Yoshua 8:1-35
8 Ni Yehowa kɛɛ Yoshua akɛ: “Kaashe gbeyei, ni otsui akafã hu.+ Ŋɔɔ hii fɛɛ ni yaa ta lɛ ofata ohe, ni okwɔ kɛya Ai ni okɛ lɛ ayawu. Naa, mikɛ Ai maŋtsɛ lɛ kɛ emaŋbii lɛ kɛ emaŋ lɛ kɛ eshikpɔŋ lɛ ewo odɛŋ.+
2 Feemɔ Ai kɛ emaŋtsɛ lɛ tamɔ bɔ ni ofee Yeriko kɛ emaŋtsɛ lɛ pɛpɛɛpɛ,+ shi obaanyɛ oloo emli nibii lɛ kɛ lɛɛ kooloi lɛ ohã ohe. Wo ka yɛ maŋ lɛ sɛɛgbɛ.”
3 No hewɔ lɛ, Yoshua kɛ hii fɛɛ ni yaa ta lɛ kwɔ kɛtee koni amɛkɛ Ai ayawu. Yoshua hala tawulɔi kãkãlɔi 30,000 ni ewo amɛ gbɛ nyɔɔŋ.
4 Ekɛ famɔ nɛɛ hã amɛ akɛ: “Naa, nyɛyawoa ka yɛ maŋ lɛ sɛɛgbɛ. Nyɛkɛ maŋ lɛ teŋ akajekɛa tsɔ, ni nyɛ fɛɛ nyɛfea klalo.
5 Mi kɛ mɛi fɛɛ ni fata mihe lɛ baatsi wɔbɛŋkɛ maŋ lɛ, ni kɛji amɛje kpo koni amɛkɛ wɔ abawu tamɔ tsutsu lɛ,+ wɔbaajo amɛnaa foi.
6 Kɛ́ amɛje kpo koni amɛtiu wɔ lɛ, wɔbaagbala amɛ kɛje maŋ lɛ mli, ejaakɛ amɛbaakɛɛ akɛ, ‘Amɛmiijo wɔnaa foi tamɔ tsutsu lɛ.’+ Ni wɔbaajo amɛnaa foi.
7 Kɛ́ eba lɛ nakai lɛ, nyɛtea shi kɛjɛa he ni nyɛwo ka lɛ yɛ lɛ ni nyɛbaŋɔa maŋ lɛ; Yehowa, nyɛ-Nyɔŋmɔ lɛ, kɛ maŋ lɛ baawo nyɛdɛŋ.
8 Kɛ́ nyɛŋɔ maŋ lɛ nɔŋŋ lɛ, nyɛwoa mli la.+ Nyɛfea tamɔ bɔ ni Yehowa ewie lɛ. Naa, famɔ ni mikɛhã nyɛ nɛ.”
9 Kɛkɛ ni Yoshua wo amɛ gbɛ, ni amɛnyiɛ kɛtee he ni amɛyaawo ka lɛ yɛ lɛ; amɛyawo ka lɛ yɛ Betel kɛ Ai teŋ, yɛ Ai anaigbɛ, shi Yoshua lɛ, ekɛ gbɔmɛi lɛ hi shi nakai nyɔɔŋ lɛ mli.
10 Kɛkɛ ni Yoshua te shi leebi maŋkpa ni ebua tawulɔi lɛ anaa, no sɛɛ lɛ, lɛ kɛ Israel onukpai lɛ nyiɛ amɛhiɛ kɛtee Ai.
11 Hii fɛɛ ni yaa ta+ ni fata ehe lɛ kwɔ kɛtee, ni amɛtsi amɛbɛŋkɛ maŋ lɛ hiɛgbɛ. Amɛyabɔ nsara yɛ Ai kooyigbɛ, ni jɔɔ lɛ kã amɛ kɛ Ai teŋ.
12 No mli lɛ, ehala hii aaafee 5,000 ni ehã amɛyawo ka+ yɛ Betel+ kɛ Ai teŋ, yɛ maŋ lɛ anaigbɛ.
13 No hewɔ lɛ, gbɔmɛi lɛ ateŋ mɛi babaoo yabɔ nsara yɛ maŋ lɛ kooyigbɛ,+ ni mɛi ni eyawo ka* lɛ hu yɛ maŋ lɛ anaigbɛ,+ ni Yoshua tee jɔɔ lɛ mli nakai nyɔɔŋ lɛ mli.
