1. Mɛni esa akɛ wɔ fɛɛ wɔfee?

ANI obaasumɔ ni oda foi ko ni ole akɛ edamɔ bɛ mlɛo, titri lɛ, kɛ́ obɛ hewalɛ loo etɔ bo? Mɛi pii baakɛɛ dabi. Shi bɔfo Paulo kɛɛ anɔkwa Kristofoi fɛɛ miida foi ko. (Heb. 12:1) Ni kɛ́ gbekɛbii ji wɔ jio, onukpai ji wɔ jio, wɔyɛ hewalɛ jio, etɔ wɔ jio lɛ, esa akɛ wɔ fɛɛ wɔda foi nɛɛ kɛyashi naagbee dani Yehowa baahã wɔ jweremɔnɔ lɛ.​—Mat. 24:13.

2. Tamɔ bɔ ni wɔnaa yɛ 2 Timoteo 4:7, 8 lɛ, mɛni hewɔ Paulo nyɛ ewo enyɛmimɛi Kristofoi lɛ ŋaa ni amɛda foi lɛ kɛyashi naagbee lɛ?

² Paulo nyɛ ‘eda foi lɛ egbe naa,’ ni no hewɔ enyɛ ewo enyɛmimɛi Kristofoi lɛ ŋaa akɛ amɛ hu amɛda kɛyashi naagbee lɛ. (Kanemɔ 2 Timoteo 4:7, 8.) Shi mɛɛ foidamɔ he kwraa Paulo wieɔ lɛ?

3. Paulo kɛ foidamɔ fee mɛni he nɔkwɛmɔnɔ?

³ Bei komɛi lɛ, Paulo kɛ shwɛmɔi komɛi ni ashwɛɔ yɛ blema Grees lɛ tsuɔ nii akɛ nɔkwɛmɔnii kɛtsɔɔ saji komɛi ni he hiaa waa. (1 Kor. 9:25-27; 2 Tim. 2:5) Akɛ nɔkwɛmɔnɔ lɛ, ekɛ foidamɔ tsu nii akɛ nɔkwɛmɔnɔ shii abɔ kɛtsɔɔ bɔ ni esa akɛ Kristofoi ahi shi ahã. (1 Kor. 9:24; Gal. 2:2; Fip. 2:16) Kɛ́ mɔ ko jɔɔ ewala nɔ ehã Yehowa ni abaptisi lɛ lɛ, belɛ eje mfonirifeemɔŋ foidamɔ nɛɛ shishi. (1 Pet. 3:21) Ni kɛ́ Yehowa hã lɛ naanɔ wala lɛ, belɛ etse kpãa lɛ, loo eda foi lɛ egbe naa ni enine eshɛ jweremɔnɔ lɛ nɔ.​—Mat. 25:31-34, 46; 2 Tim. 4:8.

4. Mɛni he wɔbaasusu yɛ nikasemɔ nɛɛ mli?

⁴ Mɛni hewɔ abaanyɛ akɛɛ akɛ Kristofoi tamɔ mɛi ni miida gbɛ kakadaŋŋ foi lɛ? Abaanyɛ akɛɛ nakai yɛ yiŋtoi pii ahewɔ. Wɔbaasusu etɛ ahe yɛ nikasemɔ nɛɛ mli. Nomɛi ji, klɛŋklɛŋ lɛ, mɛi ni daa foi lɛ daa yɛ he ni atsɔɔ akɛ amɛda yɛ lɛ; nɔ ni ji enyɔ lɛ, amɛkɛ amɛjwɛŋmɔ maa foidamɔ lɛ nɔ; ni nɔ ni ji etɛ lɛ, amɛyaa  nɔ amɛdaa foi lɛ, ekɔɔɔ he eko naagbai ni amɛkɛbaakpe.

