Zakaria 8:1-23
8 Yehowa, taiatsɛ lɛ, wie ekoŋŋ akɛ:
2 “Nɔ ni Yehowa, taiatsɛ lɛ, kɛɛ nɛ, ‘Mihiɛ baadɔ yɛ Zion he waa diɛŋtsɛ,+ ni mihiɛ baadɔ yɛ ehe kɛ mlifu ni naa wa.’”
3 “Nɔ ni Yehowa kɛɛ nɛ, ‘Maku misɛɛ kɛya Zion,+ ni mayahi Yerusalem;+ ni abaatsɛ Yerusalem akɛ anɔkwale* maŋ,+ kɛ Yehowa, taiatsɛ lɛ, gɔŋ lɛ hu akɛ, gɔŋ krɔŋkrɔŋ.’”+
4 “Nɔ ni Yehowa, taiatsɛ lɛ, kɛɛ nɛ, ‘Hiimeji kɛ yeimeji, ní amɛteŋ mɔ fɛɛ mɔ hiɛ edɛhiɛmɔtso yɛ bɔ ni egbɔ waa lɛ hewɔ* lɛ, baatara Yerusalem henaabuamɔhei lɛ ekoŋŋ.+
5 Ni maŋ lɛ henaabuamɔhei lɛ baayimɔ obɔbɔ kɛ gbekɛbii hii kɛ gbekɛbii yei ni miishwɛ.’”+
6 “Nɔ ni Yehowa, taiatsɛ lɛ, kɛɛ nɛ, ‘Eyɛ mli akɛ ekolɛ enɛ baafee nɔ ni wa tsɔ kɛhã maŋ nɛɛ mli bii ni eshwɛ lɛ yɛ nakai gbii lɛ amli moŋ, shi ani ebaawa tsɔ kɛhã mi hu?’ Yehowa taiatsɛ lɛ kɛɛ.”
7 “Nɔ ni Yehowa, taiatsɛ lɛ, kɛɛ nɛ, ‘Naa, mahere mimaŋ lɛ yiwala kɛaajɛ bokã shikpɔŋ lɛ nɔ kɛ anai shikpɔŋ lɛ nɔ.*+
8 Ni mikɛ amɛ baaba, ni amɛbaahi Yerusalem;+ ni amɛbaatsɔ mimaŋ, ni matsɔ amɛ-Nyɔŋmɔ+ yɛ anɔkwale* kɛ jalɛ mli.’”
9 “Nɔ ni Yehowa, taiatsɛ lɛ, kɛɛ nɛ, ‘Nyɛwajea nyɛnijiaŋ,*+ nyɛ mɛi ni nyɛnuɔ gbalɔi lɛ awiemɔi amrɔ nɛɛ,+ wiemɔi kome too lɛ nɔŋŋ ní awie yɛ gbi ni ato Yehowa, taiatsɛ lɛ, shĩa lɛ shishi koni ama sɔlemɔ shĩa lɛ.
10 Ejaakɛ dani nakai be lɛ baashɛ lɛ, gbɔmɔ kɛ kooloo fɛɛ tsuɔ nii ní awooo amɛ nyɔmɔ;+ ni henyɛlɔ lɛ hewɔ lɛ, ebɛ shweshweeshwe akɛ mɔ aaaya ni eba, ejaakɛ mihã mɔ fɛɛ mɔ te shi ewo enaanyo.’
11 “‘Shi amrɔ nɛɛ, mikɛ maŋ nɛɛ mli bii ni eshwɛ lɛ yeŋ tamɔ mifee yɛ tsutsu gbii lɛ amli lɛ,’+ Yehowa, taiatsɛ lɛ kɛɛ.