14 Ni be ni Ai maŋtsɛ lɛ na enɛ nɔŋŋ lɛ, lɛ kɛ maŋ lɛ mli hii lɛ je kpo oya leebi maŋkpa koni amɛkɛ Israel ayawu yɛ he ko yɛ ŋa kpataa lɛ hiɛgbɛ. Shi eleee akɛ mɛi komɛi ewo lɛ ka yɛ maŋ lɛ sɛɛgbɛ.
15 Be ni Ai hii lɛ fã kɛba lɛ, Yoshua kɛ Israel muu lɛ fɛɛ jo foi kɛtsɔ gbɛ lɛ nɔ, ni amɛkɛ amɛhiɛ tsɔɔ ŋa lɛ nɔ gbɛ.+
16 Kɛkɛ ni atsɛ mɛi fɛɛ ni yɔɔ maŋ lɛ mli lɛ koni amɛtiu amɛ; ni be ni amɛtiuɔ Yoshua lɛ, agbala amɛ kɛje maŋ lɛ mli.
17 Eshwɛɛɛ nuu kome folo po yɛ Ai kɛ Betel ni ejeee kpo eyanyiɛɛɛ Israel sɛɛ. Amɛshi maŋ lɛ naa amɛfɔ̃ shi gbanyaa, ni amɛtiu Israel.
18 Agbɛnɛ, Yehowa kɛɛ Yoshua akɛ: “Kpã akpɔlɔ ni yɔɔ odɛŋ lɛ mli otsɔɔ Ai gbɛ,+ ejaakɛ mikɛ maŋ lɛ baawo odɛŋ.”+ No hewɔ lɛ, Yoshua kpã akpɔlɔ ni yɔɔ edɛŋ lɛ mli etsɔɔ Ai gbɛ.
19 Be ni ekpã enine mli nɔŋŋ lɛ, mɛi ni ewo ka lɛ te shi oya kɛjɛ he ni amɛyɔɔ lɛ, ni amɛjo foi kɛtee maŋ lɛ mli ni amɛyaŋɔ. Amrɔ nɔŋŋ lɛ, amɛwo maŋ lɛ mli la.+
20 Be ni Ai hii lɛ tsɔ amɛsɛɛ lɛ, amɛna akɛ lasu miite shi yɛ maŋ lɛ mli kɛmiiya ŋwɛi, ni amɛnáaa hewalɛ ko dɔŋŋ ni amɛkɛaajo foi kɛtsɔ biɛ loo biɛ. Kɛkɛ ni mɛi ni joɔ foi kɛyaa ŋa lɛ nɔ gbɛ lɛ tsɔmɔ amɛhiɛ amɛwo mɛi ni nyiɛ amɛsɛɛ lɛ.
21 Be ni Yoshua kɛ Israel muu lɛ fɛɛ na akɛ kawolɔi lɛ eŋɔ maŋ lɛ, ni maŋ lɛ mli lasu lɛ miite shi kɛmiiya ŋwɛi lɛ, amɛdɔ amɛyi ni amɛtutua Ai hii lɛ.
22 Ni mɛi krokomɛi lɛ je kpo kɛjɛ maŋ lɛ mli koni amɛkɛ amɛ abakpe, ni amɛwo Ai hii lɛ teŋ, ni Israelbii lɛ ateŋ mɛi komɛi yɛ amɛbiɛ, ni amɛteŋ mɛi komɛi hu yɛ amɛbiɛ, ni amɛtswia Aibii lɛ nii aahu kɛyashi be ni eshwɛɛɛ mɔ kome po ni yi ná wala loo ejo foi.+
23 Shi amɛmɔ Ai maŋtsɛ lɛ hiɛkãalɔ,+ ni amɛkɛ lɛ ba Yoshua hiɛ.
24 Be ni Israel egbe Aibii lɛ fɛɛ yɛ ŋa lɛ nɔ he ni amɛtiu amɛ kɛtee lɛ, ní amɛteŋ naagbee bii lɛ fɛɛ enyɔnyɔi yɛ klante naa amɛtã lɛ, Israel muu lɛ fɛɛ ku amɛsɛɛ kɛtee Ai, ni amɛkɛ klante yagbe mɛi ni eshwɛ yɛ mli lɛ.