5. Nɛgbɛ esa akɛ wɔda wɔfoi lɛ yɛ? Ni mɛni hewɔ?

⁵ Kɛ́ mɔ ko miida foi, ni edaaa yɛ he ni mɛi ni to foidamɔ lɛ he gbɛjianɔ lɛ etsɔɔ akɛ ada yɛ lɛ, enine shɛŋ jweremɔnɔ lɛ nɔ. Nakai nɔŋŋ eji yɛ wɔ hu wɔgbɛfaŋ. Kɛ́ wɔmiitao wɔná naanɔ wala lɛ, esa akɛ wɔhi shi bɔ ni Yehowa etsɔɔ akɛ Kristofoi ahi shi lɛ, loo kɛ́ wɔɔwie lɛ, wɔda foi lɛ yɛ he ni Yehowa etsɔɔ akɛ ada yɛ lɛ. (Bɔf. 20:24; 1 Pet. 2:21) Shi Satan kɛ mɛi ni nyiɛ esɛɛ lɛ ná kulɛ, wɔfeee nakai; amɛ lɛ, amɛmiisumɔ ni wɔya nɔ ‘wɔkɛ amɛ asha foi yɛ gbɛ gbonyo’ ni amɛdaa amɛfoi lɛ yɛ nɔ lɛ nɔ. (1 Pet. 4:4) Amɛkɛɛ jɛmɛ ŋɔɔ, ni ehãa mɔ náa heyeli. Amɛyeɔ wɔhe fɛo po akɛ wɔmiida foi yɛ he ni Yehowa etsɔɔ akɛ ada yɛ lɛ. Shi wɔle akɛ nɔ ni amɛwieɔ lɛ bɛ mli.​—2 Pet. 2:19.

6. Mɛni okaseɔ yɛ Brian niiashikpamɔ lɛ mli?

⁶ Kɛ́ mɔ ko yada foi yɛ he ni mɛi ni Satan je lɛ ená amɛnɔ hewalɛ lɛ daa amɛfoi lɛ yɛ lɛ, etsɛŋ ni ebaana akɛ, nakai gbɛ lɛ kɛ mɔ eyaaa heyeli mli; moŋ lɛ, ekɛ mɔ yaa nyɔŋyeli mli. (Rom. 6:16) Nyɛmi nuu ko ni atsɛɔ lɛ Brian lɛ ná enɛ mli niiashikpamɔ. Brian fɔlɔi tsɔse lɛ koni ehi shi bɔ ni Yehowa taoɔ ni Kristofoi ahi shi lɛ. Shi be ni eye aaafee afii 13 lɛ, enu he akɛ gbɛ ni amɛtaoɔ ekɔ lɛ hãŋ ená miishɛɛ. No hewɔ lɛ, eyafata mɛi ni hiɔ shi yɛ Satan shishitoo mlai lɛ anaa lɛ ahe. Ewie akɛ: “Miyaleee akɛ nɔ ni mitsɛɔ lɛ akɛ heyeli lɛ baahã mikɛ mihe awo tsofai ni akɛtsuɔ nii bɔ ni esaaa mli koni matsɔ nyɔŋ mahã nifeemɔ nɛɛ.” Etsa nɔ akɛ: “Ebashɛ be ko ni mikɛ tsofai kɛ dãa ni naa wawai tsu nii yɛ gbɛ ni ejaaa nɔ, ni mikɛ mihe wo jeŋba sha hu mli. Mitee nɔ mikɛ tsofai ni naa wala ni fiteɔ mɔ lɛ hu tsu nii afii babaoo. . . . Mibɔi tsofai nɛɛ hɔɔmɔ bɔ ni afee ni manyɛ maná shika kɛfi mishihilɛ nɛɛ sɛɛ.” Shi sɛɛ mli lɛ, nibii tsake. Brian kpɛ eyiŋ akɛ ebaahi shi yɛ Yehowa mlai kɛ eshishitoo mlai lɛ anaa. Ebayi wala gbɛ lɛ nɔ, ni abaptisi lɛ yɛ afi 2001. Amrɔ nɛɛ, eehi shi bɔ ni Yehowa taoɔ akɛ Kristofoi ahi shi lɛ, ni ená miishɛɛ waa. *

