Zakaria 4:1-14
4 Ŋwɛibɔfo lɛ ni kɛ mi wieɔ lɛ ku esɛɛ kɛba ni ebatsĩɛ mi, tamɔ atsĩɛɔ mɔ kɛjɛɔ wɔ mli lɛ.
2 Ni ebi mi akɛ: “Mɛni onaa lɛ?”
No hewɔ lɛ, mikɛɛ: “Naa! miina kanetso ni akɛ shika tsuru sɔŋŋ fee,+ ní tsɛnsi ko ma eyiteŋ. Kanei kpawo yɛ he,+ hɛɛ, kpawo, ni kanei lɛ ni yɔɔ eyiteŋ lɛ yɛ dadei* kpawo ní mu tsɔɔ mli.
3 Ni oliv tsei enyɔ mamɔ emasɛi,+ ekome yɛ tsɛnsi lɛ ninejurɔ nɔ, ni ekome hu yɛ ebɛku nɔ.”
4 Kɛkɛ ni mibi ŋwɛibɔfo lɛ ni kɛ mi wieɔ lɛ akɛ: “Minuŋtsɔ, mɛni nibii nɛɛ damɔ shi kɛhã?”
5 No hewɔ lɛ, ŋwɛibɔfo lɛ ni kɛ mi wieɔ lɛ bi mi akɛ: “Ani oleee nɔ ni nibii nɛɛ damɔ shi kɛhã?”
Mihã hetoo akɛ: “Minuŋtsɔ, dabi.”
6 Kɛkɛ ni ekɛɛ mi akɛ: “Yehowa wiemɔ ni ekɛhã Zerubabel lɛ nɛ: ‘“Jeee asraafoi anyɛmɔ naa, ni jeee hewalɛ naa hu,+ shi moŋ, mimumɔ lɛ naa,”+ Yehowa, taiatsɛ lɛ kɛɛ.
7 Namɔ ji bo, bo gɔŋ kpeteŋkpele? Obaatsɔ shikpɔŋ ni kã shi tɛtrɛɛ*+ yɛ Zerubabel+ hiɛ. Ni ekɛ yiteŋ tɛ* lɛ baaje kpo kɛba be ni aabɔ oshe akɛ: “Eyɛ fɛo waa! Eyɛ fɛo waa!”’”
8 Yehowa kɛɛ mi ekoŋŋ akɛ:
9 “Zerubabel niji to shĩa nɛɛ shishi,+ ni lɛ nɔŋŋ eniji baagbe naa.+ Ni nyɛbaaná nyɛle akɛ, Yehowa, taiatsɛ lɛ, ji mɔ ni tsu mi nyɛŋɔɔ lɛ.
10 Shi namɔ gbeɔ gbi ni nibii je shishi bibiibibii lɛ he guɔ?*+ Ejaakɛ amɛbaanya, ni amɛbaana plomo* lɛ yɛ Zerubabel dɛŋ. Hiŋmɛii kpawo nɛɛ ji Yehowa hiŋmɛii ni kpaa shikpɔŋ muu lɛ fɛɛ nɔ lɛ.”+
11 Ni mibi lɛ akɛ: “Mɛni oliv tsei enyɔ nɛɛ ni mamɔ kanetso lɛ ninejurɔ kɛ ebɛku nɔ lɛ damɔ shi kɛhã?”+
12 Mibi lɛ nɔ ni ji shii enyɔ nɔ akɛ: “Mɛni oliv tsei lɛ aniji* enyɔ lɛ ni fɔseɔ mu ni kɔla tamɔ shika tsuru kɛtsɔɔ shika tsuru paipii enyɔ lɛ amli lɛ damɔ shi kɛhã?”
13 No hewɔ lɛ, ebi mi akɛ: “Ani oleee nɔ ni enɛɛmɛi damɔ shi kɛhã?”
Mihã hetoo akɛ: “Minuŋtsɔ, dabi.”
14 Kɛkɛ ni ekɛɛ: “Enɛɛmɛi ji mɛi enyɔ ni afɔ amɛ mu ni damɔ shikpɔŋ muu lɛ fɛɛ Nuŋtsɔ lɛ masɛi lɛ.”+
Shishigbɛ Niŋmaa
^ Loo “paipii.”
^ Loo “gbogbo yiteŋ tɛ.”
^ Loo “shikpɔŋ kplanaa.”
^ Loo “namɔ gbeɔ nibii bibii agbi lɛ he guɔ?”
^ Hebri sht. ŋm., “tɛ lɛ, sanyaa lɛ.” Plomo ji kpãa ko kɛ enaa dade ní akɛkwɛɔ akɛ nɔ ko ma shi jaŋŋ lo.
^ Ni ji, tsei lɛ aniji ni yibii yɔɔ nɔ lɛ.