25 Mɛi fɛɛ ni gboi yɛ nakai gbi lɛ nɔ, kɛjɛ nuu nɔ kɛyashi yoo nɔ lɛ fee mɛi 12,000, ni ji Aibii lɛ fɛɛ.
26 Yoshua esuuu enine ní ekɛkpã akpɔlɔ lɛ mli+ lɛ kɛyashi ekpãtã Aibii lɛ fɛɛ ahiɛ.+
27 Shi nakai maŋ lɛ mli lɛɛ kooloi lɛ kɛ emli nibii lɛ, Israel ha amɛhã amɛhe, yɛ famɔi ni Yehowa kɛhã Yoshua lɛ naa.+
28 Ni Yoshua shã Ai ni ehã etsɔ koikoi, ni efee tamɔ gɔŋkpɔ ni ma shi daa,+ tamɔ eji kɛbashi ŋmɛnɛ lɛ.
29 Esɛŋ Ai maŋtsɛ lɛ yɛ tso jaŋŋ nɔ kɛyashi gbɛkɛnaashi, ni be ni hulu lɛ miihe anyɔ shi lɛ, Yoshua fã ní ajie egbonyo lɛ kɛje tso jaŋŋ lɛ nɔ.+ Ni amɛyashɛ egbonyo lɛ amɛfɔ̃ maŋ lɛ agbó lɛ naa, ni amɛto tɛi babaoo amɛshwie enɔ, ni enɛ yɛ jɛmɛ kɛbashi ŋmɛnɛ.
30 No be lɛ mli ni Yoshua ma afɔleshaa latɛ yɛ Ebal Gɔŋ+ lɛ nɔ ehã Yehowa, Israel Nyɔŋmɔ lɛ,
31 tamɔ bɔ ni Yehowa tsulɔ Mose fã Israelbii lɛ, kɛ agbɛnɛ hu, tamɔ bɔ ni aŋma yɛ Mose Mla wolo+ lɛ mli lɛ pɛpɛɛpɛ, akɛ: “Afɔleshaa latɛ ni akɛ tɛi muji ni nitsumɔ dade ko esako amɛhe ma.”+ Amɛshã shãa afɔlei yɛ nɔ amɛhã Yehowa, ni amɛshã naanyobɔɔ afɔlei hu yɛ nɔ.+
32 Ni ekwɛ Mla lɛ ni Mose ŋma yɛ Israelbii lɛ ahiɛ+ lɛ nɔ eŋma eko ewo tɛi lɛ anɔ yɛ jɛmɛ.+
33 Israel muu lɛ fɛɛ kɛ amɛnukpai lɛ kɛ amɛnɔkwɛlɔi lɛ kɛ amɛkojolɔi lɛ damɔ Adeka lɛ biɛ kɛ biɛ, yɛ osɔfoi ni ji Levibii ni tereɔ Yehowa kpaŋmɔ adeka lɛ ahiɛ. Gbɔi kɛ maŋbii lɛ fɛɛ yɛ jɛmɛ.+ Gbɔmɛi lɛ fã damɔ Gerizim Gɔŋ lɛ hiɛgbɛ, ni fã kroko lɛ hu damɔ Ebal Gɔŋ lɛ hiɛgbɛ+ (tamɔ bɔ ni Yehowa tsulɔ Mose etsɔ hiɛ efã lɛ pɛpɛɛpɛ),+ koni amɛjɔɔ Israelbii lɛ.
34 Enɛ sɛɛ lɛ, ekane Mla lɛ mli wiemɔi lɛ fɛɛ waa,+ jɔɔmɔi+ lɛ kɛ loomɔi+ lɛ, yɛ nibii fɛɛ ni aŋma yɛ Mla wolo lɛ mli lɛ anaa.
35 Wiemɔ kome folo po bɛ nibii fɛɛ ni Mose fã lɛ amli ni Yoshua kaneee lɛ waa yɛ Israel asafo muu lɛ fɛɛ hiɛ,+ ni yei kɛ gbekɛbii kɛ gbɔi+ ni yɔɔ* amɛteŋ lɛ fata he.+