7. Tamɔ bɔ ni awie yɛ Mateo 7:13, 14 lɛ, mɛɛ gbɛi enyɔ yɔɔ?

⁷ Ehe miihia waa ni wɔsusu he ni wɔtaoɔ wɔda wɔfoi lɛ yɛ lɛ he jogbaŋŋ! Satan miitao ni wɔ fɛɛ wɔje gbɛ ni elɛɛɛ ni kɛ mɔ “yaa wala mli” lɛ nɔ ni wɔba gbɛ ni lɛɛ lɛ moŋ nɔ. Gbɛ ni lɛɛ lɛ nɔ nyiɛmɔ waaa, ni no nɔ mɛi pii ni yɔɔ je lɛŋ ŋmɛnɛ lɛ yɔɔ. Shi ekɛ mɔ “yaa hiɛkpatamɔ mli.” (Kanemɔ Mateo 7:13, 14.) Kɛ́ wɔmiitao wɔhi  gbɛ ni kɛ mɔ yaa wala mli lɛ nɔ daa lɛ, esa akɛ wɔkɛ wɔhiɛ afɔ̃ Yehowa nɔ, ni wɔbo lɛ toi.

8. Kɛ́ mɔ ko miida foi ni etɛ lɛ, mɛni efeɔ?

⁸ Kɛ́ mɛi miida gbɛ kakadaŋŋ foi lɛ, amɛhãa amɛhiŋmɛi hiɔ gbɛ lɛ nɔ koni amɛkatɛ. Shi bei komɛi lɛ, mɛi ni amɛkɛdaa foi lɛ ateŋ mɔ ko baanyɛ atɛ amɛ ni jeee gbɛ eje, aloo amɛnane baanyɛ anyɔ bu mli. Kɛ́ nɔ ko nakai ba ni amɛgbee shi lɛ, amɛteɔ shi ni amɛtsaa foidamɔ lɛ nɔ. Amɛkɛ amɛjwɛŋmɔ emaaa nɔ ni hã amɛtɛ lɛ nɔ tsɔ. Moŋ lɛ, amɛkɛmaa jweremɔnɔ ni kã amɛhiɛ lɛ nɔ, ni amɛkwɛɔ bɔ ni amɛbaafee amɛtse kpãa lɛ.

9. Kɛ́ wɔtɛ lɛ, mɛni esa akɛ wɔfee?

⁹ Yɛ foi ni wɔdaa lɛ mli lɛ, ekolɛ wɔbaatɛ shii abɔ yɛ wɔwiemɔ loo wɔnifeemɔ mli. Aloo mɛi ni wɔkɛdaa foi lɛ, ni ji wɔnyɛmimɛi Kristofoi lɛ, baanyɛ awie loo amɛfee nɔ ko ni baagba wɔnaa waa. Kɛ́ nɔ ko nakai ba lɛ, esaaa akɛ efeɔ wɔ naakpɛɛ. Wɔ fɛɛ wɔyeee emuu, ni eyɛ mli akɛ gbɛ ni wɔdaa foi lɛ yɛ nɔ lɛ kɛ mɔ yaa wala mli moŋ, shi enɔ elɛɛɛ. No hewɔ lɛ, bɔ fɛɛ bɔ ni fee lɛ, mɔ ko he baasa wɔhe kɛ̃, ni wɔ hu wɔhe baasa mɔ ko he. Paulo hã wɔle faŋŋ akɛ, bei komɛi lɛ, wɔnyɛmimɛi lɛ baaná ‘sane yɛ wɔhe,’ ni wɔ hu wɔbaaná ‘sane yɛ amɛhe.’ (Kol. 3:13) Shi nɔ najiaŋ ni wɔkɛ wɔjwɛŋmɔ baama nɔ ni nyɛmi ko efee loo ewie ni egba wɔnaa lɛ nɔ lɛ, nyɛhãa wɔkɛ wɔjwɛŋmɔ amaa jweremɔnɔ ni kã wɔhiɛ lɛ moŋ nɔ. Kɛ́ wɔgbee shi lɛ, nyɛhãa wɔtea shi ni wɔtsaa foidamɔ lɛ nɔ. Kɛ́ wɔbɛ mɛi wɔwo wɔmli loo wɔhã nɔ ko ni amɛfee lɛ gba wɔnaa aahu akɛ wɔkɛ wɔshigbeemɔhe fee wɔwɔɔhe ni wɔteee shi dɔŋŋ lɛ, wɔtseŋ kpãa lɛ, ni jweremɔnɔ lɛ baaŋmɛɛ wɔ. Kɛ́ wɔkwɛɛɛ ni wɔbaate shi lɛ, ekolɛ wɔbaatɛ mɛi krokomɛi ni miibɔ mɔdɛŋ ni amɛhi gbɛ ni elɛɛɛ ni kɛ mɔ yaa wala mli lɛ nɔ lɛ.

