Yoshua 5:1-15
5 Be ni Amorbii+ lɛ amaŋtsɛmɛi fɛɛ ni yɔɔ Yordan lɛ anaigbɛ* lɛ, kɛ Kanaanbii+ lɛ amaŋtsɛmɛi fɛɛ ni yɔɔ ŋshɔ lɛ naa lɛ nu akɛ Yehowa hã Yordan lɛ mli nui lɛ gbi yɛ Israelbii lɛ ahiɛ kɛyashi amɛfo amɛtã lɛ, amrɔ nɔŋŋ lɛ amɛtsui fã,*+ ni ekãa fɛɛ ni yɔɔ amɛmli lɛ laaje* yɛ Israelbii lɛ ahewɔ.+
2 Nakai be lɛ mli lɛ, Yehowa kɛɛ Yoshua akɛ: “Feemɔ tɛ kaklai ohã ohe, ní ofolɔ Israel hii lɛ ketia+ ekoŋŋ, nɔ ni ji shii enyɔ nɔ.”
3 No hewɔ lɛ, Yoshua fee tɛ kaklai, ni efolɔ Israel hii lɛ ketia yɛ Gibeat-haaralot.*+
4 Nɔ hewɔ ní Yoshua folɔ amɛ ketia lɛ nɛ: Gbɔmɛi lɛ ateŋ hii fɛɛ ni shi Ejipt lɛ, hii fɛɛ ni ji tawulɔi* lɛ, gboi yɛ ŋa lɛ nɔ be ni amɛshi Ejipt ni amɛnyiɛ gbɛ kɛbaa lɛ.+
5 Mɛi fɛɛ ni shi Ejipt lɛ, afolɔ amɛ ketia momo, shi mɛi fɛɛ ni afɔ yɛ ŋa lɛ nɔ be ni amɛshi Ejipt ni amɛnyiɛ gbɛ kɛbaa lɛ, afolɔko amɛ ketia.
6 Israelbii lɛ nyiɛ ŋa lɛ nɔ afii 40+ kɛyashi maŋ muu lɛ fɛɛ, ni ji hii tawulɔi ni shi Ejipt ni booo Yehowa gbee toi lɛ gboi.+ Yehowa kã amɛ kitã akɛ ehãŋ amɛna shikpɔŋ+ ni Yehowa kã amɛtsɛmɛi lɛ kitã akɛ ekɛbaahã wɔ+ lɛ kɔkɔɔkɔ, shikpɔŋ ni mliki kɛ wo hoɔ yɛ nɔ lɛ.+
7 No hewɔ lɛ, ehã amɛbihii lɛ baye amɛnajiaŋ.+ Mɛnɛɛmɛi Yoshua folɔ amɛ ketia lɛ; afolɔko amɛ ketia, ejaakɛ afolɔɔɔ amɛ ketia be ni amɛnyiɛ gbɛ lɛ nɔ kɛbaa lɛ.
8 Be ni afolɔ maŋ muu lɛ fɛɛ ketia agbe naa lɛ, amɛhi he ni amɛyɔɔ lɛ yɛ nsara lɛ mli kɛyashi amɛhe wa amɛ.
9 Ni Yehowa kɛɛ Yoshua akɛ: “Ŋmɛnɛ lɛ, mikoklo Ejipt ahorabɔɔ lɛ kɛje nyɛnɔ.” No hewɔ lɛ, atsɛɔ jɛmɛ akɛ Gilgal*+ kɛbashi ŋmɛnɛ.
10 Israelbii lɛ tee nɔ amɛbɔ nsara yɛ Gilgal, ni amɛye Hehoo lɛ yɛ nyɔɔŋ lɛ nɔ gbi ni ji 14+ lɛ gbɛkɛ mli, yɛ Yeriko ŋa kpataa lɛ nɔ.
11 Ni Hehoo lɛ nɔ jetsɛremɔ lɛ, amɛbɔi shikpɔŋ lɛ nɔ nibaa nii lɛ yeli, blodo ni ashikishaŋ-sha* bɛ mli+ kɛ ŋmaa* ni ashĩ, yɛ nakai gbi lɛ nɔ nɔŋŋ.
12 Kɛkɛ ni gbi ni nyiɛ sɛɛ lɛ, ni ji gbi ni amɛye shikpɔŋ lɛ nɔ nibaa nii lɛ eko lɛ, mana lɛ sɛɛ fo; Israelbii lɛ náaa mana dɔŋŋ,+ shi amɛbɔi Kanaan shikpɔŋ lɛ nɔ nibaa nii lɛ eko yeli yɛ nakai afi lɛ mli.+
13 Be ni Yoshua yɔɔ Yeriko masɛi lɛ, ewó ehiɛ nɔ ni ena nuu ko+ damɔ ehiɛgbɛ ní egbala eklante ehiɛ yɛ edɛŋ.+ Ni Yoshua nyiɛ kɛyanina lɛ ni ebi lɛ akɛ: “Ani oyɛ wɔgbɛfaŋ, aloo oyɛ wɔhenyɛlɔi lɛ agbɛfaŋ?”
14 Ni nuu lɛ kɛɛ: “Dabi, shi moŋ miba akɛ Yehowa asraafoi lɛ anɔ lumɔ.”*+ Kɛkɛ ni Yoshua kɛ ehiɛ bu shi ni ekoto lɛ, ni ebi lɛ akɛ: “Mɛni minuŋtsɔ yɔɔ etsulɔ kɛɛmɔ?”
15 Yehowa asraafoi lɛ anɔ lumɔ lɛ hã Yoshua hetoo akɛ: “Jiemɔ otokotai lɛ yɛ onane, ejaakɛ he ni odamɔ lɛ yɛ krɔŋkrɔŋ.” Amrɔ nɔŋŋ lɛ, Yoshua fee nakai.+
Shishigbɛ Niŋmaa
^ Hebri sht. ŋm., “he ni ye kɛyaa ŋshɔ lɛ naa gbɛ.”
^ Hebri sht. ŋm., “amɛtsui sere.”
^ Hebri sht. ŋm., “ni mumɔ ko eshwɛɛɛ yɛ amɛmli dɔŋŋ.”
^ Eshishi ji, “Ketia Naa Loi Gɔŋkpɔ.”
^ Loo “hii fɛɛ ni eshɛ ta yaa.”
^ Eshishi ji, “Koklomɔ; Aakoklo Kɛmiiya.”
^ Kwɛmɔ Wiemɔi Titrii Amligbalamɔ lɛ.
^ Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
^ Loo “onukpa.”