12 ‘Ejaakɛ abaadu toiŋjɔlɛ dumɔwu; wain tso baawo eyibii, ni shikpɔŋ lɛ baaba enii,+ ni ŋwɛi lɛ baahã ebɔ́ anɛ; ni mahã nibii nɛɛ fɛɛ atsɔ maŋ nɛɛ mli bii ni eshwɛ lɛ anɔ.+
13 Ni bɔ ni nyɛtsɔ loomɔ nɔ yɛ jeŋmaji lɛ ateŋ lɛ,+ Yuda shĩa kɛ Israel shĩa, nakai nɔŋŋ mahere nyɛyiwala, ni nyɛbaatsɔ jɔɔmɔ.+ Nyɛkashea gbeyei!+ Nyɛwajea nyɛnijiaŋ.’*+
14 “Nɔ ni Yehowa, taiatsɛ lɛ, kɛɛ nɛ, ‘“Bɔ ni mikpɛ mli akɛ mikɛ amanehulu baaba nyɛnɔ akɛni nyɛtsɛmɛi lɛ wo mimli la lɛ hewɔ, ní mishwaaa mihe lɛ,” Yehowa, taiatsɛ lɛ kɛɛ,+
15 “nakai nɔŋŋ mikpɛ mli akɛ, mafee Yerusalem kɛ Yuda shĩa lɛ ekpakpa yɛ be nɛɛ mli.+ Nyɛkashea gbeyei!”’+
16 “‘Nibii ni esa akɛ nyɛfee nɛ: Nyɛkɛ nyɛhe awiea anɔkwale,+ ni nyɛkojoa anɔkwale kɛ toiŋjɔlɛ kojomɔi yɛ nyɛgbói lɛ amli.+
17 Nyɛteŋ mɔ ko mɔ ko akato enyɛmi he ŋaa fɔŋ yɛ etsui mli,+ ni nyɛkasumɔa amale kitakamɔ hu;+ ejaakɛ enɛɛmɛi fɛɛ ji nibii ni minyɛɔ,’+ Yehowa kɛɛ.”
18 Yehowa, taiatsɛ lɛ, kɛ mi wie ekoŋŋ akɛ:
19 “Nɔ ni Yehowa, taiatsɛ lɛ, kɛɛ nɛ, ‘Nyɔɔŋ ni ji ejwɛ+ lɛ nɔ ŋmaahilɛ lɛ, kɛ nyɔɔŋ ni ji enumɔ+ lɛ nɔ ŋmaahilɛ lɛ, kɛ nyɔɔŋ ni ji kpawo+ lɛ nɔ ŋmaahilɛ lɛ, kɛ nyɔɔŋ ni ji nyɔŋma+ lɛ nɔ ŋmaahilɛ lɛ baatsɔ nyamɔ kɛ miishɛɛ be kɛhã Yuda shĩa lɛ—mlifilimɔ gbii juji.+ No hewɔ lɛ, nyɛsumɔa anɔkwale kɛ toiŋjɔlɛ.’
20 “Nɔ ni Yehowa, taiatsɛ lɛ, kɛɛ nɛ, ‘Be baashɛ ni majimaji kɛ maji babaoo amli bii baaba;
21 ni maŋ kome mli bii baaya maŋ kroko mli bii aŋɔɔ amɛyakɛɛ akɛ: “Nyɛhãa wɔyaa oya, ní wɔyakpaa Yehowa fai koni ena wɔ mɔbɔ, ní wɔyatao Yehowa, taiatsɛ lɛ, sɛɛ gbɛ. Mi hu maya.”+
22 Ni majimaji pii kɛ jeŋmaji ni he wala baaba amɛbatao Yehowa, taiatsɛ lɛ, sɛɛ gbɛ yɛ Yerusalem,+ ni amɛbaakpa Yehowa fai koni ena amɛ mɔbɔ.’
23 “Nɔ ni Yehowa, taiatsɛ lɛ, kɛɛ nɛ, ‘Nakai gbii lɛ amli lɛ, hii nyɔŋma ni jɛ jeŋmaji lɛ anɔ wiemɔi lɛ fɛɛ amli+ lɛ baamɔ Yudanyo* kome atade kakadaŋŋ* mli, hɛɛ, amɛbaamɔ mli kpɛŋŋ, ni amɛbaakɛɛ akɛ: “Wɔkɛ nyɛ baaya,+ ejaakɛ wɔnu akɛ, Nyɔŋmɔ kɛ nyɛ yɛ.”’”+
Shishigbɛ Niŋmaa
^ Loo “anɔkwayeli.”
^ Hebri sht. ŋm., “yɛ gbii babaoo lɛ hewɔ.”
^ Loo “kɛaajɛ hulushitee shikpɔŋ lɛ nɔ kɛ hulushinyɔɔ shikpɔŋ lɛ nɔ.”
^ Loo “anɔkwayeli.”
^ Loo “Nyɛfea ekãa.”
^ Loo “Nyɛfea ekãa.”
^ Hebri sht. ŋm., “Yudanyo ni ji nuu.”
^ Loo “atade naamuu.”