10. Mɛni baaye abua wɔ ni wɔkatsɔmɔ ‘nanetɔ̃tɔmɔnii’ wɔhã mɛi?

¹⁰ Nɔ kroko ni baaye abua wɔ ni wɔkatsɔmɔ ‘nanetɔ̃tɔmɔnii’ wɔhã wɔnyɛmimɛi lɛ ji, ni wɔbaafee nɔ ni amɛsumɔɔ wɔhã amɛ be fɛɛ be ni ebaahi nakai feemɔ, moŋ fe ni wɔbaama nɔ mi doo akɛ afee nɔ ni wɔ wɔsumɔɔ. (Rom. 14:13, 19-21; 1 Kor. 8:9, 13) Enɛ ji nɔ kome ni he hiaa waa ni hãa esoroɔ wɔ yɛ mɛi ni daa foi  diɛŋtsɛ lɛ ahe. Amɛ lɛ, kɛ́ amɛmiida foi lɛ, mɔ fɛɛ mɔ jwɛŋɔ lɛ pɛ ehe, ni ekwɛɔ bɔ ni ebaafee eho enyɛmi he koni lɛ ená jweremɔnɔ lɛ. Enɛ hewɔ lɛ, bei komɛi lɛ, amɛteŋ mɛi komɛi tsiɔ foidalɔi krokomɛi lɛ kɛyaa afã koni amɛ amɛbaje hiɛ. Shi wɔ lɛ wɔfeee nakai, ejaakɛ wɔkɛ wɔhe eshiii akaŋ. (Gal. 5:26; 6:4) Oti ni ma wɔhiɛ ji, ni wɔye wɔbua mɛi babaoo koni amɛ kɛ wɔ fɛɛ atse kpãa lɛ ni wɔ fɛɛ wɔná naanɔ wala. Enɛ hewɔ lɛ, wɔbɔɔ mɔdɛŋ akɛ wɔkɛ ŋaa ni akɛ mumɔ krɔŋkrɔŋ lɛ tsirɛ Paulo ni ewo lɛ baatsu nii, akɛ ‘wɔtao nibii ni hi hã mɛi krokomɛi, shi jeee nibii ni hi hã wɔ pɛ.’​—Fip. 2:4.

11. Mɛni nɔ foidalɔi kɛ amɛjwɛŋmɔ maa? Ni mɛni hewɔ?

¹¹ Wɔbana akɛ, foidalɔi hãa amɛhiŋmɛi hiɔ gbɛ lɛ nɔ be ni amɛdaa foi lɛ. Shi nɔ kroko yɛ ni amɛfeɔ; amɛkɛ amɛjwɛŋmɔ maa kpãa lɛ tsemɔ hu nɔ. Kɛ́ amɛnaaa he ni kpãa lɛ yɔɔ lɛ kɛ amɛhiŋmɛi po lɛ, amɛfeɔ amɛhe mfoniri ni amɛtse kpãa lɛ ni amɛnine eshɛ jweremɔnɔ lɛ nɔ. Enɛ woɔ amɛ hewalɛ ni amɛfiɔ shi yɛ foidamɔ lɛ mli.

