Zefania 1:1-18
1 Yehowa wiemɔ ni ekɛ Zefania,* ni ji Hezekia binuu Amaria binuu Gedalia binuu Kushi binuu lɛ wie yɛ Amon+ binuu Yosia,+ ni ji Yuda maŋtsɛ lɛ gbii lɛ amli nɛ:
2 “Makpãtã nɔ fɛɛ nɔ hiɛ kwraa kɛje shikpɔŋ lɛ nɔ,” Yehowa kɛɛ.+
3 “Makpãtã gbɔmɔ kɛ kooloo hiɛ.
Makpãtã ŋwɛi loofɔji kɛ ŋshɔŋ loi,+Kɛ nanetɔ̃tɔmɔnii*+ kɛ mɛi fɔji fɛɛ ahiɛ;Ni majie adesai kɛje shikpɔŋ lɛ nɔ,” Yehowa kɛɛ.
4 “Makpã minine mli yɛ Yuda nɔKɛ Yerusalembii lɛ fɛɛ hu anɔ,Ni makpãtã Baal he nɔ fɛɛ nɔ ni eshwɛ lɛ hiɛ kɛje biɛ nɛɛ,+Magbe maji krokomɛi anɔ nyɔŋmɔi lɛ asɔfoi lɛ agbɛ́i, ni makpãtã osɔfoi lɛ hu ahiɛ,+
5 Kɛ mɛi ni kotoɔ nibii ni yɔɔ ŋwɛi* lɛ yɛ tsũi ayiteŋ lɛ,+Kɛ mɛi ni kotoɔ Yehowa ní amɛkãa kitã akɛ amɛbaaye lɛ anɔkwa+Ní nakai beiaŋ nɔŋŋ lɛ, amɛkãa kitã akɛ amɛbaaye Malkam anɔkwa lɛ;+
6 Kɛ mɛi ni kpaa yɛ Yehowa sɛɛ+Kɛ mɛi ni taooo Yehowa sɛɛ gbɛ, ní amɛbiii lɛ nii lɛ.”+
7 Feemɔ diŋŋ yɛ Nuŋtsɔ Ofe Yehowa hiɛ, ejaakɛ Yehowa gbi lɛ ebɛŋkɛ.+
Yehowa esaa afɔle eto; efee mɛi ni efɔ̃ amɛ nine lɛ krɔŋkrɔŋ.
8 “Yehowa afɔle gbi lɛ nɔ lɛ, magbala lumɛi lɛ,Maŋtsɛ lɛ bihii lɛ,+ kɛ mɛi fɛɛ ni woɔ maŋsɛɛ atadei lɛ atoi.
9 Nakai gbi lɛ nɔ lɛ, magbala mɛi fɛɛ ni kwɔɔ kpoku* lɛ atoi,Mɛi ni kɛ yiwalɛ kɛ mɔlakamɔ woɔ amɛnuŋtsɔ lɛ shĩa obɔ lɛ.
10 Nakai gbi lɛ nɔ lɛ,” Yehowa kɛɛ akɛ,“Abaanu bolɔmɔ kɛaajɛ Loo Agbó+ lɛ naa gbɛ,Kɛ yaafo ni naa wa hu kɛaajɛ maŋ lɛ Kpokpaa Hee lɛ nɔ,+Kɛ gbɛɛmɔ ni naa wa kɛaajɛ gɔŋkpɔi lɛ anɔ.
11 Nyɛfóa waa, nyɛ mɛi ni nyɛyɔɔ Maktesh* lɛ,Ejaakɛ akpãtã jarayelɔi* lɛ fɛɛ ahiɛ;*Akpãtã mɛi fɛɛ ni ŋmɛɔ jwiɛtɛi lɛ ahiɛ.
12 Nakai be lɛ mli lɛ, mikɛ kanei baakpa Yerusalem maŋ lɛ mli fitsofitso,Ni magbala mɛi ni efeɔ amɛ akɛ amɛhe ejɔ amɛ* lɛ atoi, mɛi ni kɛɔ yɛ amɛtsui mli akɛ,‘Yehowa efeŋ ekpakpa, ni efeŋ efɔŋ hu’ lɛ.+
13 Abaashɔ̃ nii ni amɛyɔɔ lɛ, ni abaakpãtã amɛshĩai lɛ ahiɛ.+
Amɛbaamamɔ shĩai, shi amɛhiŋ mli;Amɛbaafee wain ŋmɔji, shi amɛnuŋ amɛmli wain lɛ eko.+
14 Yehowa gbi wulu lɛ ebɛŋkɛ!+
Ebɛŋkɛ, ni eeba oyayaayai!*+
Yehowa gbi lɛ joɔ.*+
No beiaŋ lɛ, tawulɔ baabolɔ.+
15 Nakai gbi lɛ, mlifu gbi ni,+Haomɔ kɛ hejaramɔ gbi ni,+Ahum kɛ amaŋfɔfeemɔ gbi ni,Duŋ kɛ oblɔtu gbi ni,+Atatui kɛ duŋ kpii gbi ni,+
16 Tɛtɛrɛmantɛrɛ* kɛ ta oshebɔɔ gbi ni,+Ebaaba maji ni atswa gbogboi awo amɛhe kɛ koji anɔ mɔji* ni kwɔlɔ lɛ anɔ.+
17 Mahã adesai ahao,Ni amɛbaanyiɛ tamɔ shwilafoi,+Ejaakɛ Yehowa ji mɔ ni amɛfee esha amɛshi lɛ.+
Abaafɔse amɛlá ashwie shi tamɔ mulu,Kɛ amɛheloo* hu tamɔ fei.+
18 Amɛjwiɛtɛi kɛ amɛshika tsuru nyɛŋ ahere amɛ yɛ Yehowa mlifu gbi lɛ nɔ;+Ejaakɛ ehiɛdɔɔ lɛ la lɛ baashã shikpɔŋ muu lɛ fɛɛ,+Ejaakɛ ekɛ hiɛkpatamɔ baaba, hɛɛ, ekɛ hiɛkpatamɔ ni yɔɔ gbeyei baaba shikpɔŋ lɛ nɔ bii lɛ fɛɛ anɔ.”+
Shishigbɛ Niŋmaa
^ Eshishi ji, “Yehowa Eŋɔtee (Yehowa Kɛto Tamɔ Jwetri).”
^ Eeenyɛ efee akɛ, amɛji nibii loo nifeemɔi ni kɛ amagajamɔ yɔɔ tsakpaa.
^ Loo “mɛi ni kotoɔ ŋwɛi asraafoi.”
^ Loo “atrakpo.” Eeenyɛ efee akɛ, aatsɔɔ kpoku ni maŋtsɛ lɛ sɛi lɛ ma nɔ lɛ.
^ Eeenyɛ efee akɛ, eji Yerusalem fã ko ni bɛŋkɛ Loo Agbó lɛ naa.
^ Loo “guɔyelɔi.”
^ Hebri sht. ŋm., “ahã jarayelɔi lɛ fɛɛ efee diŋŋ.”
^ Hebri sht. ŋm., “mɛi ni miiwɔ (loo miifĩ) yɛ amɛshishi nii ni enyɔ shi lɛ anɔ,” tamɔ wain ní eshishi nii lɛ enyɔ shi yɛ wainŋaa bu mli lɛ.
^ Loo “eeye oyai waa.”
^ Loo “gbi lɛ gbɛɛmɔ lɛ joɔ.”
^ Hebri sht. ŋm., “Akolonto.”
^ Ni ji, mɔji ni yɔɔ gbogboi lɛ akoji lɛ.
^ Hebri sht. ŋm., “amɛmlinii.”
