Yoshua 11:1-23
11 Be ni Hazor maŋtsɛ Yabin nu he nɔŋŋ lɛ, ekɛ wiemɔ tsu ní akɛyahã Madon maŋtsɛ+ Yobab kɛ Shimron maŋtsɛ lɛ kɛ Akshaf maŋtsɛ+ lɛ
2 kɛ maŋtsɛmɛi ni yɔɔ kooyigbɛ gɔji lɛ anɔ lɛ kɛ maŋtsɛmɛi ni yɔɔ ŋa kpataa* lɛ nɔ yɛ Kineret wuoyigbɛ lɛ kɛ maŋtsɛmɛi ni yɔɔ Shefela lɛ kɛ Dor+ gɔŋkpɔi lɛ anɔ yɛ anaigbɛ lɛ
3 kɛ Kanaanbii+ ni yɔɔ bokãgbɛ kɛ anaigbɛ lɛ kɛ Amorbii+ lɛ kɛ Hitbii lɛ kɛ Perizbii lɛ kɛ Yebusbii lɛ ni yɔɔ gɔji lɛ anɔ lɛ kɛ Hivbii+ ni yɔɔ Hermon+ Gɔŋ lɛ shishi yɛ Mizpa shikpɔŋ lɛ nɔ lɛ.
4 No hewɔ lɛ, amɛ kɛ amɛsraafoi lɛ fɛɛ fã kɛba, amɛyi fa babaoo diɛŋtsɛ tamɔ ŋshɔnaa shia, ni amɛkɛ okpɔŋɔi kɛ ta shwiilii babaoo diɛŋtsɛ hu ba.
5 Maŋtsɛmɛi nɛɛ fɛɛ kpaŋ akɛ amɛbaakpe, ni amɛba, ni amɛ fɛɛ amɛbabɔ nsara yɛ Merom nui lɛ anaa koni amɛkɛ Israel abawu.
6 Ni Yehowa kɛɛ Yoshua akɛ: “Kaashe amɛ gbeyei,+ ejaakɛ wɔ́ aaafee nɛkɛ be mli lɛ, mikɛ amɛ fɛɛ baawo Israel dɛŋ ní amɛgbe amɛ. Folɔmɔ amɛkpɔŋɔi lɛ anaji asɛɛ fãi lɛ,+ ni okɛ la ashã amɛshwiilii lɛ.”
7 Kɛkɛ ni Yoshua kɛ hii fɛɛ ni yaa ta lɛ yatutua amɛ trukaa yɛ Merom nui lɛ anaa.
8 Yehowa kɛ amɛ wo Israel dɛŋ,+ ni amɛye amɛnɔ kunim, ni amɛtiu amɛ kɛtee Sidon Kpeteŋkpele+ lɛ kɛ Misrefot-maim+ kɛ Mizpe Jɔɔ lɛ mli tɔ̃ɔ yɛ bokãgbɛ, ni amɛtswia amɛ nii kɛyashi be ni eshwɛɛɛ mɔ kome folo po ni hiɛ kã.+
9 Ni Yoshua fee amɛ tamɔ bɔ ni Yehowa kɛɛ lɛ lɛ pɛpɛɛpɛ; efolɔ amɛkpɔŋɔi lɛ anaji asɛɛ fãi lɛ, ni ekɛ la shã amɛshwiilii lɛ.+
10 Agbɛnɛ hu, Yoshua ku esɛɛ ni eyaye Hazor nɔ kunim, ni ekɛ klante gbe emli maŋtsɛ lɛ,+ ejaakɛ tsutsu lɛ Hazor ji maŋtsɛyelii nɛɛ fɛɛ ayitso.
11 Amɛkɛ klante gbe mɔ fɛɛ mɔ* ni yɔɔ mli lɛ, amɛkpãtã amɛhiɛ butuu.+ Amɛshiii nɔ ko nɔ ko ni muɔ.+ Ni ekɛ la shã Hazor.
12 Yoshua ye maŋtsɛmɛi nɛɛ fɛɛ amaji lɛ anɔ kunim, ni ekɛ klante gbe amɛmli maŋtsɛmɛi lɛ fɛɛ.+ Ekpãtã amɛhiɛ,+ tamɔ bɔ ni Yehowa tsulɔ Mose fã lɛ pɛpɛɛpɛ.