12. Mɛni Yehowa efee ehã wɔ ni hãa wɔnaa akɛ esumɔɔ wɔsane?

¹² Akɛni Yehowa sumɔɔ ewebii lɛ asane hewɔ lɛ, ewo amɛ shi akɛ, kɛ́ amɛnyɛ amɛda foi lɛ amɛgbe naa kome too lɛ, ebaajwere amɛ. No ji, ebaahã amɛ naanɔ wala, kɛ́ yɛ ŋwɛi jio, yɛ Paradeiso mli yɛ shikpɔŋ lɛ nɔ jio. Biblia lɛ tsɔɔ wɔ bɔ ni shihilɛ baafee yɛ nakai beiaŋ, koni no aye abua wɔ ni wɔnyɛ wɔfee miishɛɛ ni wɔbaaná lɛ he mfoniri. Kɛ́ wɔjwɛŋ wɔhiɛnɔkamɔ lɛ he be fɛɛ be lɛ, no baahã wɔfai shi ni wɔtswa akɛ wɔbaada foi lɛ kɛyashi naagbee lɛ mli awa.

13. Mɛni wɔkɛfe foidalɔi diɛŋtsɛ?

¹³ Yɛ blema Grees shwɛmɔi lɛ amli lɛ, kɛ́ foidalɔ ko baagbe foidamɔ lɛ naa jio, egbeŋ naa jio lɛ, ehewalɛ kɛ bɔ ni atsɔse lɛ ahã lɛ ni baatsɔɔ, ejaakɛ foidamɔ lɛ yɛ tɔlɛ, ni bei komɛi lɛ, foidalɔi lɛ anaji waa amɛhe. Wɔtamɔ foidalɔi nɛɛ, ejaakɛ wɔ hu atsɔseɔ wɔ koni wɔle bɔ ni esa akɛ wɔda wɔfoi lɛ wɔhã. Shi nɔ kome yɛ ni wɔkɛfe amɛ. No ji akɛ, Yehowa baanyɛ ahã wɔná hewalɛ hee be fɛɛ be, ni efee klalo akɛ ebaaye ebua wɔ. Ewo shi akɛ, kɛ́ wɔkɛ wɔhiɛ fɔ̃ enɔ lɛ, ebaatsɔse wɔ ni ebaahã wɔhe awa hu!​—1 Pet. 5:10.

14. Kɛ́ wɔkɛ naagbai kpe lɛ, mɛɛ gbɛ nɔ 2 Korintobii 12:9, 10 lɛ baanyɛ aye abua wɔ ni wɔfi shi?

¹⁴ Paulo kɛ naagbai pii kpe. Mɛi jɛ lɛ, ni awa lɛ yi. No ayakã afã. Bei komɛi lɛ, enu he akɛ egbɔjɔ, ni ewie po akɛ eyɛ naagba ko ni miisu etsui tamɔ “ŋmei ko yɛ heloo lɛ mli.” (2 Kor. 12:7) Shi nɔ najiaŋ ni ebaahã naagbai nɛɛ aje enijiaŋ wui ni ekpa Yehowa sɔɔmɔ lɛ, ekɛ ehiɛ fɔ̃ Yehowa nɔ. (Kanemɔ 2 Korintobii 12:9, 10.) Enɛ ni Paulo fee lɛ hewɔ lɛ, Yehowa ye ebua lɛ ni enyɛ efi shi yɛ naagbai ni ekɛkpe lɛ fɛɛ sɛɛ.

