Yoshua 17:1-18
17 Ni afɔ̃ oshiki+ lɛ ahã Manase+ weku lɛ, ejaakɛ lɛ ji Yosef kromɔbi.+ Akɛni Manase kromɔbi Makir,+ ni ji Gilead tsɛ lɛ, ji tawulɔ hewɔ lɛ, akɛ Gilead kɛ Bashan hã lɛ.+
2 Ni afɔ̃ oshiki lɛ ahã Manase seshibii ni eshwɛ lɛ yɛ amɛtsɛmɛi ashĩai lɛ anaa, amɛji Abiezerbii+ lɛ kɛ Helekbii lɛ kɛ Asrielbii lɛ kɛ Shekembii lɛ kɛ Heferbii lɛ kɛ Shemidabii lɛ. Mɛnɛɛmɛi ji Yosef binuu Manase seshibii lɛ, ni ji ebihii lɛ, yɛ amɛtsɛmɛi ashĩai lɛ anaa.+
3 Shi Zelofehad,+ ni ji Manase binuu Makir binuu Gilead binuu Hefer binuu lɛ bɛ bihii, biyei pɛ eyɔɔ, ni ebiyei lɛ agbɛ́ii nɛ: Mala kɛ Noa kɛ Hogla kɛ Milka kɛ Tirza.
4 No hewɔ lɛ, amɛtee osɔfo Eleazar+ kɛ Nun binuu Yoshua kɛ wekunukpai lɛ aŋɔɔ amɛyakɛɛ akɛ: “Yehowa ji mɔ ni fã Mose akɛ ehã wɔ gboshinii yɛ wɔnyɛmimɛi hii lɛ ateŋ.”+ No hewɔ lɛ, yɛ Yehowa famɔ naa lɛ, ehã amɛ gboshinii yɛ amɛtsɛ nyɛmimɛi hii lɛ ateŋ.+
5 Agbɛnɛ hu, ahã Manase gbɛfaŋnii nyɔŋma, esoro Gilead kɛ Bashan shikpɔŋ lɛ ni yɔɔ Yordan lɛ sɛɛ* lɛ,+
6 ejaakɛ Manase biyei lɛ ná gboshinii yɛ ebihii lɛ ateŋ, ni Gilead shikpɔŋ lɛ tsɔ Manase seshibii ni eshwɛ lɛ anɔ.
7 Ni Manase husu lɛ jɛ Asher kɛtee Mikmetat+ ni yɔɔ Shekem+ hiɛ lɛ, ni husu lɛ tsa nɔ kɛtsɔ wuoyigbɛ* kɛtee En-Tapuabii lɛ ashikpɔŋ lɛ nɔ.
8 Tapua+ shikpɔŋ lɛ tsɔ Manase nɔ, shi Tapua ni yɔɔ Manase husu lɛ naa lɛ ji Efraimbii lɛ anɔ.
9 Ni husu lɛ kpeleke shi kɛtee Kana Nujɔɔ lɛ naa, yɛ nujɔɔ lɛ wuoyi. Efraim yɛ maji yɛ Manase maji lɛ ateŋ,+ ni Manase husu lɛ kã nujɔɔ lɛ kooyi, ni eyagbe naa yɛ ŋshɔ lɛ naa.+
10 Wuoyigbɛ lɛ Efraim nɔ ni, ni kooyigbɛ lɛ Manase nɔ ni, ni ŋshɔ lɛ ji ehusu,+ ni amɛyaa* kɛyashiɔ Asher yɛ kooyigbɛ, kɛ Isakar yɛ bokãgbɛ.
11 Akɛ maji ni nyiɛ sɛɛ nɛɛ hã Manase yɛ Isakar kɛ Asher shikpɔji lɛ anɔ: Bet-shean kɛ maji ni baa lɛ abo* lɛ, Ibleam+ kɛ maji ni baa lɛ abo lɛ, mɛi ni yɔɔ Dor+ lɛ kɛ maji ni baa lɛ abo lɛ, mɛi ni yɔɔ En-dor+ lɛ kɛ maji ni baa lɛ abo lɛ, mɛi ni yɔɔ Taanak+ lɛ kɛ maji ni baa lɛ abo lɛ, kɛ mɛi ni yɔɔ Megido lɛ kɛ maji ni baa lɛ abo lɛ, gɔji anɔ maji etɛ.