13 Shi maji ni mamɔ amɛgɔŋkpɔi anɔ lɛ, Israel eshãaa eko eko, akɛ ja Hazor pɛ; no pɛ Yoshua shã.
14 Maji nɛɛ amli nii lɛ fɛɛ kɛ lɛɛ kooloi lɛ, Israelbii lɛ loo amɛhã amɛhe.+ Shi amɛkɛ klante gbe gbɔmɔ fɛɛ gbɔmɔ kɛyashi be ni amɛkpãtã mɔ fɛɛ mɔ hiɛ.+ Amɛshiii mɔ ko mɔ ko ni muɔ.+
15 Famɔ ni Yehowa kɛhã etsulɔ Mose lɛ, nakai famɔ lɛ nɔŋŋ Mose hu kɛhã Yoshua,+ ni nakai pɛpɛɛpɛ Yoshua fee. Nibii fɛɛ ni Yehowa fã Mose lɛ, Yoshua shiii emli eko eko ní etsuuu he nii.+
16 Yoshua ye shikpɔŋ nɛɛ fɛɛ nɔ kunim, gɔji ashikpɔŋ lɛ kɛ Negeb+ lɛ fɛɛ kɛ Goshen shikpɔŋ lɛ fɛɛ kɛ Shefela+ lɛ kɛ Araba+ lɛ kɛ Israel gɔji lɛ kɛ amɛ-Shefela* lɛ,
17 kɛjɛ Halak Gɔŋ ní yaa* Seir lɛ he, aahu kɛyashi Baal-gad+ ni yɔɔ Lebanon Jɔɔ lɛ mli, yɛ Hermon Gɔŋ+ lɛ shishi lɛ, ni emɔmɔ amɛmaŋtsɛmɛi lɛ fɛɛ, eye amɛnɔ kunim, ni egbe amɛ.
18 Yoshua kɛ maŋtsɛmɛi nɛɛ fɛɛ wu ta be saŋŋ.
19 Maŋ ko maŋ ko kɛ Israelbii lɛ efeee toiŋjɔlɛ kpaŋmɔ, akɛ ja Hivbii ni yɔɔ Gibeon lɛ pɛ.+ Tawuu nɔ amɛtsɔ amɛye maji krokomɛi lɛ fɛɛ anɔ kunim.+
20 Yehowa ji mɔ ni ŋmɛ gbɛ ni amɛkpiliŋ amɛtsui+ koni amɛkɛ Israel awu ta lɛ, bɔ ni afee ni akpãtã amɛhiɛ, ní akana amɛ mɔbɔ kwraa.+ Esa akɛ akpãtã amɛhiɛ tamɔ bɔ ni Yehowa fã Mose lɛ pɛpɛɛpɛ.+
21 Nakai be lɛ mli lɛ, Yoshua bule Anakbii+ lɛ ashishi kɛje gɔji lɛ anɔ kɛ Hebron kɛ Debir kɛ Anab kɛ Yuda gɔji lɛ fɛɛ anɔ kɛ Israel gɔji lɛ fɛɛ anɔ. Yoshua kpãtã amɛ kɛ amɛmaji lɛ ahiɛ.+
22 Eshwɛɛɛ Anakbii lɛ ateŋ mɔ ko mɔ ko yɛ Israelbii lɛ ashikpɔŋ lɛ nɔ; Gaza+ kɛ Gat+ kɛ Ashdod+ pɛ ji hei ni eshwɛ amɛteŋ mɛi komɛi yɛ.+
23 No hewɔ lɛ, Yoshua ye shikpɔŋ lɛ fɛɛ nɔ kunim, tamɔ bɔ ni Yehowa wo Mose shi lɛ pɛpɛɛpɛ,+ ni Yoshua kɛhã Israel akɛ amɛgboshinii, koni ajara ahã amɛ yɛ amɛwekui lɛ anaa, yɛ gbɛfaŋnɔ ni sa akɛ amɛná lɛ naa.+ Ni tai lɛ asɛɛ fo yɛ shikpɔŋ lɛ nɔ.+
Shishigbɛ Niŋmaa
^ Loo “Araba.”
^ Loo “susuma fɛɛ susuma.”
^ Loo “amɛgɔŋkpɔi ni yɔɔ gɔji lɛ ashishi.”
^ Loo “kwɔɔ kɛyaa.”