15. Kɛ́ wɔkase Paulo lɛ, mɛni baajɛ mli kɛba?

¹⁵ Ekolɛ wɔ hu mɛi baajɛ wɔ loo abaawa wɔ yi yɛ wɔhemɔkɛyeli lɛ hewɔ. Aloo ekolɛ hela loo tɔlɛ baanyɛ ahã wɔgbɔjɔ. Shi kɛ́ wɔkase Paulo, ni wɔkɛ wɔhiɛ fɔ̃ Yehowa nɔ yɛ shihilɛi nɛɛ fɛɛ amli lɛ, Yehowa baajie suɔmɔ kpo etsɔɔ wɔ ni eye ebua wɔ.

16. Kɛ́ obɛ gbɔmɔtsoŋ hewalɛ po lɛ, mɛni obaanyɛ ofee?

¹⁶ Ani okumɔ kã saa mli? Aloo onyɛɛɛ onyiɛ ni no hewɔ lɛ, otaa shwiili mli? Ani onakutso miigba onaa, aloo ohiŋmɛi moŋ? Ani ole akɛ yɛ naagbai nɛɛ fɛɛ sɛɛ lɛ, obaanyɛ okɛ oblahii kɛ oblayei ni kpɔiaŋ wala lɛ ada wala he foi lɛ? Hiimeji, yeimeji, kɛ mɛi pii ni bɛ gbɔmɔtsoŋ hewalɛ kpakpa miifee nakai, ni bo hu obaanyɛ aahu! Mɛni hewɔ? Ejaakɛ jeee amɛ diɛŋtsɛ amɛhewalɛ naa amɛdaa foi lɛ. Moŋ lɛ, amɛkɛ amɛhiɛ fɔ̃ɔ Yehowa nɔ ni ewajeɔ amɛ. Te amɛfeɔ lɛ tɛŋŋ? Amɛboɔ  asafoŋ kpeei toi yɛ tɛlifoŋ nɔ loo ashaa ahãa amɛ, ni amɛshiɛɔ amɛhãa datrɛfoi, nɛɛsifoi, kɛ amɛwekumɛi.

17. Ani Yehowa sumɔɔ etsuji ni bɛ gbɔmɔtsoŋ hewalɛ kpakpa lɛ? Tsɔɔmɔ mli.

¹⁷ Kɛ́ gbɔmɔtsoŋ hewalɛ kpakpa ni obɛ lɛ hewɔ lɛ, onyɛɛɛ osɔmɔ Yehowa bɔ ni otsui shweɔ po lɛ, kaahã no je onijiaŋ wui ni okpa wala he foi lɛ damɔ. Yehowa sumɔɔ bo, ejaakɛ enaa ohemɔkɛyeli lɛ kɛ nibii kpakpai pii ni otsu yɛ esɔɔmɔ lɛ mli afii pii nɛɛ fɛɛ. Amrɔ nɛɛ ni eyelikɛbuamɔ he miihia bo waa fe bei fɛɛ ni eho lɛ, ekwaŋ bo. (Lala 9:10) Moŋ lɛ, ebaahi omasɛi kpaakpa fe tsutsu lɛ po. Nyɛmi yoo ko ni helai srɔtoi miigba enaa lɛ wie akɛ: “Helai lɛ, nɛkɛ eko nyiɛ eko sɛɛ, ni no hewɔ lɛ, minyɛɛɛ mashiɛ pii tamɔ bɔ ni mifeɔ be ko ni eho lɛ. Shi miyɛ miishɛɛ, ejaakɛ mile akɛ, fioo ni minyɛɔ mitsuɔ lɛ po hãa Yehowa náa miishɛɛ.” Kɛ́ onu he akɛ onii yɛ mɔbɔ lɛ, kaimɔ akɛ, Yehowa kɛ bo yɛ. Susumɔ nɔkwɛmɔnɔ kpakpa ni Paulo fee lɛ he, ni okai ewiemɔi ni woɔ mɔ hewalɛ nɛɛ, akɛ: “Mináa miishɛɛ yɛ gbɔjɔmɔi amli, . . . ejaakɛ kɛ́ migbɔjɔ lɛ, no moŋ mináa hewalɛ.”​—2 Kor. 12:10.