12 Shi Manase seshibii lɛ nyɛɛɛ aŋɔ maji nɛɛ; Kanaanbii lɛ tee nɔ amɛhi shikpɔŋ nɛɛ nɔ kɛ̃.+
13 Be ni Israelbii lɛ ahe bawa lɛ, amɛnyɛ Kanaanbii lɛ anɔ koni amɛtsu nitsumɔ ni wa amɛhã amɛ,+ shi amɛshwieee amɛ kɛjeee shikpɔŋ lɛ nɔ* kwraa kɛmɔɔɔ shi.+
14 Yosef seshibii lɛ kɛɛ Yoshua akɛ: “Mɛni hewɔ ohã wɔ* gbɛfaŋnɔ kome+ ni osusu shikpɔŋ kome pɛ ohã wɔ* akɛ wɔgboshinii* lɛ? Wɔyi fa waa, ejaakɛ Yehowa ejɔɔ wɔ kɛbashi ŋmɛnɛ.”+
15 Yoshua hã amɛ hetoo akɛ: “Kɛ́ nyɛyi fa waa lɛ, no lɛ, nyɛyaa koo lɛ mli ni nyɛyagbaa he ko nyɛhãa nyɛhe yɛ Perizbii+ lɛ kɛ Refabii+ lɛ ashikpɔŋ lɛ nɔ, ejaakɛ Efraim gɔji lɛ anɔ+ edaaa hãaa nyɛ.”
16 Kɛkɛ ni Yosef seshibii lɛ kɛɛ akɛ: “Gɔji lɛ anɔ edaaa hãaa wɔ, ni Kanaanbii fɛɛ ni yɔɔ jɔɔ lɛ mli lɛ yɛ ta shwiilii+ kɛ amɛhe dadei,* mɛi ni yɔɔ Bet-shean+ kɛ maji ni baa lɛ abo* lɛ amli lɛ, kɛ mɛi ni yɔɔ Yezreel Jɔɔ+ lɛ mli lɛ fɛɛ.”
17 No hewɔ lɛ, Yoshua kɛɛ Yosef shĩa lɛ, ni ji Efraim kɛ Manase akɛ: “Nyɛyi fa waa, ni nyɛyɛ hewalɛ kpele. Ahãŋ nyɛ gbɛfaŋnɔ kome pɛ,+
18 shi moŋ, akɛ gɔji lɛ anɔ hu baahã nyɛ.+ Koo ni moŋ, shi nyɛbaafolɔ tsei lɛ nyɛshwie, ni ebaatsɔ nyɛshikpɔŋ lɛ husu lɛ naagbee. Ejaakɛ nyɛbaashwie Kanaanbii lɛ kɛje nɔ, eyɛ mli moŋ akɛ amɛhe wa ni amɛyɛ shwiilii kɛ amɛhe dadei.”*+
Shishigbɛ Niŋmaa
^ Ni ji, Yordan lɛ bokãgbɛ.
^ Hebri sht. ŋm., “ninejurɔgbɛ.”
^ Ni tsɔɔ akɛ, Manasebii lɛ loo Manase husu lɛ.
^ Loo “ehewɔ maji.”
^ Loo “shi amɛshɔ̃ɔɔ shikpɔŋ lɛ yɛ amɛdɛŋ.”
^ Hebri sht. ŋm., “mi.”
^ Hebri sht. ŋm., “mi.”
^ Hebri sht. ŋm., “migboshinii.”
^ Hebri sht. ŋm., “dade shwiilii.”
^ Loo “ehewɔ maji.”
^ Hebri sht. ŋm., “dade shwiilii.”
