shikpɔŋ lɛ fɛɛ, ni ji gɔji ashikpɔŋ lɛ kɛ Negeb lɛ kɛ Shefela+ lɛ kɛ gɔŋkpɔi lɛ, kɛ amɛmaŋtsɛmɛi lɛ anɔ kunim, ehãaa amɛteŋ mɔ kome folo po ashwɛ ni hiɛ kã; ekpãtã nɔ fɛɛ nɔ ni muɔ lɛ hiɛ,+ tamɔ bɔ ni Yehowa, Israel Nyɔŋmɔ lɛ, efã lɛ pɛpɛɛpɛ.+
41 Yoshua ye amɛnɔ kunim kɛjɛ Kadesh-barnea+ kɛtee Gaza+ kɛmɔ Goshen+ shikpɔŋ lɛ fɛɛ kɛyashi Gibeon+ tɔ̃ɔ.
42 Yoshua ye maŋtsɛmɛi nɛɛ fɛɛ kɛ amɛshikpɔji lɛ anɔ kunim yɛ be kome too mli, ejaakɛ Yehowa, Israel Nyɔŋmɔ lɛ, ji mɔ ni wu ehã Israel.+
43 Ni Yoshua kɛ Israel fɛɛ ku amɛsɛɛ kɛba nsara lɛ mli yɛ Gilgal.+
Shishigbɛ Niŋmaa
^ Hebri sht. ŋm., “Kaajie onine yɛ onyɔji lɛ ahe.”
^ Hebri sht. ŋm., “ekaaa akɛ ebaajɔɔ elilɛi naa ewo.”
^ Loo “susuma fɛɛ susuma.”
^ Loo “susuma fɛɛ susuma.”
^ Loo “susuma fɛɛ susuma.”
^ Loo “susuma fɛɛ susuma.”
^ Loo “susuma fɛɛ susuma.”
^ Loo “susuma fɛɛ susuma.”
^ Loo “susuma fɛɛ susuma.”