18. Mɛɛ naagba ni naa wa waa mɛi komɛi kɛkpeɔ?

¹⁸ Nɔ kroko ni hãaa mɛi komɛi ni daa wala he foi lɛ aná nibii mlɛo ji akɛ, amɛkɛ naagbai ni mɛi krokomɛi enaaa loo amɛnuuu shishi lɛ miikpe. Akɛ nɔkwɛmɔnɔ lɛ, amɛteŋ mɛi komɛi miiye hela ni hãa mɔ haoɔ loo mɔ tsui fãa waa. Mɛni hãa esoroɔ naagbai ni Yehowa tsuji anɔkwafoi nɛɛ kɛkpeɔ lɛ yɛ naagbai ni mɛi krokomɛi kɛkpeɔ lɛ ahe? Kɛ́ mɔ ko nine ku, loo etaa shwiili mli lɛ, mɔ fɛɛ mɔ nyɛɔ enaa nɔ ni feɔ lɛ, ni ekolɛ no baatsirɛ amɛ ni amɛye amɛbua lɛ. Shi kɛ́ mɔ ko ehao loo eeye hela ko ni esa ejwɛŋmɔ he lɛ, ekolɛ anaŋ nɔ ko yɛ ehe ni tsɔɔ akɛ nɔ ko miifee lɛ. Shi anɔkwa, nɔ ni mɔ ko ni tamɔ nakai lɛ tsɔɔ mli lɛ tamɔ nɔ ni mɔ ko ni nine eku lɛ tsɔɔ mli lɛ nɔŋŋ, ni kɛ̃lɛ, akɛni mɛi enaaa hewɔ lɛ, ekolɛ amɛnyɛɛɛ amɛye amɛbua lɛ ni amɛshɛje emii.

19. Mɛni wɔkaseɔ yɛ Mefiboshet sane lɛ mli?

¹⁹ Kɛ́ okɛ naagba ko miikpe ni onuɔ he akɛ mɛi nuuu bo shishi lɛ, Mefiboshet nɔkwɛmɔnɔ kpakpa lɛ baanyɛ awo bo hewalɛ. (2 Sam. 4:4) Mefiboshet lɛ, obubuafo ji lɛ. Shi jeee no pɛ ji naagba ni ekɛkpe. Be ko lɛ, Maŋtsɛ David yeee lɛ jalɛ sane yɛ sane fɔŋ ko ni enu yɛ ehe lɛ hewɔ. Naagbai nɛɛ ni Mefiboshet kɛkpe lɛ eko kwraa jɛɛɛ lɛ, ni eji eŋmɛ gbɛ kulɛ, amɛbaafite emiishɛɛ fɛɛ. Shi Mefiboshet jwɛŋ nibii kpakpai ni etee nɔ yɛ eshihilɛ mli lɛ ahe, ni ehiɛ sɔ. Akɛ nɔkwɛmɔnɔ lɛ, ehiɛ sɔ ejurɔ ni David fee lɛ be ko ni eho lɛ. (2 Sam. 9:6-10) No hewɔ lɛ, be ni David yeee lɛ jalɛ sane lɛ, esusu nii ahe kɛtee shɔŋŋ, ni ekɛ ejwɛŋmɔ emaaa nakai jalɛ sane kome ni ayeee lɛ lɛ nɔ. Mefiboshet mli fuuu David, ni asaŋ, eshwaaa Yehowa yɛ nɔ ni eba lɛ hewɔ.  Moŋ lɛ, ekɛ ejwɛŋmɔ ma nɔ ni ebaanyɛ efee kɛye ebua David, ni ji mɔ ni Yehowa ehala lɛ akɛ maŋtsɛ lɛ. (2 Sam. 16:1-4; 19:24-30) Yehowa hã aŋma Mefiboshet nɔkwɛmɔnɔ kpakpa lɛ afɔ̃ shi yɛ Biblia lɛ mli koni wɔkase nii yɛ mli.​—Rom. 15:4.

20. Te hela hãa nyɛmimɛi komɛi nuɔ he amɛhãa tɛŋŋ? Shi mɛni esa akɛ amɛná nɔmimaa yɛ he?

²⁰ Nyɛmimɛi komɛi yɛ ni amɛmiiye jwɛŋmɔŋ hela ni hãa amɛnuɔ he akɛ nɔ fɛɛ nɔ ni amɛfeɔ lɛ, mɔ ko miikwɛ amɛ. Enɛ hewɔ lɛ, amɛhe ejɔɔɔ amɛ kwraa loo amɛtsui fãa po kɛ́ amɛyɛ mɛi ateŋ loo amɛtee henaabuamɔi ashishi. Kɛ̃lɛ, amɛmiaa amɛhiɛ amɛyaa asafoŋ kpeei, kpeei bibii, kɛ kpeei wuji. Ewa kɛhã amɛteŋ mɛi pii akɛ amɛkɛ mɛi ni amɛleee lɛ baawie, shi amɛyaa shiɛmɔ ni amɛkɛ mɛi gbaa sane. Kɛ́ nakai eji yɛ ogbɛfaŋ lɛ, kaashe gbeyei. Nyɛmimɛi pii hu kɛ naagbai ni tamɔ onɔ lɛ miikpe. Kaahã ohiɛ kpa nɔ akɛ, Yehowa mii shɛɔ otsui muu fɛɛ mli ni ojɛɔ osɔmɔɔ lɛ lɛ he. Yehowa miijɔɔ bo ni eeye eebua bo, ni no hewɔ onyɛɔ oyaa nɔ osɔmɔɔ lɛ lɛ. * (Fip. 4:6, 7; 1 Pet. 5:7) Kɛ́ gbɔlɛ eta ohe, obɛ gbɔmɔtsoŋ hewalɛ, loo ooye hela ko ni hãa mɔ haoɔ loo mɔ tsui fãa waa, ni fɛɛ sɛɛ lɛ, okã he oosɔmɔ Yehowa lɛ, ná nɔmimaa akɛ, oofee nɔ ni sa Yehowa hiɛ.

21. Mɛni Yehowa baaye abua wɔ fɛɛ ni wɔfee?

²¹ Dromɔ naa lɛ, nibii komɛi yɛ ni hãa esoroɔ foidamɔ ni Paulo wie he lɛ yɛ foidamɔ diɛŋtsɛ he. Yɛ foi ni adaa yɛ blema lɛ mli lɛ, mɔ kome pɛ nine shɛɔ jweremɔnɔ lɛ nɔ. Shi yɛ foi ni Kristofoi daa lɛ mli lɛ, mɔ fɛɛ mɔ ni baafi shi kɛyawula shi lɛ nine baashɛ jweremɔnɔ lɛ nɔ, no ji, ebaaná naanɔ wala. (Yoh. 3:16) Yɛ foidamɔ diɛŋtsɛ mli lɛ, kɛ́ obɛ kpɔiaŋ lɛ, onyɛŋ oye kunim. Shi wɔ mɛi ni wɔdaa wala he foi lɛ ateŋ mɛi pii bɛ gbɔmɔtsoŋ hewalɛ kpakpa, ni kɛ̃lɛ, wɔmiida foi lɛ lolo. (2 Kor. 4:16) Wɔle akɛ, Yehowa baaye abua wɔ fɛɛ ni wɔya nɔ wɔda foi lɛ kɛyashi wɔbaagbe naa!